TOLI 54

Sama na a ‘koni saafu di u sa fitoow’?

PEE

A Yesesi na a ede fu a kemeente (Efeisesama 5:23). Nownow Yesesi de a hemel, ma a poti a ‘koni saafu di u sa fitoow’ fu tii den bakaman fi en a goontapu ya. (Leisi Mateyesi 24:45.) Yesesi gi a ‘saafu’ ya a faantiwowtu fu teke son bosoloiti gi a foluku fu Gadu, ma toku a saafu mu saka enseefi a Yesesi ondoo. A mu gi den salufu Kelesten san den abi fanowdu tu. Sama na a saafu ya? Fa a saafu ya e gi u san wi abi fanowdu?

1. Sama na a ‘koni saafu di u sa fitoow’?

Ala yuu Yehofa e poti wan pikin kulu man fu tii a foluku fi en (Maleyaki 2:7; Hebrewsama 1:1). Baka di Yesesi dede a den apostel anga den owluman aini Yelusalem be e teke fesi (Toli fu den apostel 15:2). Na aseefi sani e pasa aini a ten ya. A wan pikin kulu owluman e tii a wooko a hii goontapu. We kai den baala ya, ‘den baala di e tii a wooko fu Yehofa Kotoigi a hii goontapu’. A den baala ya na a koni saafu di u sa fitoow di Yesesi poti fu tii den bakaman fi en. Den baala ya e gi u leli. A den e seeka a peleikiwooko tu (Mateyesi 24:45a). Ala den baala ya a salufu Kelesten. Baka te den dede, den o go a hemel fu tii makandaa anga Yesesi.

2. Fa a koni saafu e gi u leli?

Yesesi be taki a koni saafu be o ‘gi den bakaman fi en nyanyan na a ten di den abi en fanowdu’ (Mateyesi 24:45b). A nyanyan ya a den leli di den e gi wi anga yeepi fu a Wowtu fu Gadu. Nyanyan a wan sani di e gi u kaakiti. Ai yeepi u fu de gusontu. A letiso den sani di we leli aini Beibel e yeepi u fu du sani enke fa Yehofa wani. Den e gi u taanga-sikin fu du a wooko di Yesesi gi u tu (1 Timotiyesi 4:6). A omen sani we leli a den komakandaa, den kelen-komakandaa anga den konkelesi. A koni saafu di u sa fitoow e meke omen felon anga buku di e yeepi u fu kon sabi san Yehofa wani u du. Den sani ya e yeepi u tu fu wi anga Yehofa toon bun mati.

LUKU A TOLI YA MOO FINI

Wo si saide wi abi a koni saafu di u sa fitoow fanowdu.

Den baala di e tii a wooko e gi Yehofa Kotoigi a hii goontapu leli. Den e seeka sani fu a peleikiwooko sa du bun. Den e yeepi den baala anga sisa di de a nowtu tu

3. A foluku fu Yehofa nai du sani buuyabuuya

Yesesi poti wan pikin kulu baala fu tii a wooko fu Yehofa Kotoigi. Na aseefi fasi Yesesi be e tii den fosi Kelesten. Pee a FELON.

FELON: Yehofa e seeka a foluku fi en (6:18)

Leisi 1 Korentesama 14:33, 40, da i luku efii poi piki a akisi ya:

Fa den tekisi ya e soi taki Yehofa á wani a foluku fi en du sani buuyabuuya?

4. A koni saafu e seeka sani fu a peleikiwooko du a hii goontapu

Den fosi Kelesten be e si a peleikiwooko enke a moo pelensipali wooko di den mu du. Leisi Toli fu den apostel 8:14, 25, da i luku efii poi piki den akisi ya:

Sama be e seeka sani fu a peleikiwooko be man du aini a ten fu den fosi Kelesten?
San Peitilisi anga Yohanisi du, di den taa apostel sende den go a Samaliya?

A peleikiwooko na a moo pelensipali wooko di den baala di e tii a wooko e seeka. Pee a FELON.

FELON: Den e si a peleikiwooko enke a moo pelensipali wooko (1:24)

Yesesi soi u taki a peleikiwooko a wan pelensipali sani di u mu du. Leisi Malikisi 13:10, da i luku efii poi piki den akisi ya:

Saide den baala di e tii a wooko e si a peleikiwooko enke wan pelensipali sani?
Saide wi abi ‘a koni saafu di u sa fitoow fanowdu’ fu man du a peleikiwooko a hii goontapu?

5. A koni saafu e tii a foluku fu Gadu

A wan pikin kulu baala e tii a wooko fu Yehofa Kotoigi a hii goontapu. Fa den baala ya e du man sabi san den mu du? Luku fa den baala di be e tii a wooko na a ten fu den apostel be e du sabi san Yehofa wani den du. Leisi Toli fu den apostel 15:1, 2, da i luku efii poi piki den akisi ya:

Sowtu polobelema son kemeente fu a ten fu den fosi Kelesten be abi?
Pe Pawlesi anga Barnabas be go fu losi a polobelema ya?

Leisi Toli fu den apostel 15:12-18, 23-29, da i luku efii poi piki a akisi ya:

San be yeepi den baala di e tii a wooko fu be man du sani enke fa Yehofa wani?—Luku vers 12, 15, anga 28.

Leisi Toli fu den apostel 15:30, 31 anga 16:4, 5, da i luku efii poi piki den akisi ya:

San den fosi Kelesten du di den yee san den baala di e tii a wooko taki?
Fa Yehofa belesi den di den du sani enke fa den baala di e tii a wooko taki?

Leisi 2 Timotiyesi 3:16 anga Yakowbesi 1:5, da i luku efii poi piki a akisi ya:

San den baala di e tii a wooko aini a ten ya e du fosi den teke wan bosoloiti?

SON SAMA E TAKI: ‘Efu a san den baala di e tii a wooko e taki ye du, da a libisama ye aliki.’

Saide ye biibi taki den baala di e tii a wooko e du sani enke fa Yesesi wani?

SAI LELI?

A den baala di e tii a wooko na ‘a koni saafu di u sa fitoow’. A Kelestesi poti den fu teke fesi. A den e tii a wooko fu Yehofa Kotoigi a hii goontapu. A san Beibel taki den e leli u.