Yesu ni we ori kwebembera ekibina c’Abakristo. (Abaefeso 5:23) Omuri obu bwire, Yesu nayebembera abakurasi beye b’omu nsi ari omu iguru akoresize ‘omwambari w’omwesigwa kandi w’omunyabwenge.’ (Shoma omuri Matayo 24:45.) Yesu ni we owahire obujunanizibwa ogo “mwambari”; eco nikimanyisa ku hine obushoborozi obu ayine, konka naguma ari omugaragwa wa Yesu kandi nahereza benishe ba Yesu. Mbwenu shi ogo mwambari ni oha? Kandi shi ni bata oku ari kutufaho?

1. ‘Omwambari w’omwesigwa kandi w’omunyabwenge’ ni oha?

Kwiha omu bwire bwa kare, Yehova atwire ari kukoresa omuntu omwe ninga shi omutwe gw’abashija, omu kwebembera abahereza beye. (Malaki 2:7; Abaheburaayo 1:1) Yesu ku yamazire kufa, entumwa n’abazehe b’omuri Yerusalemu ni bo abasigire bari kwebembera. (Ebyakozirwe 15:2) N’omuri obu bwire omutwe muce gw’abazehe, ni okugamba Akakiko k’Abarisa k’Abahamya ba Yehova nikatebekanisa ebyokurya by’omwika kandi kebembera omurimo g’okuburira. Ogo mutwe muce ni we ‘mwambari w’omwesigwa kandi w’omunyabwenge owu [Yesu yatireho]’. (Matayo 24:45a) Ab’omu Kakiko k’Abarisa bona, ni Abakristo abashukirweho omwika abari kutunga ekihembo cabo c’okwija kutegeka na Kristo omu iguru bamara kuhendera empaka zabo omu nsi.

2. Ni biha byokurya by’omwika ebi omwambari w’omwesigwa ari kututegurira?

Yesu akagamba ku omwambari w’omwesigwa yabire arije ‘kugaburira Abakristo bagenzi beye omu bwire obuhikire.’ (Matayo 24:45b) Nk’oku ebyokurya by’omubiri biri kutukwasa kugira amani n’amagara marungi, ebyokurya by’omwika na byo ni okugamba obuhabuzi obu turi kwiha omu Kigambo ca Ruhanga, nibutuma twagira amani agu turi kwetenga ngu tugume turi abesigwa ahari Yehova kandi ngu tugume kukora omurimo ogu Yesu yatuhire. (1 Timoseo 4:6) Ebyo byokurya by’omwika nitubitungira omu nterane n’omu biterane. Nambwenu, nitubitungira omu bitabo ebyegamire ahari Bibuli na za vidiyo eziri kutukwasa kushoborocerwa ebi Yehova ari kukunda kandi bikatuma twagumya obunywani bwitu na we.

 YEGA BYINGI

3. Abahereza ba Yehova bashemerire kuba batebekanisibwe ge

Akakiko k’Abarisa kari kwebemberwa na Yesu nikatebekanisa omurimo gw’Abahamya ba Yehova omu nsi yona. Eyo ntebekanisa eri nk’eyi Abakristo b’omu kinyigana c’okubanza babire bine. Zana VIDIYO.

Shoma 1 Bakorinso 14:33, 40, rero muganire ahari eki kibuzo:

• Ni bata oku ezi nyiriri ziri kwereka oku Yehova ari kwenda ngu Abahamya beye babe batebekanisibwe?

4. Omwambari w’omwesigwa natebekanisa omurimo g’okuburira

Omurimo g’omugasho munonga ogu Abakristo b’omu kinyigana c’okubanza babire bari kukora ni og’okuburira. Shoma omu Byakozirwe 8:14, 25, rero muganire ahari ebi bibuzo:

• Ni oha owabire ari kwebembera omurimo g’okuburira omu kinyigana c’okubanza?

• Ni bata oku Petero na Pawulo batwarize obu ezindi ntumwa zabahire obuhabuzi?

Omurimo g’okuburira ni go ogu Akakiko k’Abarisa kari kufaho munonga. Zana VIDIYO.

 Yesu akagamba omugasho g’omurimo g’okuburira. Shoma omuri Mako 13:10, rero muganire ahari ebi bibuzo:

• Ahabw’enki omurimo g’okuburira guri og’omugasho aha Kakiko k’Abarisa?

• Ahabw’enki turi kwetenga ngu ‘omwambari w’omwesigwa kandi w’omunyabwenge’ ayebembere ogu murimo omu nsi yona?

5. Omwambari w’omwesigwa natuha obuhabuzi

Akakiko k’Abarisa nikataho obuhabuzi oburi kukwasa Abahamya ba Yehova b’omu nsi yona. Ni bata oku bari kutorana obuhabuzi obu baratuhe? Yetegereze oku Akakiko k’Abarisa k’omu kinyigana c’okubanza kabire nikakikora. Shoma omu Byakozirwe 15:1, 2, rero muganire ahari ebi bibuzo:

• Ni enki ecatumire Abakristo b’omu kinyigana c’okubanza batayikirizingana?

• Mbwenu shi Pawulo, Barinaba hamwe n’abandi bakiha nkahe obuhabuzi bw’okutereza eco kizibu?

Shoma omu Byakozirwe 15:12-18, 23-29, rero muganire ahari eki kibuzo:

• Ab’omu Kakiko k’Abarisa ku bagire kukora ensharamu, ni enki eki babandize kushwijuma kugira ngu bamanye oku Yehova yabire ari kureba eco kizibu?—Reba orunyiriri rwa 12, 15, na 28

Shoma omu Byakozirwe 15:30, 31 na 16:4, 5, rero muganire ahari ebi bibuzo:

• Ni bata oku Abakristo b’omu kinyigana c’okubanza babire nibakira obuhabuzi obu babire nibahebwa n’Akakiko k’Abarisa?

• Mbwenu shi, ni eha migisha eyi Yehova yabire nabaha ahabw’okworobera obwo buhabuzi?

Shoma omuri 2 Timoseo 3:16 n’omuri Yakobo 1:5, rero muganire ahari eki kibuzo:

• Ni nkahe ahu Akakiko k’Abarisa k’omuri obu bwire kari kwiha obuhabuzi kaza kukora ensharamu?

 EMPINYE

Akakiko k’Abarisa ni ‘omwambari w’omwesigwa kandi w’omunyabwenge’ owu Kristo yatireho. Nikaha obuhabuzi Abahamya b’omu nsi yona kandi kabaha n’ebyokurya by’omwika.

Wayega ki?

• Ni oha owatireho ‘omwambari w’omwesigwa kandi w’omunyabwenge’?

• Ni bata oku Akakiko k’Abarisa kari kutufaho?

• Mbehi noyesiga otari kubanganisa ku Akakiko k’Abarisa ari ‘omwabari w’omwesigwa kandi w’omunyabwenge’?