Yesu re ma tie Wic mi cokiri mi Jukristu. (Juefeso 5:23) Re niai kud i polo, ebetelo wi julub pare iwi ng’om keni nikadhu kud i bang’ “jamiru mandha man ma riek.” (Som Matayo 24:45.) Yesu re m’uketho “jamiru” eno man emiyo ire dito ku twero mi maku yub moko. Re asu, jamirune ucikere niworo telowic pa Kristu kubang’e kubang’e man nimiyo kony ni umego pa ­Kristu. Dong’ jamiru eno tie ng’a? Man ebedieng’ piwa nenedi? Wanen.

1. “Jamiru mandha man ma riek” tie ng’a?

Niai con, Yehova ubecuku tiyo ku ng’atu moko kunoke nyathi ungu mi jumaco moko pi nimiyo telowic ni dhanu pare. (Malaki 2:7; Juebrania 1:1) I ng’ei tho pa Yesu, jukwenda karacelo ku judongo i Yeruzalem re ma gibed gitelo wi lembe. (Tic mi Jukwenda 15:2) Pi nilubo lapor maeno, tin bende nyathi ungu moko mi judong cokiri ma julwong’o nia Guriri m’utelowic mi Jumulembe pa Yehova, re m’ubemiyo cemo mi tipo ni dhanu pa Mungu man m’ubetelo wi tic mi rweyo lembanyong’a. Ungu maeno, niwacu Guriri m’utelowic, re m’utie “jamiru mandha man ma riek” ma Yesu uketho iwi tic maeno. (Matayo 24:45a) Umegoman mi Guriri m’utelowic eno utie Jakristu ma juwiro ku tipo, man ng’atuman utie ku genogen mi cibimo karacelo ku Yesu i polo kinde ma kwo pare m’i ng’om keni bijik.

2. Jamiru mandha ubemiyo cam ang’o mi tipo?

Yesu uwacu nia jamiru mandha ‘bimiyo [ni Jukristu wadi] cam i saane.’ (Matayo 24:45b) Tap calu ma cam maeni bemiyo iwa kero man yotkum, cam mi tipo bende, niwacu telowic m’uai i Lembe pa Mungu, miyo iwa tego ma watie ku yenyne pi nigwoko bedoleng’ mwa ni Yehova man nitimo ma ber tic ma Yesu uketho i korwa. (1 Timoteo 4:6) Wabecuku nwang’u camne nikadhu kud i coko mwa mi cokiri, coko ma dit mi twodiri ku mir adhura, man nikadhu kud i girasoma ku video ma tung’ tung’ m’ubekonyowa ning’eyo gin ma Mungu ubemito watim man nibedo ku winjiri ma ceng’ini kude.

 MED NYANG’ PERI

3. Dhanu pa Yehova gicikiri nibedo i dilo ma lembe ukperere ma ber i iye

Guriri m’utelowic ubetelo wi tic mi Jumulembe pa Yehova i the loc pa Yesu. Lembene ubetimere calu m’ubed utimere con i rundi mi jukwenda. Nen VIDEO.

Som 1 Jukorintho 14:33, 40, man i ng’eye wuwec iwi penji m’ulubo e:

• Verse maeni ubenyutho nenedi nia Yehova ubemito lembe mi Jumulembe pare ukperere ma beri?

4. Jamiru mandha ubetelo wi tic mi lembanyong’a

Rweyo lembanyong’a re m’ubino tic ma pire tek akeca ma Jukristu mi rundi ma kwong’a gibed gitimo. Som Tic mi Jukwenda 8:14, 25, man i ng’eye wuwec iwi penji m’ulubo e:

• Jukani m’ubed utelo wi tic mi lembanyong’a mi Jukristu mi rundi ma kwong’a?

• Pethro giku Yohana gilubo telowic mi jukwenda wagi nenedi?

Tic ma pire tek akeca ma Guriri m’utelowic ubeneno wiye utie rweyo lembanyong’a. Nen VIDEO.

 Yesu unyutho nia tic mi rweyo lembanyong’a pire tie tek nisagu. Som Marko 13:10, man i ng’eye wuwec iwi penji m’ulubo e:

• Pirang’o Guriri m’utelowic neno tic mi rweyo lembanyong’a ni tic ma pire tek akeca?

• Pirang’o “jamiru mandha man ma riek” re m’ucikere nitelo wi ticne i ng’om zoo?

5. Jamiru mandha ubemiyo telowic

Guriri m’utelowic ubemiyo telowic ni Jukristu mandha i ng’om zoo. Re i wang’ nimaku yub pi nimiyo telowic m’ubekwayere, etimo ang’o? Wakenen kite ma Guriri m’utelowic mi rundi ma kwong’a ubed utimo ko. Som Tic mi Jukwenda 15:1, 2, man i ng’eye wuwec iwi penji m’ulubo e:

• Lembang’o m’ugam unyayu teliri i kind Jukristu mi rundi ma kwong’a?

• Pi nidaru lembene, Paulo, Barnaba man jumange gicidh ginwang’u telowic i bang’ jukani?

Som Tic mi Jukwenda 15:12-18, 23-29, man i ng’eye wuwec iwi penji m’ulubo e:

• I wang’ nimaku yub, Guriri m’utelowic mi rundi ma kwong’a utimo lembe moko ma kani pi ninwang’u telowic pa Mungu iwi lembene?​—Nen verse mir 12, 15, man 28.

Som Tic mi Jukwenda 15:30, 31 man 16:4, 5, man i ng’eye wuwec iwi penji m’ulubo e:

• Jukristu mi rundi ma kwong’a gijolo nenedi telowic ma Guriri m’utelowic umiyo?

• Yehova upoko mugisa nenedi iwi woro ma ginyutho?

Som 2 Timoteo 3:16 man Yakobo 1:5, man i ng’eye wuwec iwi penji m’ulubo e:

• I wang’ nimaku yub m’ubekwayere, Guriri m’utelowic mi rundi ma tin beyenyo telowic kani?

 I ADUNDO

Guriri m’utelowic re ma tie “jamiru mandha man ma riek” ma Yesu uketho. Ebemiyo telowic man cam mi tipo ni Jukristu mandha i wang’ ng’om zoo.

Penji mi poyowic

• Ng’a m’uketho ‘jamiru mandha man ma rieki’?

• Guriri m’utelowic ubedieng’ piwa nenedi?

• Nyo iyiyo andhandha nia Guriri m’utelowic re ma tie “jamiru mandha man ma riek”?