NLÔ AJÔ 54

Za a ne ôlo ô ne mewôk a fek, a ésaé évé wo bo?

Vô’ôlô nkobô

Yésus nnye a ne nlô ya akônda. (Beéphésien 5:23) Den, mbôle Yésus a nto njôô yôp été, a wulu bebo bisaé be Yéhôva ya si se a zene ya “ôlo ô ne mewôk a fek.” (Lañe’e Matthieu 24:45.) Mbôle Yésus émien nnye a nga tobe “ôlo ô ne mewôk a fek”, ajô te ô ne ngule ya nyoñe mintyi’an miziñ, ve ô bili na wo bo Yésus mewôk a saane bobenyañ bé. Za a ne ôlo ôte? Aval avé wo nyoñ ngab a bia?

1. Za a ne “ôlo ô ne mewôk a fek”?

Yéhôva a jaéya zu a belane ngume môt, nge ke nsamba bôt asu na a wulu ayoñ dé. (Malachie 2:7; Behébreu 1:1) Mvus awu Yésus, minlôman a bemvendé ya Jérusalem be nga taté na ba wulu akônda. (Mame minlôman 15:2) Dene fe, mone nsamba bemvendé, nnye ate bia loone na Tin ékôan Bengaa be Yéhôva, a ve bebo bisaé be Yéhôva bidi ya nsisim, a wulu fe ésaé nkañete. Nsamba bôt ôte ñwô ô ne ôlo ô ne mewôk a fek Yésus a nga telé. (Matthieu 24:45a) Bibu’a bise ya Tin ékôan bi ne miñwo’on, mmie mite mia ye ke jôé a Krist yôp été éyoñ ényiñe jap ya si va ja ye tebe.

2. Bidi ya nsisim bivé ôlo ô ne mewôk a fek wo ve bia?

Yésus a nga jô na ôlô ô ne mewôk a fek wo ye “ve [Bekristene] bidi éyoñ [ja] yiane.” (Matthieu 24:45b) Aval ane bidi ya minsôn bia ve ngul nyul, aval ete fe bidi ya nsisim, mejô ma so Kalate Zambe, ma ve bia ngule ya ke ôsu a kabetane Yéhôva, a bo ésaé Yésus a nga li’i bia. (1 Timothée 4:6) Bia bi bidi bite a zene ya bisulan, bitôkan, a beta bitôkan. Bia bi fe bie a zene ya bekalate bangan a bevidéo, mbe bete ba volô bia na bi tu’a wô’ô nkômbane Yéhôva a na bi yemete élate jangan a nye.

TUKA’A FAK

Yene’e mfi ya “ôlo ô ne mewôk a fek,” ñwô ôte ô ne Tin ékôane Bengaa be Yéhôva.

Tin ékôan ja ve bebo bisaé be Yéhôva ya si se bidi ya nsisim, mebendé, a ja su’u fe be

3. Bebo bisaé be Yéhôva ba yiane bi mbamba nta’ane mam

Yésus a belane Tin ékôan asu na a wulu ésaé Bengaa be Yéhôva ja boban si se. Nne fe Yésus a mbe a wulu’u Bekristene ya ntete mimbu ôsu nalé. Futi’i VIDÉO.

VIDÉO: Yéhôva a yeme ta’a bebo bisaé bé (6:18)

Lañe’e 1 Becorinthien 14:33, 40, mvuse ya valé, yala’ane nsili wu:

Aval avé bifuse bi bia liti na Yéhôva a yi na bebo bisaé bé be bo nta’an?

4. Ôlo ô ne mewôk a fek wo tebele ésaé nkañete

Ésaé nkañete é mbe ésaé é mbe é dañe mfi asu Bekristene ya ntete mimbu ôsu. Lañe’e Mame minlôman 8:14, 25, mvuse ya valé, yala’ane minsili mi:

Za a mbe a tebele’e ésaé nkañete ntete mimbu ôsu?
Pierre ba Jean be nga bo aya éyoñ minlôman mivok mi nga ve be mebendé?

Ésaé nkañetane mbamba foé é ne ésaé ja dañe mfi Tin ékôan ja wulu je. Futi’i VIDÉO.

VIDÉO: Tuka’a nyoñ ngab ésaé nkañete (1:24)

Yésus a nga liti abim avé ésaé nkañete é ne mfi. Lañe’e Marc 13:10, mvuse ya valé, yala’ane minsili mi:

Amu jé ésaé nkañete é ne angôndô ya mfi asu Tin ékôan?
Amu jé e ne mfi na “ôlo ô ne mewôk a fek” ô tebele ésaé éte?

5. Ôlo ô ne mewôk a fek wo ve bia mebendé

Tin ékôan ja ve Bekristene ya si se mebendé. Aval avé be wô’ô bo asu na be tyi’i na bé ve abendé si abendé ka? Yene’ aval avé tin ékôan ya ntete mimbu ôsu é mbe é bo’o jam ete. Lañe’e Mame minlôman 15:1, 2, mvuse ya valé, yala’ane minsili mi: