LES 53

Abi prisiri na wan fasi di Yehovah feni bun

PREI

Yehovah na „a koloku Gado” (1 Timoteyus 1:11). A wani taki wi de koloku èn taki wi prisiri na ini a libi. A feni en bun te wi e poti ten na wan sei fu rostu èn fu meki prisiri. Na ini a les disi wi o si fa wi kan gebroiki a ten dati fu du sani di e gi prisiri èn di Yehovah feni bun.

1. San wi musu prakseri fosi wi bosroiti san wi o du fu abi prisiri?

San yu lobi du te yu e relaks? Son sma lobi de na oso. Den e leisi wan buku, den e arki poku, den e luku wan felem noso den e go tapu Internet. Tra sma lobi du sani nanga mati. Den e go koiri, den e go swen noso den e prei game. Ma awinsi san wi e du fu abi prisiri wi musu de seiker taki ’Masra feni en bun’ (Efeisesma 5:10). A prenspari fu frustan a sani disi bun fu di furu sani di sma e du fu abi prisiri abi sani na ini di Yehovah no lobi, sani soleki feti, hurudu nanga afkodrei. (Leisi Psalm 11:5.) San kan yepi wi fu bosroiti san wi o du fu abi prisiri?

Efu wi e suku mati di lobi Yehovah, dan den o yepi wi fu abi prisiri na wan fasi di Yehovah feni bun. Na ini les 48 wi si taki „te wan sma e waka nanga koniwan, dan ensrefi o kon koni”. Ma efu wi lobi moksi nanga sma di no lobi den wet fu Gado, dan ’sani no o waka bun gi wi’.—Odo 13:20.

2. Fu san ede a prenspari fu luku o furu ten wi e gebroiki fu meki prisiri?

Awinsi wi e du bun sani fu abi prisiri, toku wi musu luku bun o furu ten wi e gebroiki gi den sani dati. Efu wi no du dati, dan wi no o abi nofo ten gi moro prenspari sani. Bijbel e gi wi deki-ati fu ’gebroiki a ten fu wi na wan koni fasi’.—Leisi Efeisesma 5:15, 16.

SORTU TRA SANI YU KAN LERI?

Wi o luku fa wi kan bosroiti san wi o du fu abi prisiri.

3. No du sani di no bun gi yu

Fu san ede wi musu luku bun san wi o du fu abi prisiri? Prei a FELEM èn taki fu den aksi disi:

FELEM: Sortu bun sani mi kan du fu abi prisiri? (4:39)

Fa den feti di sma ben luku na ini owruten Rome de leki sonwan fu den sani di sma e luku na ini a ten disi?
Na ini a felem, san Danny kon frustan te fu kaba?

Leisi Romesma 12:9 èn taki fu na aksi disi:

Fa a tekst disi kan yepi yu fu abi prisiri na wan fasi di Yehovah feni bun?

San na wan tu sani di Yehovah no lobi? Leisi Odo 6:16, 17 nanga Galasiasma 5:19-21. Baka te yu leisi ibri tekst, dan taki fu na aksi disi:

Sortuwan fu den sani di kari na ini a tekst disi yu e si furu na ini den felem nanga game fu a ten disi?

Fa yu kan bosroiti fa yu o abi prisiri?

Aksi yusrefi:

San mi o du? A sani di mi wani du abi sani na ini di Yehovah no lobi?
O ten mi o du en? A sani di mi o du o meki taki mi no abi ten gi moro prenspari sani?
Nanga suma mi o du en? Te mi o du a sani disi mi o moksi furu nanga sma di no lobi Yehovah?

Na wan koni sani fu tan fara fu sani di kan meki taki ogri miti wi. Dati meki te yu no de seiker efu a sani di yu wani du fu abi prisiri bun, dan a moro bun fu no du en

4. Gebroiki yu ten bun

Prei a FELEM èn taki fu na aksi disi:

FELEM: San e teki furu fu yu ten? (2:45)

Aladi a brada na ini a felem no ben luku sani di no bun, toku a ben abi wan problema. San ben de a problema fu en?

Leisi Filipisma 1:10 èn taki fu na aksi disi:

Fa a tekst disi kan yepi wi fu bosroiti o furu ten wi e gebroiki fu abi prisiri?

5. Du sani di bun gi yu

Aladi Yehovah no lobi son sani, toku furu bun sani de di wi kan du fu abi prisiri. Leisi Preikiman 8:15 nanga Filipisma 4:8. Baka dati taki fu na aksi disi: