Yezu la a Krista lantaapuoruu Zusoba. (Efesu 5:23) Yezu be la sazuŋ pampana ŋa, kyɛ o maŋ tu la “a gbaŋgba-bivelaa ane yɛmbaŋna” zie a kyɛ de sowuli korɔ o potuuribo naŋ be a teŋɛzuŋ. (Kanne Matio 24:45.) Yezu meŋɛ la kaa iri a “gbaŋgbaa” ŋa. Azuŋ te na baŋ yeliŋ ka a gbaŋgbaa ŋa taaɛ kpeɛ̃o fẽẽ, kyɛ o naŋ e la gbaŋgbaa a ko Yezu a kyɛ tonɔ korɔ Yezu yɔɔmine meŋ. Nembuo la a gbaŋgbaa ŋa? Sobuo ka a gbaŋgbaa ŋa maŋ tu kyɛ kaara Yezu potuuribo na?

1. Nembuo la “a gbaŋgba-bivelaa ane yɛmbaŋna”?

Jehoova maŋ tu la dɔɔyeni kaŋa zie, kyɛbee dɔbɔ bawala mine zie kyɛ de sowuli korɔ o puorebiiri. (Maalakai 2:7; Hiburu 1:1) Yezu kũũ puoreŋ, a bitontonee ane a lantaapuoruu nembɛrɛ naŋ da be Gyɛruzɛlɛm la da derɛ Yezu potuuribo na weɛ. (Toma 15:2) Zenɛ ŋa meŋ, Jehoova Sieree Deme Lantaa Zukaareba na la derɛ sowuli korɔ Yezu potuuribo. Ba e la a lantaapuoruu nembɛrɛ bawala mine naŋ maŋ de Baabole poɔ wuluu naŋ soma a korɔ te, a kyɛ lɛ wulo te sori a kyaare lɛ teŋ na toɔ̃ tonɔ a naaŋ moɔloo toma soŋ. A noba ŋa la “a gbaŋgba-bivelaa ane yɛmbaŋna ka [Yezu]” kaa iri na. (Matio 24:45a) Noba naŋ e a Lantaa Zukaareba e la Kristabiiri Jehoova naŋ de o vooroŋ soŋ na kaa iri ba ka ba te poɔ Yezu eŋɛŋ ka ba ne o di Naaloŋ sazuŋ. Azuŋ, ka ba naŋ wa kpi, Jehoova na seŋ baŋ ka ba iri gaa sazu.

2. Bo Baabole poɔ wuluu la ka a gbaŋgba-bivelaa maŋ korɔ te?

Yezu yeleeŋ ka a gbaŋgba-bivelaa na korɔ la “ba [Kristabitaaba] bondirii a saŋa na a naŋ seŋ ne.” (Matio 24:45b) Ka teneeŋ dire bondirii naŋ soma, a maŋ vɛmeŋ teŋ taa faŋa ane laafeeloŋ naŋ soma. Lɛ neŋ o zu la, a Baabole poɔ wuluu maŋ toɔ̃ eŋ teŋ faŋa teŋ naŋ dire yelmennoŋ a korɔ Jehoova, a kyɛ lɛ moɔ̃ niŋe meŋ tonɔ a naaŋ moɔloo toma na Yezu naŋ ko te ka te tonɔ na. (1 Timoti 4:6) Te maŋ nyɛɛ a Baabole poɔ wuluu ŋa saŋa na teŋ wa gaa te lammore, te lammobilii ane te lammobɛrɛ. Te maŋ lɛ nyɛɛ a wuluu ŋa meŋ a yi gama na baŋ maŋ kaa a Baabole poɔŋ kyɛ maale na. Vidiori na baŋ maŋ maale na maŋ soŋ teŋ teŋ erɛ yɛlɛ Naaŋmen naŋ boɔrɔ, a kyɛ lɛ vɛŋ ka te ne o niiloŋ na maaleŋ e kpeɛŋaa.

 ZANNE YƐLƐ YAGA POƆ

3. A fɛrɛɛ la ka ba sɛgre Jehoova puorebiiri

Saŋa na Krista puoruu naŋ da piili na, Yezu da kaa iree dɔbɔ mine naŋ da e Lantaa Zukaareba baŋ wulo o potuuribo sori. Zenɛ ŋa meŋ, a Lantaa Zukaareba la derɛ sowuli korɔ Jehoova puorebiiri zaa naŋ be a donɛɛ lombori zaa. Ŋmɛ a VIDIO.

Kanne 1 Korinti 14:33, 40, a kyɛ gyieli a soorebiri ŋa yɛlɛ:

• Bo yɛlɛ hoŋ nyɛ a Baabole sɛgre ŋa poɔŋ aŋ vɛŋ hoŋ baŋ ka Jehoova boɔrɔŋ ka ba sɛgre o Sieree Deme na soŋ zaa?

4. A gbaŋgba-bivelaa maŋ sɛgrɛɛ te naaŋ moɔloo toma na

A dɛndɛŋ Kristabiiri na da de la a naaŋ moɔloo toma nimizeɛ yaga zaa. Kanne Toma 8:14, 25, a kyɛ gyieli a soorebie ŋa yɛlɛ:

• Saŋa na Krista puoruu naŋ wa piili na, nembuoŋ da de sowuli korɔ ba a kyaare lɛ naŋ seŋ ka ba tonɔ a naaŋ moɔloo toma?

• Saŋa na a bitontonee naŋ da de sowuli ko Piita ane Gyɔɔn na, wala baŋ da e ba yɛlɛ?

A naaŋ moɔloo toma la toma naŋ e nimizeɛ yaga zaa a ko a Lantaa Zukaareba. Ŋmɛ a VIDIO.

 Yezu da vɛŋɛɛŋ teŋ baŋ ka a naaŋ moɔloo toma la toma naŋ e nimizeɛ yaga zaa a gaŋ toma zaa. Kanne Marko 13:10, a kyɛ gyieli a soorebie naŋ tu na yɛlɛ:

• Bonso ka a Lantaa Zukaareba de a naaŋ moɔloo toma nimizeɛ yaga zaa lɛ?

• Bonso aŋ fɛre ka “a gbaŋgba-bivelaa ane yɛmbaŋna” sɛgre a naaŋ moɔloo toma soŋ, ka lɛ vɛŋ ka te toɔ̃ moɔle a duorisoŋ a tendaa lombori zaa?

5. A gbaŋgba-bivelaa la maŋ de sowuli korɔ Yezu potuuribo

A Lantaa Zukaareba la maŋ de sowuli korɔ Kristabiiri naŋ be a donɛɛ lombori zaa. Bo yɛlɛŋ maŋ toɔ̃ soŋ ba baŋ de sowuli naŋ seŋ neŋ a korɔ te? Vɛŋ ka te nyɛ lɛ a lantaa zukaareba naŋ da maŋ de sowuli ko a dɛndɛŋ Kristabiiri na. Kanne Toma 15:1, 2, a kyɛ gyieli a soorebie ŋa yɛlɛ:

• Bo yɛlɛ la da waana neŋ nɔkpeɛne a dɛndɛŋ Kristabiiri na kpakyagaŋ?

• Aŋ mine zie ka bitontona Pɔɔl, Banabase ane ba taaba na da gaa te bɔ sowuli?

Kanne Toma 15:12-18, 23-29, a kyɛ gyieli a soorebiri ŋa yɛlɛ:

• Sɛre ka a dɛndɛŋ Kristabiiri lantaa zukaareba na de gbɛre na, bo yɛlɛ baŋ maŋ daŋ e a de bɔ Naaŋmen teɛroŋ a kyaare a yɛlɛ?​—Kaa o wɛlbo 12, 15, ane 28.

Kanne Toma 15:30, 31 ane 16:4, 5, a kyɛ gyieli a soorebie ŋa yɛlɛ:

• Saŋa na a dɛndɛŋ Kristabiiri naŋ da nyɛ sowuli yi a lantaa zukaareba zieŋ na, wala baŋ da e ba yɛlɛ?

• Saŋa na baŋ da sage a lantaa zukaareba noɔre na, bo maaloo baŋ da nyɛ?

Kanne 2 Timoti 3:16 ane Gyimisi 1:5, a kyɛ gyieli a soorebiri ŋa yɛlɛ:

• Zenɛ ŋa, ka a Lantaa Zukaarebaŋ wa boɔrɔ ka ba de gbɛre a kyaare yelkaŋa, aŋ zie baŋ maŋ gaa a te bɔ sowuli?

 A ZANNOO YELNIMIZEERE

A Lantaa Zukaareba la “a gbaŋgba-bivelaa ane yɛmbaŋna” Yezu naŋ kaa iri na. Ba maŋ de la Baabole poɔ wuluu ane sowuli korɔ Kristabiiri naŋ be a tendaa lombori zaa.

Bo Hoŋ Zanne

• Nembuoŋ kaa iri “a gbaŋgba-bivelaa ane yɛmbaŋna”?

• Wala ka a Lantaa Zukaareba maŋ e a toɔ̃ kaara te zu velaa zaa?

• Ho sagedieŋ ka a Lantaa Zukaareba la “a gbaŋgba-bivelaa ane yɛmbaŋna”?