Jesus i Mékúren ewe mwichefelin Chón Kraist. (Efisos 5:23) Lón ei fansoun, Jesus a néúnéú ewe “chon angang mi allükülük o tipachem” le emmweni néún kewe chón káé wóón fénúfan. (Álleani Mateus 24:45.) Jesus Kraist pwisin a seikaatá ena “chon angang” me a mut ngeni an epwe féri ekkóch kefil. Iwe nge, a chúen lamot án ena “chon angang” epwe álleasochisi Kraist me angang fán iten pwiin kewe. Ié ena chón angang? Ifa usun ena chón angang a túmúnúkich?

1. Ié “ewe chon angang mi allükülük o tipachem”?

Jiowa a kan néúnéú emén mwán are eú kúkkún kúmiin mwán le awora emmwen ngeni néún aramas. (Malakai 2:7; Ipru 1:1) Mwirin málóón Jesus, ekkewe aposel me ekkewe souakkomw lón Jerusalem ra wisen emmweni néún Kot kewe aramas. (Föför 15:2) Pwal ina chék usun lón ei fansoun, eú kúkkún kúmiin mwán mi ásimaw, iir ewe Mwichen Soupwúngúpwúng án Chón Pwáraatá Jiowa, ra awora mwéngé lón pekin ngún me emmweni ewe angangen afalafal. Ena kúmiin mwán, iir “ewe chon angang mi allükülük o tipachem . . . [Jesus a] seikätä.” (Mateus 24:45) Meinisin chón lón ena Mwichen Soupwúngúpwúng iir Chón Kraist mi kepit. Iir ra mwétéresiiti ar repwe fiti Kraist lón an we Mwú lón láng atun epwe much manawer wóón fénúfan.

2. Met sókkun mwéngé lón pekin ngún ewe chón angang mi alúkúlúk a awora?

Jesus a erá pwe ewe chón angang mi alúkúlúk epwe awora ngeni chiener kewe Chón Kraist “wiser mongö lon fansoun fich.” (Mateus 24:45) Anach mwéngé, ra kan apéchékkúla inisich. Iwe, pwal ina usun ren ekkewe mwéngé lón pekin ngún mi kawor seni án Kot we Kapas, ra álisikich ach sipwe chék tuttuppwél ngeni Jiowa me féri ewe angang Jesus a ewisa ngenikich. (1 Timoty 4:6) Sia angei ena mwéngé lón pekin ngún seni ach kewe mwich me mwichelap, me pwal seni néúch kewe puk me video mi lóngólóng wóón Paipel. Ra álisikich le weweiti letipen Kot me apéchékkúla ach ririin chiechi ngeni.

 KÚTTAFICHI

3. A lamot néún Jiowa aramas repwe kókkótéch

Fán án Jesus emmwen, ewe Mwichen Soupwúngúpwúng a emmweni ewe angang Chón Pwáraatá Jiowa ra kan féfféri. A pwal fis ena esin kókkót lein ekkewe Chón Kraist lón fansoun ekkewe aposel. Fichi ei VIDEO.

Álleani 1 Korint 14:33, 40, me mwirin pwóróusfengen wóón ei kapas eis:

• Ifa usun ekkeei wokisin ra pwári pwe Jiowa a mochen án néún kewe Chón Pwáraatá repwe kókkótéch?

4. Ewe chón angang mi alúkúlúk a akkóta ach angangen afalafal

Ewe angangen afalafal, ina ewe angang mi fókkun aúchea ekkewe Chón Kraist lón fansoun ekkewe aposel ra féfféri. Álleani Föför 8:14, 25, me mwirin pwóróusfengen wóón ekkeei kapas eis:

• Ié a emmweni ewe angangen afalafal lón fansoun ekkewe aposel?

• Met Petrus me Johannes ra féri mwirin ar angei emmwen seni chiener kewe aposel?

Ewe angangen afalafal, ina ewe angang mi fókkun aúchea ewe Mwichen Soupwúngúpwúng a akkóta. Fichi ei VIDEO.

 Jesus a affata úkúkún aúchean ewe angangen afalafal. Álleani Markus 13:10, me mwirin pwóróusfengen wóón ekkeei kapas eis:

• Pwata ewe angangen afalafal a mmen aúchea me ren ewe Mwichen Soupwúngúpwúng?

• Pwata a lamot án “ewe chon angang mi allükülük o tipachem” epwe akkóta ei angang mi fis wóón unusen fénúfan?

5. Ewe chón angang mi alúkúlúk a awora kapasen emmwen

Ewe Mwichen Soupwúngúpwúng a awora kapasen emmwen ngeni Chón Kraist wóón unusen fénúfan. Ifa usun ra filatá met sókkun kapasen emmwen repwe ngenikich? Sipwe ppii ifa usun ewe mwichen soupwúngúpwúng a féri ena lón fansoun ekkewe aposel. Álleani Föför 15:1, 2, me mwirin pwóróusfengen wóón ekkeei kapas eis:

• Met ekkóch ekkewe Chón Kraist lón fansoun ekkewe aposel ra osukosuk wóón?

• Ié kewe Paulus, Parnapas, me pwal ekkewe ekkóch ra ló kútta álillis seniir?

Álleani Föför 15:12-18, 23-29, me mwirin pwóróusfengen wóón ei kapas eis:

• Me mwen án ewe mwichen soupwúngúpwúng lóóm féri eú kefil, met ra féri pwe repwe silei án Kot emmwen wóón ena mettóch? ​—Ppii wokisin 12, 15, me 28.

Álleani Föför 15:30, 31 me 16:4, 5, me mwirin pwóróusfengen wóón ekkeei kapas eis:

• Met meefien ekkewe Chón Kraist atun ra angei emmwen seni ewe mwichen soupwúngúpwúng?

• Ifa usun Jiowa a efeiéchú ar álleasochis?

Álleani 2 Timoty 3:16 me James 1:5, me mwirin pwóróusfengen wóón ei kapas eis:

• Ia ewe Mwichen Soupwúngúpwúng lón ei fansoun ra kútta álillis me ie atun ra féri kefil?

 MENLAPAN

Ewe Mwichen Soupwúngúpwúng, ina “ewe chon angang mi allükülük o tipachem” mi seikitá me ren Kraist. A awora kapasen emmwen me mwéngé lón pekin ngún ngeni Chón Kraist wóón unusen fénúfan.

Enniwili

• Ié a seikaatá “ewe chon angang mi allükülük o tipachem”?

• Ifa usun ewe Mwichen Soupwúngúpwúng a túmúnúkich?

• Ka lúkú pwe ewe Mwichen Soupwúngúpwúng, ina “ewe chon angang mi allükülük o tipachem”?