Yesu nde e mulopo ma mwemba. (Efeso 5:23) We̱nge̱, la mo̱ń, Yesu a madie̱le̱ bokwedi bao be o wase tongwea na “mūt’a jemea na jangwa.” (Langa Mateo 24:45.) Kana Yesu mo̱me̱ne̱ nde a te̱se̱ mo̱, nu mūtu a be̱n doi la byanedi diwo̱ te̱nge̱; nde angame̱n te̱ nde sengane̱ Kristo, a bolea pe̱ bonasango a Kristo. Nja ńe nu mūtu e? Ne̱ni pe̱ a mabongwano̱ biso̱ e?

1. Nja ńe “mūt’a jemea na jangwa” e?

Ponda ye̱se̱, Yehova a bolane̱ nde moto mō̱ to̱ son a dibo̱to̱ la bato o die̱le̱ tumba lao. (Maleaki 2:7; Bonahebe̱r 1:1) Ombusa kwed’a Yesu, bamuloloma na batudu ba ta o Yerusalem nde ba ta ba die̱le̱ mwemba. (Bebolo 15:2) We̱nge̱ pe̱, son a dibo̱to̱ la batudu di mabelabe̱ ná Dibe̱le̱ di Madie̱le̱ la Mboṅ a Yehova, nde di mabole̱ da la mudī, di die̱le̱ pe̱ ebol’a dikalo. Di dibo̱to̱ nde le “mūt’a jemea na jangwa, ńena [Yesu] a te̱se̱no̱.” (Mateo 24:45a) Belongi be̱se̱ ba Dibe̱le̱ di Madie̱le̱ be nde kriste̱n yo̱kisabe̱; ba menge̱le̱ na muńe̱nge̱ ná bale janea o mo̱ń na Kristo o su la longe̱ labu o wase.

2. Nje ye da la mudī mūt’a jemea na jangwa a mabolano̱ e?

Yesu a kwali ná mūt’a jemea na jangwa a me̱nde̱ “bola [yine̱ kriste̱n] da o ponda ńangame̱n.” (Mateo 24:45b) Da di madano̱ di mongwane̱ ná ńol’asu e be̱ ngińa, di be̱ne̱ pe̱ ja la bwam. Da la mudī pe̱, lena le nde belēdi be mawe̱ o Eyal’a Loba, di mabola biso̱ ngińa ni mapule̱ ná di tike be̱ Yehova jemea, di bole pe̱ ebolo Yesu a bake̱no̱ biso̱. (1 Timoteo 4:6) Di makusa nde di da la mudī tongwea na ndongame̱n, mako̱to̱ne̱ mande̱ne̱ na masadi, kalati i se̱medi o Bibe̱l na sinima, bena ba mongwane̱ biso̱ o so̱ṅtane̱ jemea la Loba na o jouse̱ mulatako masu na mo̱.

 ALA O NJIBA

3. Baboledi ba Yehova bangame̱n bola ebolo mwemba

Owas’a bediedi ba Yesu, Dibe̱le̱ di Madie̱le̱ di madie̱le̱ bebolo ba Mboṅ a Yehova. Nika pe̱ nde mambo ma tano̱ ma tomba na kriste̱n ya ebwe’a mbu yaboso. Ombwa SINIMA.

Langa 1 Korinto 14:33, 40, nde lo kwaleye pe̱ ońola min myuedi:

• Ne̱ni min myemba mi malee̱no̱ ná Yehova a mapula ná baboledi bao ba bole ebolo mwemba e?

4. Mūt’a jemea na jangwa a madie̱le̱ ebol’a dikalo

Ebol’a dikalo nde e ta ebol’a mweńa buka be̱se̱ kriste̱n yaboso i tano̱ i bola. Langa Bebolo 8:14, 25, nde lo kwaleye pe̱ ońola min myuedi:

• Oteten a kriste̱n yaboso, nja nu ta nu bola bediedi ońol’ebol’a dikalo e?

• Nje Petro na Yohane ba bolino̱ ponda bane̱ bamuloloma ba bolino̱ babo̱ bediedi e?

Ebol’a dikalo nde ye ebolo ye mweńa buka be̱se̱ Dibe̱le̱ di Madie̱le̱ di madie̱le̱no̱. Ombwa SINIMA.

 Yesu a lee̱ ná ebol’a dikalo ye mweńa jita. Langa Marko 13:10, nde lo kwaleye pe̱ ońola min myuedi:

• Ońola nje ebol’a dikalo yeno̱ mweńa jita ońola Dibe̱le̱ di Madie̱le̱ e?

• Ońola nje e mapulano̱ ná “mūt’a jemea na jangwa” a die̱le̱ y’ebolo e mabolane̱ o wase ńe̱se̱ e?

5. Mūt’a jemea na jangwa a mabola bediedi

Dibe̱le̱ di Madie̱le̱ di mabola kriste̱n ya wase ńe̱se̱ bediedi. Ne̱ni di mano̱ngo̱no̱ bedomsedi e? Jombweye ne̱ni dibe̱le̱ di madie̱le̱ la kriste̱n yaboso di tano̱ di bola. Langa Bebolo 15:1, 2, nde lo kwaleye pe̱ ońola min myuedi:

• Nje e ta e wana bwambo oteten a kriste̱n yaboso e?

• Omboa ba nja Paulo, Barnabas na bane̱ balono̱ baise̱ bediedi ońola bo bwambo e?

Langa Bebolo 15:12-18, 23-29, nde lo kwaleye pe̱ ońola min myuedi:

• Nje dibe̱le̱ di madie̱le̱ di bolino̱ ná Loba a die̱le̱ bedomsedi bao ońola bo bwambo e?—Ombwa myemba 12, 15 na 28.

Langa Bebolo 15:30, 31 na 16:4, 5, nde lo kwaleye pe̱ ońola min myuedi:

• Ne̱ni kriste̱n yaboso i kasino̱ bediedi dibe̱le̱ di madie̱le̱ di bolino̱ e?

• Ne̱ni Yehova a namse̱no̱ sengane̱ labu e?

Langa 2 Timoteo 3:16 na Yakobo 1:5, nde lo kwaleye pe̱ ońola min myuedi:

• We̱nge̱, owe̱ni Dibe̱le̱ di Madie̱le̱ di mawasano̱ bediedi ke̱ di mano̱ngo̱ bedomsedi e?

 EBONGOLO

Dibe̱le̱ di Madie̱le̱ nde le “mūt’a jemea na jangwa” ńena Kristo a te̱se̱no̱. Di mabola kriste̱n ya wase ńe̱se̱ bediedi na da la mudī.

Ndimbisedi

• Nja nu te̱se̱ “mūt’a jemea na jangwa” e?

• Ne̱ni Dibe̱le̱ di Madie̱le̱ di mabongwano̱ biso̱ e?

• Mo̱ o dube̱ ná Dibe̱le̱ di Madie̱le̱ nde le “mūt’a jemea na jangwa” e?