MATAUPU 53

Filifili a Fakafiafiaga Kolā e Fakafiafia ki a Ieova

FAKATAGI/PEI

A Ieova ko “te Atua fiafia.” (1 Timoteo 1:11) E manako a ia ke fia‵fia tatou i ‵tou olaga. E fiafia a ia māfai e fakaavanoa ne tatou a taimi mai ‵tou galuega ke fakafia‵fia malie aka. I te mataupu tenei, ka onoono tatou ki auala e mafai ei o fakaaoga ‵tou taimi avanoa i auala kolā e fakafiafia kae fakalotomalie—kae fakafiafia atu foki ki a Ieova.

1. Ne a mea e ‵tau o masaua ne tatou māfai ko filifili ‵tou fakafiafiaga?

Ne a au mea e fia fai i taimi e fakafiafia malie aka ei koe? E ‵lei atu ki nisi tino ke ‵nofo fua i olotou fale i olotou taimi avanoa—faitau ki se tusi, fakalogologo ki pese, onoono ki se ata vitio, io me ko te Itaneti. Nisi tino e fia‵fia atu ke ‵kau fakatasi mo olotou taugasoa—faiika, kou‵kou i tai, io me ta‵fao. Faitalia me se a te mea e gali ki a tatou, e ‵tau o fakamautinoa aka me i te mea e filifili ne tatou “e talia ne te Aliki.” (Efeso 5:10) E tāua ‵ki ke malamalama tatou i te mea tenei, me i te ukega o fakafiafiaga ko lauiloa nei, e fakamalosi aka ei a mea kolā e takalialia ki ei a Ieova, e pelā mo amioga fakasaua, amioga fakatauavaga sē ‵tau, io me ko faifaiga faivailakau. (Faitau te Salamo 11:5.) Ne a mea ka fesoasoani mai ke filifili faka‵lei ‵tou fakafiafiaga?

Kafai e filifili ne tatou a taugasoa kolā e a‵lofa ki a Ieova, e mafai o fakamalosi mai latou ki a tatou mo te filifiliga foki o ‵tou fakafiafiaga. E pelā mo te mea ne tauloto ne tatou i te mataupu mai mua, a “te tino e sa‵sale fakatasi mo tino ‵poto ka poto.” I te suā feitu, kafai e ‵kau fakatasi faeloa tatou mo tino kolā e se fakatāua ne latou a tulaga o te Atua, “ka iku atu [tatou] ki te masei.”—Faataoto 13:20.

2. Kaia e tāua ei ke pule faka‵lei atu ki ‵tou taimi e fakamāumāu ki fakafiafiaga?

Kafai foki loa e ‵lei a fakafiafiaga e filifili ne tatou, e ‵tau o fakaeteete ke mo a ma tō uke a taimi e fakamāumāu ki ei. I te mea ma se lava ei a ‵tou taimi ki mea kolā e sili atu i te tāua. E fakamalosi mai te Tusi Tapu ke “fakaaoga [‵tou] taimi ki toe mea ‵lei.”—Faitau te Efeso 5:15, 16.

KELI MALOSI IFO

Fakamasani o fai a fakaikuga ‵lei e uiga ki fakafiafiaga.

3. ‵Kalo keatea mai fakafiafiaga sē ‵lei

Kaia e ‵tau o filifili faka‵lei ei ‵tou fakafiafiaga? Pei te VITIO, ko sau‵tala ei ki fesili konei.

VITIO: Ne a Fakafiafiaga e ‵Tau o Filifili ne Au? (4:39)

I auala fea e tai ‵pau ei a tafaoga fakasaua i aso mua mo nisi tafaoga i aso nei?
I te vitio, ne a mea ne tauloto ne Danny e uiga ki fakafiafiaga?

Faitau te Loma 12:9, ko sau‵tala ei ki te fesili tenei:

E fesoasoani atu pefea te fuaiupu tenei ki te filifiliga o fakafiafiaga?

Ne a nisi mea e takalialia ki ei a Ieova? Faitau te Faataoto 6:16, 17 mo te Kalatia 5:19-21. Kafai ko oti ne fai‵tau ki tusi fai‵tau katoa, ko sau‵tala ei ki te fesili tenei:

Ne a mea i fuaiupu konei ko lauiloa i fakafiafiaga i aso nei?

Auala ke filifili faka‵lei a fakafiafiaga

Fesili ifo:

Se a? E mata, e aofia i ei se mea telā e takalialia ki ei a Ieova?
Taimi fea? E mata, ka fakalavelave atu ki mea e sili atu i te tāua?
Ko oi? E mata, ka fai ei au ke fakapilipili io me e fesokotaki atu faeloa ki tino kolā e se a‵lofa ki a Ieova?

Se mea ‵lei ke faka‵mao katoatoa keatea mai i mea fakama‵taku. Tenā te pogai e ‵tau ei mo tatou o faka‵mao mai i so se fakafiafiaga telā e fakalotolotolua tatou ki ei

4. Fakaaoga faka‵lei ou taimi

Pei te VITIO, ko sau‵tala ei ki te fesili tenei.

VITIO: Ne a Mea e Fakaaoga ki ei Ou Taimi? (2:45)

E tiga eiloa e onoono te taina i te vitio ki se ata ‵lei, kae ne pokotia pefea a ia i te fakaaogaga o ana taimi avanoa?

Faitau te Filipi 1:10, ko sau‵tala ei ki te fesili tenei:

E fesoasoani mai pefea te fuaiupu tenei ke fakaiku aka ne tatou a taimi e fakamāumāu ki fakafiafiaga?

5. Filifili a fakafiafiaga ‵lei

E tiga eiloa e se fiafia a Ieova ki nisi fakafiafiaga, e uke a nisi mea ‵gali e fiafia a ia ki ei. Faitau te Failauga 8:15 mo te Filipi 4:8, ko sau‵tala ei ki te fesili tenei:

Ne a fakafiafiaga ‵lei e ‵gali ki a koe?

E mafai eiloa o aofia koe i fakafiafiaga mo tafaoga ‵lei

MEA E FAI MAI NE NISI TINO: “E seai se masei i fakafiafiaga kolā e aofia i ei a faifaiga fakasaua, amioga fakatauavaga sē ‵tau, io me ko faifaiga faivailakau. A te ‵toe mea tāua, e se fai ne au a mea konā.”