Jízɛ̀ mɔ̀ Kɛ́ɖɛ́ì ɖeín-sí-nyɔ̀ ɓèɛ̀ dyí-poìn-kpòòɔ̀ kɔ̃in-nyɔ̀. (Ìfísĩ̀ɔ̀ 5:23) Zɛ̃̀ɛ̀ kɛɛ, Jízɛ̀ nàìn ɔ ɖéín-sí-nyɔ̀ ɓèɔ̀ dyììn ɖé “gbo-nì-nyɔ̀ ɓɛ́ ɔ fɔ̀nɔ̀ hwòɖò, ké nyɔ ɓɛ́ìn ɔ hwòɖò kɔ̃ dèɛ̀” kɛɛ mú sɔ̀ìn ɖé dyɔún. (Zà Máfíò 24:45 wuɖuún.) Jízɛ̀ mìɔùn gã “gbo-nì-nyɔ̀ɔ̀” jèɛɛ, ɔ ɓɛ́ìn kpé wè ɓéɖéɛ kɛɛ, ɔ mu Kɛ́ɖɛ́ì gbo-nì-nyɔ̀ jùùn tee, ké ɔ mu Kɛ́ɖɛ́ì ɖíí-gàà ɓèɔ̀ bìì kũ̀à nyuùn. Nyɛ́ mɔ̀à gbo-nì-nyɔ̀ nìà wɛ kɛ́? Xwɛ̀ gbo-nì-nyɔ̀ɔ̀ nyu à jè gbo kɔ̃̀ɔ̀ kɛ́?

1. Nyɛ́ mɔ̀à “gbo-nì-nyɔ̀ ɓɛ́ ɔ fɔ̀nɔ̀ hwòɖò, ké nyɔ ɓɛ́ìn ɔ hwòɖò kɔ̃ dèɛ̀” kɛ́?

Jɛhova nyùìn gàa kpò dyúáɖò mɔɔ gàa gbɛ̀i-gbɛ̀i ɓè kũ̀à mú tee, ɓɛ́ ɔ ké ɔ nyɔ ɓèɔ̀ hwìè da zàìn. (Máɖékà 2:7; Híìbúɖúù 1:1) Ti Jízɛ̀ ɖà ma mɛ́ kɛɛ, àpɔ́sò ɓèɔ̀ kè ɛ́ɖɔ̀ ɓè nì ma ɖé Jùɖúsɛ̀ɖɛ̀ìn nyɛɛ ɖú ma dyí-poìn-kpòòɔ̀ nàìn kpàì. (Àpɔ́sò 15:2) Dyììn ɖé ɖɛ dyúáɖòɔ̀ nyu-nyu mú zɛ̃̀ɛ̀ kɛɛ, ɛ́ɖɔ̀ gbɛ̀i-gbɛ̀i ɓè mɔ̀à—Jɛhova Zàse ɓèɛ̀ Dyúa-Nì-Nyɔ̀ Ɓèɔ̀ kɛɛ tò zùùn-ɖìì-ɖɛ̀, ké wa nàìn Geɖepɔɔ-wùɖù-wáɖá-kũ̀àɔ̀. Nyɔ xwéɖé-wè nìà kɛɛ mɔ̀ “gbo-nì-nyɔ̀ ɓɛ́ ɔ fɔ̀nɔ̀ hwòɖò, ké nyɔ ɓɛ́ìn ɔ hwòɖò kɔ̃ dèɛ̀” ɓɛ́ Jízɛ̀ gã ma kà kɛ. (Máfíò 24:45) Nyɔ-Dyúa-Nì-Nyɔ̀ Ɓèɔ̀ séín mɔ̀ nyɔ ɓè ɓɛ́ zùùɔ̀ gã, ké wa dèɛ̀ hwòɖò kɔ̃ ɓɛ́ wa ké ɖé Kɛ́ɖɛ́ì gbo nì ɖé ɔ dyɔún Kã̀à-ɓòɖòɔ̀ mú ti wa fɛ̀ɛ̀ɔ̀ mu gbɔ hwɛ̀ìn dà ɓóɖó-kpàà kɔ̃ɛ.

2. Ðɛ́ mɔ̀ zùùn-ɖii-ɖɛ̀ ɓɛ́ gbo-nì-nyɔ̀ ɓɛ́ nyɔ ɓɛ́ìn hwòɖò kɔ̃ dèɛ̀ kɛɛ nyí nyɔ kɛ́?

Jízɛ̀ cɛ̃ɛ ma kà ɓɛ́ gbo-nì-nyɔ̀ ɓɛ́ nyɔ ɓɛ́ìn hwòɖò kɔ̃ dèɛ̀ kɛɛ mɔ̀ nyɔ “ɓɛ́ ɔ ké [ɔ mùè Kɛ́ɖɛ́ì ɖeín-sí-nyɔ̀ ɓè] ɖii-ɖɛ̀ nyí ɓó ti wa ɓéɖé ɓɛ́ wa kéɛ dyéìn nyɛ.” (Máfíò 24:45) Kà dyúáɖò kà ɖii-ɖɛ̀ ɓɛ́ à ɖià kɛ kpáà à gbo ɓɛ́ à kéà dyi ku, kè ɓɛ́ à dyɔɔ̀ kéà mú wóɖóɛɛ, kàà zùùn-ɖii-ɖɛ̀—ɓɛ́ ɔ mɔ̀à náún-po-wùɖù sɔ̀àìn ɖé Geɖepɔɔ Wuɖuɔ̀ múɛɛ—nyí à kpé à kɔ̃̀ à ké ɓéɖé ɓɛ́ à ké Jɛhova gboi kpɔ̃ kánáá pu, kè ɓɛ́ à ké kũ̀à ɓɛ́ Jízɛ̀ ɖàà à nyíɛɛ nyuɛ ɓɛ́ìn. (1 Tímétè 4:6) À dyé ɖii-ɖɛ̀ nìà kɛ dyììn ɖé dyí-poìn-poìn ɓè kè ɛ̀sã́mèɖè ɓè kè kɔ̃̀vɛ̃́sĩ̀ɔ̀ ɓè kè céè-ɖɛ̀ ɓè ɓɛ́ wa ɓá Baɓoɔ dyí ɔ kè víɖò ɓè ɓɛ́ wa kpá à gbo ɓɛ́ à ké ɖɛ mɔ̀ Geɖepɔɔ mɔ́ɔ́-ɖɛ̀ kɛɛ múin wɔ̃́, kè ɓɛ́ à ké gbo-kpɔ̃ìn-kpɔ̃ìn nìà à kè ɔ kè pṹa kɛ dyi kùìn nyɛɛ mú.

 ÐE ÐƐ MÚIN CÁ

3. Jɛhova nyɔ ɓèɔ̀ ɓéɖé ɓɛ́ wa ké ɖɛ páún po

Jízɛ̀ nàìn Nyɔ-Dyúa-Nì-Nyɔ̀ Ɓèɔ̀, ké wa po Jɛhova Zàse ɓèɛ̀ kũ̀àɔ̀ páún. Jízɛ̀ nàìn ma Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛ ɖé hwìè dyúáɖòɔ̀ mú. Po VÍÐÒƆ̀ kũ̀à gbo.

Zà 1 Kɔ̀ɖéíntĩ̀ɔ̀ 14:33, 40 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Xwɛ̀ vɔ̀sì ɓè nìà kɛ nyuɛ tɛ̀mɛ̀ìn kà ɓɛ́ Jɛhova mɔ́ ɓɛ́ ɔ Zàse ɓèɔ̀ ké ɖɛ páún po kɛ́?

4. Gbo-nì-nyɔ ɓɛ́ nyɔ ɓɛ́àìn hwòɖò kɔ̃ dèɛ̀ kɛɛ po à Geɖepɔɔ-wùɖù-wáɖá-kũ̀àɔ̀ páún

Geɖepɔɔ-wùɖù-wáɖá-kũ̀àɔ̀ mɔ̀ kũ̀à zi ɖɛ kpauń ɓɛ́ Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ nyu ma kɛ. Zà Àpɔ́sò 8:14, 25 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Ðé Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛ hwìɛ̀ kɛɛ, nyɛ́ nàìn ma Geɖepɔɔ-wùɖù-wáɖá-kũ̀àɔ̀ kɛ́?

• Ðɛ́ Píɖɛ̀ kè Jɔ̃́ɔ́ nyu ma ɓá wa mùè àpɔ́sò ɓèɔ̀ hwìè-dà-zàìn-zàìnɔ̀ jè dyíɛ́?

Geɖepɔɔ-wùɖù wáɖá-wáɖá mɔ̀ kũ̀à zi ɖɛ kpauń ɓɛ́ Nyɔ-Dyúa-Nì-Nyɔ̀ Ɓèɔ̀ ɖà páún poɛ. Po VÍÐÒƆ̀ kũ̀à gbo.

 Jízɛ̀ nɛ́ìn ma kà Geɖepɔɔ-wùɖù wáɖá-wáɖá nyu ɖɛ kpaa kɛɛ jìì kɔ̃. Zà Máà 13:10 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Xwíníínɔ̀ nyɛ́ kɔ̃̀ jè Geɖepɔɔ-wùɖù-wáɖá-kũ̀àɔ̀ kpaà ɖɛ mìɔ ɖé Nyɔ-Dyúa-Nì-Nyɔ̀ Ɓèɔ̀ gbo kɛ́?

• Xwíníínɔ̀ nyɛ́ kɔ̃̀ jè à mɔ́à “gbò-nì-nyɔ̀ ɓɛ́ ɔ fɔ̀nɔ̀ hwòɖò, ké nyɔ ɓɛ́ìn ɔ hwòɖò kɔ̃ dèɛ̀” kɛ ɓɛ́ ɔ kéà kũ̀à nìà kɛ páún po ɖé ɓóɖó-kpà gànáà gboiɛ́?

5. Gbo-nì-nyɔ̀ ɓɛ́ nyɔ ɓɛ́àìn hwòɖò kɔ̃ dèɛ̀ kɛɛ po nyɔ náún

Nyɔ-Dyúa-Nì-Nyɔ̀ Ɓèɔ̀ tò náún-po-wùɖù ɓó Kɛ́ɖɛ́ì ɖeín-sí-nyɔ̀ ɓè nì ɓóɖó-kpàà dà séín nyɛɛ bìì. Xwɛ̀ ɔ nyu náún-po-wùɖù ɔ ké tò kɛɛ jè gbɔ poɛ kɛ́? Cɛ̃́ kà Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ Dyúa-Nì-Nyɔ̀ Ɓèɔ̀ nyuɛ ma náa nyuɛ kɛ. Zà Àpɔ́sò 15:1, 2 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Ðɛ́ nyu ké zà-ɖɛín kpá ma Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ ɖíɛ́ ɓè pṹa kɛ́?

• Nyɛ́ kɔ̃̀ gbo ɓɛ́ Pɔ́ɔ̀ kè Bànábà ɔ kè nyɔ tɔ̀ɔ̀ ɓè mu ma ɓɛ́ wa ké ma fũ̀à-fṹáɔ̀ dyi zĩ̀ìn nyɛ́?

Zà Àpɔ́sò 15:12-18, 23-29 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Hwɛ̀ ɓɛ́ nyɔ-dyúa-nì-nyɔ̀ ɓè nì ma kĩ́ín nyɛɛ ké ma ɖɛ ɖò gbɔ poɛɛ, ɖɛ́ wa nyu ma ɓɛ́ Geɖepɔɔ ké ma wa hwìè da zàìn ɓá fũ̀à-fṹáɔ̀ jè dyíɛ́?—Dyé vɔ̀sì 12, 15, kè 28.

Zà Àpɔ́sò 15:30, 31 kè 16:4, 5 wuɖuún, ɓɛ́ ɓè ké dyi-diè-ɖɛ̀ ɓè nìà kɛ dɔ́ɔ́ kɔ̃in dèìn:

• Xwɛ̀ Kɛ́ɖɛ́ì ɖeín-sí-nyɔ̀ ɓè nì ma kĩ́ín nyɛɛ nyu ma náún-po-wùɖù ɓɛ́ nyɔ-dyúa-nì-nyɔ̀ ɓèɔ̀ to ma kɛɛ kpɔ̃ɔ nyuɛ kɛ́?

• Xwɛ̀ Jɛhova nyu ma waà wuɖu-nyu-nyuɔ̀ mana kɔ̃ poɛ kɛ́?

Zà 2 Tímétè 3:16 kè Jĩ́ìn 1:5 wuɖuún, ɓɛ́ ɓè ké dyi-diè-ɖɛ̀ nìà kɛ dɔ́ɔ́ kɔ̃in dèìn:

• Dɛ̀ Nyɔ-Dyúa-Nì-Nyɔ̀ Ɓèɔ̀ gmɔ̀ìn ɓɛ́ wa ké hwìè-da-zàìn-zàìn dyé ɔ jù ké wa dyi ɖɛ ɓè gbɔ poɛń nì zɛ̃̀ɛ̀ níɛ́?

 SṸÌN-XWÍNÍÍN

Nyɔ-Dyúa-Nì-Nyɔ̀ Ɓèɔ̀ mɔ̀ nyɔ mɔ̀à “gbò-nì-nyɔ̀ ɓɛ́ ɔ fɔ̀nɔ̀ hwòɖò, ké nyɔ ɓɛ́ìn ɔ hwòɖò kɔ̃ dèɛ̀” ɓɛ́ Kɛ́ɖɛ́ì gãà kɛ. Ɔ tò náún-po-wùɖù, ké ɔ nyí Kɛ́ɖɛ́ì ɖeín-sí-nyɔ̀ ɓè nì ɓóɖó-kpàà dà séín nyɛɛ zùùn-ɖìì-ɖɛ̀.

Ðɛ-kɔ̃in-kpa-kpa

• Nyɛ́ mɔ̀ nyɔ gãà ‘gbo-nì-nyɔ̀ ɓɛ́ ɔ fɔ̀nɔ̀ hwòɖò, ké nyɔ ɓɛ́àìn hwòɖò kɔ̃ dèɛ̀’ kɛ́?

• Xwɛ̀ Nyɔ-Dyúa-Nì-Nyɔ̀ Ɓèɔ̀ nyu à gbo gmɔ̀ɔ̀ kɛ́?

• M̀ poɛ jàà kà ɓɛ́ Nyɔ-Dyúa-Nì-Nyɔ̀ Ɓèɔ̀ mɔ̀ nyɔ mɔ̀à “gbò-nì-nyɔ̀ ɓɛ́ ɔ fɔ̀nɔ̀ hwòɖò, ké nyɔ ɓɛ́ìn ɔ hwòɖò kɔ̃ dèɛ̀” kɛɛ̀?