LEKSYON 53
Pilia an Kaliawan nga Nakakapalipay kan Jehova
Hi Jehova “malipayon nga Dios.” (1 Timoteo 1:11) Karuyag niya nga magin malipayon kita ngan mag-enjoy ha aton kinabuhi. Nalilipay hiya kon naggagahin kita hin panahon nga pumahuway ha aton trabaho para magrelaks. Hini nga leksyon, hibabaroan naton kon paonan-o naton magagamit ito nga panahon ha makalilipay ngan mapulsanon nga mga paagi—ngan makakapalipay liwat kan Jehova.
1. Ano an kinahanglan naton hinumdoman kon nagpipili hin kaliawan?
Ano an karuyag mo buhaton kon nagrirelaks ka? Karuyag han iba nga aadto la hira ha ira balay—nagbabasa hin libro, namamati hin musika, nagkikita hin salida, o nag-i-internet. An iba nag-i-enjoy kaupod han ira kasangkayan—nagha-hiking, nagsu-swimming, o nag-uuyag. Anoman an aton karuyag, kinahanglan siguruhon naton nga an aton ginpipili nga kaliawan “kinakarawat han Ginoo.” (Efeso 5:10) Importante nga masabtan naton ini kay damu han kaliawan nga naruruyagan han mga tawo yana nag-uupod han mga butang nga ginkakangalasan ni Jehova sugad han kamadarahog, seksuwal nga imoralidad, o espiritismo. (Basaha an Salmo 11:5.) Ano an mabulig ha aton nga magin maaramon ha pagpili han aton kaliawan?
Kon nagpipili kita hin kasangkayan nga nahigugma kan Jehova, puydi hira magin maopay nga impluwensya ha aton ngan ha aton pagpili hin kaliawan. Sugad han aton nahibaroan ha nahiuna nga leksyon, “an tawo nga naglalakat upod han mga maaramon magigin maaramon.” Ha luyo nga bahin, kon regular nga makikig-upod kita ha mga tawo nga diri nahigugma ha mga suruklan han Dios, “maghihikaraot” kita.—Proberbios 13:20.
2. Kay ano nga importante nga kontrolon naton an kadamu han panahon nga aton ginagamit para ha kaliawan?
Bisan kon an kaliawan nga aton ginpipili diri makakadaot han aton relasyon kan Jehova, kinahanglan magbantay kita nga diri maggahin hin daku hinduro nga panahon para hito. Kay kon diri, bangin magkulang na an aton panahon para ha mas importante nga mga buruhaton. Gin-aaghat kita han Biblia nga ‘gamiton ha pinakamaopay nga paagi an aton panahon.’—Basaha an Efeso 5:15, 16.
DUGANG NGA USISAHA
Hibaroi kon paonan-o maghihimo hin mag-opay nga desisyon mahitungod han imo kaliawan.
3. Likayi an maraot nga kaliawan
Kay ano nga kinahanglan pilion naton hin maopay an aton kaliawan? I-play an VIDEO, katapos, hisguti niyo an masunod nga mga pakiana.
-
Paonan-o an mga uyag ha kadaan nga Roma puropariho ha pipira nga kaliawan yana?
-
Ha video, ano an nahibaroan ni Danny mahitungod ha kaliawan?
Basaha an Roma 12:9, katapos, hisguti niyo ini nga pakiana:
-
Paonan-o ini nga teksto makakabulig ha imo ha pagpili hin maopay nga kaliawan?
Ano an pipira nga butang nga ginkakangalasan ni Jehova? Basaha an Proberbios 6:16, 17 ngan Galacia 5:19-21. Katapos basahon an tagsa nga teksto, hisguti niyo ini nga pakiana:
-
Ano nga mga butang nga gin-unabi dinhi hini nga mga teksto an komon nga aada ha mga kaliawan yana?
Kon paonan-o magigin maaramon ha pagpili han imo kaliawan
Pakianhi an imo kalugaringon:
-
Ano? Nag-uupod ba ito hin bisan ano nga ginkakangalasan ni Jehova?
-
San-o? Nakakaulang ba ito ha mas importante nga mga buruhaton?
-
Hin-o? Tungod hito, magigin duok ba ako o regular nga makakaupod an mga tawo nga diri nahigugma kan Jehova?
Mas talwas an pagpabilin nga hirayo ha peligro tubtob nga posible. Salit kinahanglan maglikay kita ha bisan ano nga kaliawan nga aton gindududahan nga bangin diri maopay para ha aton
4. Gamita ha maaramon nga paagi an imo panahon
I-play an VIDEO, katapos, hisguti niyo an masunod nga pakiana.
-
Bisan kon diri maraot an ginkikinita han brother ha video, paonan-o hiya naapektohan han iya paggamit han iya bakante nga panahon?
Basaha an Filipos 1:10, katapos, hisguti niyo ini nga pakiana:
-
Paonan-o ini nga teksto mabulig ha aton ha pagdesisyon kon ano kadaku nga panahon an aton gagamiton para ha kaliawan?
5. Pilia an maopay nga kaliawan
Bisan kon an pipira nga kaliawan nakakapasubo kan Jehova, damu an kaliawan nga mag-i-enjoy kita ngan diri makakapasubo ha iya. Basaha an Eclesiastes 8:15 ngan Filipos 4:8, katapos, hisguti niyo ini nga pakiana:
-
Ano nga maopay nga kaliawan an imo naruruyagan?
Puydi ka mag-enjoy ha maopay nga kaliawan ngan pagpahalibway
AN IBA NASIRING: “Diri man maraot an kaliawan nga nag-uupod hin kamadarahog, imoralidad, o espiritismo, basta diri ko la ito bubuhaton.”
-
Ano an imo masisiring?
SUMARYO
Karuyag ni Jehova nga magpili kita hin maopay nga kaliawan ngan mag-enjoy hito.
Repaso
-
Ano nga kaliawan an angay likyan han mga Kristiano?
-
Kay ano nga kinahanglan magbantay kita ha kadaku han panahon nga aton ginagamit para ha kaliawan?
-
Kay ano nga karuyag mo magpili hin kaliawan nga nakakapalipay kan Jehova?
DUGANG NGA IMPORMASYON
Hibaroi kon hin-o an responsable ha pagpili han aton kaliawan.
Hibaroi kon paonan-o ka makakahimo hin mag-opay nga desisyon may kalabotan ha kaliawan ngan pagpahalibway.
“Mapulsanon ba an Kaliawan nga Imo Ginpipili?” (An Barantayan, Oktubre 15, 2011)
Ha artikulo nga “Nalamposan Ko Pa Ngani an Akon Pag-abat hin Diskriminasyon,” hibaroi kon kay ano nga ginsaliwnan han usa nga lalaki an iya kaliawan hadto.
“An Biblia Nakakagbag-o han Kinabuhi” (An Barantayan, Pebrero 1, 2010)
Kitaa kon paonan-o an usa nga nanay naghimo hin maaramon nga desisyon mahitungod ha kaliawan nga may kalabotan ha magraot nga espiritu.
Bangin Maruyagan Mo Liwat
KOMON NGA MGA PAKIANA
Ano an Pag-aram ha Biblia nga Igintatanyag han mga Saksi ni Jehova?
Ha libre nga interactive nga programa nga igintatanyag han mga Saksi ni Jehova, puydi mo gamiton an bisan ano nga bersyon han Biblia. Ayaw pag-alang nga paupdon an imo bug-os nga pamilya o an imo kasangkayan.
