Yesu ˈnën kletiɛn ˗nu ˗bha ˗zlanwokɔdhi ˗gɔ ˈˈdhiʋ̈. (Efɛzö 5:23) ꞊Dɛɛ, Yesu ˗yö ˗ya dhaŋ˗ ˈgü ˈö bɔ ‹gwëëmi ˗towotasü ˈö ꞊kpaɔsü› ˗a ˗ta ˈö ˈˈdhiʋ̈sü ö ˗bha gwëëˈˈ ˗nu ˈka. (Matiö 24:45 ˗wo pö.) ˗A «gwëëmi» ˈö bhë ˗kɔmɔnwɔnbhasü ˈbhaa ˗ya ˗gɔ, ˗a ˗gɛn ˗mü ꞊dhɛ Yesu yöö ꞊dede ˈnën ˈö˗ ˗ya. ˈˈKɛɛ ˈkö ˗kë ˈˈdhʋ̈ ˗yö ˈwɔnman ˗a ˗ta, ˈö go mü ˈzü ˈö ö ꞊dhegblü ˗nu ˈˈdhiʋ̈ʒiöwo. ˗A gwëëmi ˈö ˈˈdhʋ̈ de ˗mü? ˗Yö ö ˗zokë kwa ˈˈpiʋ̈ ˗kɔ ˗kë ꞊dhɛ?

1. De ˈö ˗tɔ ‹gwëëmi ˗towotasü ˈö ꞊kpaɔsü›?

ˈÖ˗ ˗bhɔ ˈˈdhʋ̈ ꞊kwɛŋzü Zoova ˗yö ˗bɔ mɛn do ɛɛnˈˈ mɛn kpönën ˈdɛdɛ ˗ta ˈö ˈˈdhiʋ̈sü ö ˗dhɔkëmɛn ˗nu ˈka. (Malachie 2:7; Eblö 1:1) ˈDhɛ ˈö Yesu ˗yö ga, ˗a ˗bha bɔmɛn ˗nu waa mɛn zii ˗nu ˈwo kun Zedhizadhɛmö, wo ˈnën ˈwo kun ˈˈdhiʋ̈sü ˗ni ˈgü ˗zlanwokɔdhi ˈka. (Këwɔn ˗nu 15:2) ꞊Dɛɛ ˈpö, mɛn zii ˗nu kpönën ˈö ˈwo ˗kë Zoova ˗bha ꞊Gbɛkiö ˗nu ˈˈdhiʋ̈ʒiöwomɛn ˈka, wo ˈnën ˈwo ˗zuu ˈgü ˗bhöpë nu kwa ˗dhɛ, ˈö ˈwo ˈˈdhiʋ̈sü ˗zlanwopösü ˈka. Mɛn kpönën ˈwo bhë, wo ˈnën ˈwo ˗tɔ ‹gwëëmi ˗towotasü ˈö ꞊kpaɔsü [ˈö Yesu] ˗ya ˗ya.› (Matiö 24:45) Kwa ˈˈdhiʋ̈ʒiöwomɛn ˗nu ˈwo bhë, ˗Zlan ˗yö ˗bɔ ˗zuu ˈˈslʋ̈ʋ̈slʋ̈ ˗ta ˈö ö ˗kɔ ˗yɛ ˗an ꞊gban ˈˈpɛpɛ ˗bha. ˗Wa ga, ˗wo ˗dho dhaŋ˗ ˈgü kö waa Yesu ˗nu ˗wo ˗gblüdëdhɛ kë.

2. ˗Mën ˈö ˗tɔ ˗zuu ˈgü ˗bhöpë ˈö gwëëmi ˗towotasü ˗ya nu kwa ˗dhɛ?

Yesu ˗ya ˗pö gwëëmi ˗towotasü ˈö ꞊kpaɔsü ˗yö ˗dho «˗bhöpë nu˗ [ö ˗bha gwëëˈˈ ˗nu] ˗dhɛ ˗a nu ˈˈtʋ̈ng ˗bha.» (Matiö 24:45) ˈKwa ˗bhöpë ˗bhö, ˗yö ꞊faan ˗nu kwa ˗dhɛ ˈö ˈkwa ˗kë kwa ˈflëëgü. ˗Kɔ do ˈö bhë ˗a ˈka, ˗zuu ˈgü ˗bhöpë ˈö ˗kë ꞊klaŋwo ˗nu ˈwo ˗gban ˗Zlan ˈˈDhiwo ˗ta ˗an ˈka bhë, ˗wo ꞊faan ˗nu kwa ˗dhɛ kö ˈkwa ˈto ˗klu ˗sü ˈka Zoova ˗bha, kö yö ˈö Yesu ˗ya ˈˈklɔɔnbho kwa ˗bha bhë ˈkwa˗ kë. (1 Timote 4:6) Kwa ˗bha ˗bhɔkwëë ˈsɛɛn˗ ˗nu, ˗bhɔkwëë ˈˈgblʋ̈gblʋ̈ ˗nu, kwa ˗bha ˈsëëdhɛ ˗nu ɛɛnˈˈ video ˗nu ˈö ˈwo ˗gban Biblö ˗ta, ˈö ˈwo kwa ˗takun kö ˈkwa ˗Zlan dhɔɔbhaawɔn dɔ kö kwa˗ ˗nu kwa ˗bha ˈˈtɔŋdëdhɛ ˗yö kë ˈˈgbɩɩ˗ bhë, wo ˈnën ˈö ˈkwa bɔ ˗an ˗ta ˈö ˈkwa ˗bhöpë ˈö bhë ˗an ꞊slɔɔ.

 ˗KAA ˈˈPIƲ̈ ˈPƆN

3. Zoova ˗dhɔkëmɛn ˗nu dua ˗mü kö ˗wo yökë wo ˈkwëë˗ ˗së ˈka.

Yesu ˗yö ˗bɔ Zoova ˗bha ꞊Gbɛkiö ˗nu ˈˈdhiʋ̈ʒiöwomɛn ˗nu ˗ta ˈö ˈˈdhiʋ̈sü ˗an ˗bha yö ˗nu ˈka. ˗Kɔ do ˈö bhë ˗a ˈka ˈyö Yesu ˗yö ˈˈdhiʋ̈sü kletiɛn ˗blɛɛsü ˗nu ˈö ˈwo kun ꞊kwɛŋzü ˗an ˈka. ˗Kaa VIDEO ˗ga.

˗Ka 1 Kodhɛngtö 14:33, 40 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

• Biblö ˈˈɲan ˗nu ˈwo bhë, ˗wa ˗zɔn ˗kɔ ˗kë ꞊dhɛ ꞊dhɛ Zoova ˗ya ˈˈpiʋ̈ kö ö ˗bha ꞊Gbɛkiö ˗nu ˗wo yökë wo ˈko ˈˈpiʋ̈ ˗së ˈka ꞊dhɛ ˗kɔlokota do ˈgümɛn ˗nu ˈdhö?

4. Gwëëmi ˗towotasü ˗yö ˈˈdhiʋ̈sü kwa ˗bha ˗zlanwopö ˗yö ˈka.

Yö ˈö˗ ˗wɔn ˗yö kun ˈˈgbɩɩ˗ kletiɛn ˗blɛɛsü ˗nu ˗gɔ ˈö ˈwo˗ ˗kë wo ꞊faan ˈka ˈyö ˗tɔ ˗zlanwopösü. ˗Ka Këwɔn ˗nu 8:14, 25 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• Kletiɛn ˗nu ˈwo kun ꞊kwɛŋzü ˗an ˗bha ˈˈtʋ̈ŋ ˈgü, de ˈö ˈˈdhiʋ̈sü ˗zlanwopö ˗yö ˈka?

• ˈDhɛ ˈö bɔmɛn ˈˈwɛɛ ˗nu ˈwo to ˗wo Piɛdhö waa Zan ˗an bɔ, ˗mën ˈwo˗ ˗kë?

Yö ˗wɔngbɩɩsü ˈö kwa ˈˈdhiʋ̈ʒiöwomɛn ˗nu ˗wo ˈˈdhiʋ̈sü ˗a ˈka ˈyö ˗tɔ ˗zlanwopösü. ˗Kaa VIDEO ˗ga.

 Yesu ˗ya ˗zɔn ꞊dhɛ ˗zlanwopösü ˗wɔn ˗yö ˈˈgbɩɩ˗. ˗Ka Makö 13:10 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• ˈMën ˗kë ˈö ˗zlanwopösü ˗wɔn ˈdhö ˈˈgbɩɩ˗ kwa ˈˈdhiʋ̈ʒiöwomɛn ˗nu ˗gɔ?

• ˗Zlanwopö ˗yö ˈö ˈˈkpɔnŋtaadhɛ ˗todhʋ̈sü ˈgü bhë, ˈmën ˗kë ˈö ‹gwëëmi ˗towotasü ˈö ꞊kpaɔsü› ˗a dua ˈdhö ˗mü kö ˗yö ˈˈdhiʋ̈sü ˗a ˈka?

5. Gwëëmi ˗towotasü ˗yö ˗dhioo ˗nu ˗dɔ kwa ˗ta.

Kwa ˈˈdhiʋ̈ʒiöwomɛn ˗nu ˗wo ˗dhioo ˗dɔ Zoova ˗dhɔkëmɛn ˈˈpɛpɛ ˈö ˈkwa ˈˈkpɔnŋtaadhɛ ˗todhʋ̈sü ˈgü kwa ˗ta. ˗Wo ˗gban ˗mën ˗ta ˈö ˈwo ˗dhioo ˗nu bhë ˗an dɔ kwa ˗ta? ˗Kɔ ˈö kletiɛn ˗nu ˈwo kun ꞊kwɛŋzü ˗an ˈˈdhiʋ̈ʒiöwomɛn ˗nu wo kun ˗a kë ˗ni ˈgü ˗a ˈka, ˗kwaa ˗ga. ˗Ka Këwɔn ˗nu 15:1, 2 ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• ˗Mën ˈö kletiɛn ˗blɛɛsü ˗nu ˈwo kun ꞊kwɛŋzü ˗an ˗wo yö ˈti kë ˗a ˗bha do?

• De ˈö Pɔdhö, Baanabasö waa mɛn ˈˈwɛɛ ˈbhaa ˗nu ˈwo dho ˗an ˈˈpiʋ̈ kö ˈwɔn ˈö bhë ˗wa ˈˈɲanbhɔ?

˗Ka Këwɔn ˗nu 15:12-18, 23-29 ˗an ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

• ˈMën kletiɛn ˗nu ˈˈdhiʋ̈ʒiöwomɛn ˗nu ˈwo bhë ˈwo˗ ˗kë kö ˗Zlan ˗yö ˗gleŋ ˗da ˗an ˗bha?—˗Ka kpɔɔˈˈ ˗a ˈˈɲan ˈsɛɛn˗ 12, 15, waa˗ 28 ˗bha.

˗Ka Këwɔn ˗nu 15:30, 31 waa 16:4, 5 ˗an ˗wo pö, kö ˈka dhɛɛˈˈ ˗nu ˈwo yö ˗an ˗yɔ mɛɛnˈˈ:

• Kletiɛn ˗nu ˈwo kun ꞊kwɛŋzü bhë, ˈdhɛ ˈwo ˗dhioo ˈö ˗an ˈˈdhiʋ̈ʒiöwomɛn ˗nu ˗wa dɔ ˗a man, ˈmën ˈwo˗ ˗kë?

• ˈDhɛ ˈwo ˗dhioo bhë ˗a ˗ya ꞊bhlëë ˈgü, Zoova ˗yö ˈdhuëë˗ ˗kpɔ ˗an ˗bha ˗kɔ ˗kë ꞊dhɛ?

˗Ka 2 Timote 3:16 waa Zakö 1:5 ˗wo pö, kö ˈka dhɛɛˈˈ ˈö yö ˗a ˗yɔ mɛɛnˈˈ:

• ˈMën ˈö ˈˈdhiʋ̈sü kwa ˈˈdhiʋ̈ʒiöwomɛn ˗nu ˈka ꞊dɛɛ ˈö ˈwo ˈwɔn ˗nu ˗kë?

 ˗A ˈDHƐ TO KWA ˈˈƝAAN

Kwa ˈˈdhiʋ̈ʒiöwomɛn ˗nu ˈnën ˈwo ˗tɔ ‹gwëëmi ˗towotasü ˈö ꞊kpaɔsü› ˈö Yesu ˗ya ˗ya. ˗Yö ˈˈdhiʋ̈sü Zoova ˗dhɔkëmɛn ˗nu ˈö ˈkwa ˈˈkpɔnŋtaadhɛ ˗todhʋ̈sü ˈgü kwa ˈka, ˈö ˗zuu ˈgü ˗bhöpë nu kwa ˗dhɛ.

˗Zobuödhe

• ˈDe ‹gwëëmi ˗towotasü ˈö ꞊kpaɔsü› ˗a ˗ya?

• Kwa ˈˈdhiʋ̈ʒiöwomɛn ˗nu ˗wo wo ˗zokë kwa ˈˈpiʋ̈ ˗kɔ ˗kë ꞊dhɛ?

• Ü ˈdhaŋ˗ bho ˗sü ˈka ˗a ˈˈdhiʋ̈ ꞊dhɛ kwa ˈˈdhiʋ̈ʒiöwomɛn ˗nu ˈnën ˈwo ˗tɔ ‹gwëëmi ˗towotasü ˈö ꞊kpaɔsü› ˗ee?