LESEN 53
Makim Ol Amamas Em Jehova i Orait Long En
Jehova em “God bilong amamas.” (1 Timoti 1:11) Em i laik bai yumi stap gut na amamas long laip bilong yumi. Em i laik bai yumi malolo long wok na kisim amamas sampela taim. Long dispela lesen, bai yumi lukim hau yumi ken yusim gut taim bilong yumi long malolo long ol rot we yumi bai kisim amamas—na tu, yumi amamasim Jehova.
1. Yumi mas tingim wanem samting taim yumi makim ol amamas yumi laik kisim?
Yu laik mekim wanem taim yu kisim malolo? Sampela i laik yusim taim bilong ol long malolo long stap isi tasol long haus—ritim buk, harim ol musik, watsim muvi, o lukluk long Intenet. Na sampela i amamas long mekim ol samting wantaim ol pren bilong ol—raun long bus, go was was, o pilai gem. Maski wanem kain amamas yumi makim, yumi laik bai “Bikpela i orait long en.” (Efesus 5:10) Em i bikpela samting long yumi mas kliagut long dispela bikos planti amamas long nau i kamapim ol samting we Jehova i heitim, olsem pait na kilim man i dai, pasin pamuk, na wok bilong ol spirit nogut. (Ritim Buk Song 11:5.) Wanem samting bai helpim yumi long makim gut ol amamas yumi laik kisim?
Sapos yumi gat ol pren husat i laikim Jehova, gutpela pasin bilong ol inap helpim yumi na i stiaim yumi long makim gut ol amamas yumi laik kisim. Olsem yumi lainim long wanpela lesen i go pinis, “man i wokabaut wantaim ol man i gat savetingting, em bai gat savetingting.” Tasol sapos yumi save poroman wantaim ol man i no laikim ol lo bilong God “trabel bai painim” yumi.—Provep 13:20.
2. Wai na em i bikpela samting long bosim gut hamas taim yumi lusim long ol amamas?
Maski amamas yumi kisim em i gutpela, yumi mas was gut long hamas taim yumi lusim long kisim dispela amamas. Nogut yumi no gat inap taim long mekim ol samting we i bikpela samting. Baibel i kirapim yumi long “yusim gut taim [bilong yumi].”—Ritim Efesus 5:15, 16.
KISIM SAMPELA SAVE MOA
Kisim save long hau yu inap mekim ol gutpela disisen long ol amamas yu laik kisim.
3. Sakim ol amamas nogut
Wai na yumi mas makim gut ol amamas yumi laik kisim? Pilaim VIDIO, na stori long ol dispela askim.
-
Hau pait bilong ol gladieta bilong Rom bilong bipo i wankain long sampela amamas bilong nau?
-
Long vidio, Danny i kisim wanem skul long ol samting bilong amamas?
Ritim Rom 12:9, na stori long dispela askim:
-
Olsem wanem dispela ves i ken helpim yu long makim gut ol amamas yu laik kisim?
Wanem sampela samting Jehova i heitim? Ritim Provep 6:16, 17 na Galesia 5:19-21. Taim yupela i ritim wan wan skripsa pinis, stori long dispela askim:
-
Wanem ol pasin em dispela ves i kolim i stap insait long ol amamas bilong nau?
Ol askim bilong helpim yu long makim gut ol amamas
Askim yu yet:
-
Wanem? Dispela amamas i gat wanem ol samting em Jehova i heitim?
-
Taim? Em i pulim taim bilong mi long mekim ol samting we i bikpela samting moa?
-
Husat? Em i pulim mi long pas olgeta taim wantaim ol man i no laikim Jehova?
Sapos yumi stap longwe long ol samting inap bagarapim yumi, yumi bai stap gut. Em risen na yumi mas stap longwe long ol amamas em yumi lukim olsem i no gutpela long yumi
4. Yusim gut taim bilong yu
Pilaim VIDIO, na stori long dispela askim.
-
Long vidio, dispela brata i no lukim ol samting i nogut, tasol ol samting em i mekim long taim bilong em long malolo i mekim wanem long em?
Ritim Filipai 1:10, na stori long dispela askim:
-
Olsem wanem dispela ves i helpim yumi long makim hamas taim yumi laik lusim bilong kisim amamas?
5. Makim ol gutpela amamas
Tru, i gat sampela amamas em Jehova i no laikim, tasol i gat planti amamas we em i orait long en. Ritim Eklisiastis 8:15 na Filipai 4:8, na stori long dispela askim:
-
Wanem ol gutpela amamas yu laikim?
I gat kain kain gutpela samting yu ken mekim bilong kisim amamas
SAMPELA MAN I TOK: “I no gat rong long watsim ol piksa i gat pasin bilong pait na kilim man i dai, pasin pamuk, o wok bilong ol spirit nogut, bikpela samting em mi yet i no mekim ol dispela pasin.”
-
Bai yu tok wanem?
OL BIKPELA POIN
Jehova i laik bai yumi makim na kisim ol amamas i gutpela.
Riviu
-
Wanem kain ol amamas em ol Kristen i mas sakim?
-
Wai na yumi mas was gut long hamas taim yumi lusim bilong kisim amamas?
-
Wai na yu laik makim ol amamas em Jehova i orait long en?
MEKIM WOK PAINIMAUT
Skelim husat i mas makim ol amamas em yu laik kisim
“Yu Ting Ol Witnes Bilong Jehova i Tambuim Sampela Muvi, Buk, o Singsing?” (Atikol long websait)
Lukim hau yu inap mekim ol gutpela disisen long sait bilong ol amamas.
“Amamas Yu Insait Long En i Helpim Yu?” (Wastaua, Oktoba 15, 2011)
Long stori “Mi lusim pasin bilong bel nogut long narapela lain,” lukim wai na wanpela man i lusim ol amamas we bipo em i save insait long en.
“Baibel i Save Senisim i Stap Bilong Man” (Wastaua, Februeri 1, 2010)
Lukim hau wanpela mama i mekim gutpela disisen long sakim ol amamas we i kamapim ol stori bilong ol spirit nogut.
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
