UKPEPN̄KPỌ 54
Se “Ofụn Emi Anamde Akpanikọ Onyụn̄ Enyenede Ọniọn̄” Esinamde
Jesus edi ibuot esop Abasi. (Ephesus 5:23) Idahaemi, enye etie ke heaven anam “ofụn emi anamde akpanikọ onyụn̄ enyenede ọniọn̄” ada ata ikọt Abasi mi ke isọn̄ usụn̄. (Kot Matthew 24:45.) Ẹnọ “ofụn” emi odudu ndinam ndusụk n̄kpọ sia Jesus ekemek enye ikpọn̄ ke idemesie. Edi ana ofụn emi osụk edi ofụn Christ onyụn̄ esinam n̄kpọ nnọ nditọete Christ. Anie edi ofụn oro? Didie ke ofụn oro ese aban̄a nnyịn?
1. Anie edi “ofụn emi anamde akpanikọ onyụn̄ enyenede ọniọn̄”?
Toto ke eset, Jehovah esisụk ada owo kiet m̀mê ibat ibat owo ifan̄ ada ikọt esie usụn̄. (Malachi 2:7; Mme Hebrew 1:1) Ke Jesus ama akakpa, mme apostle ye mbiowo ke Jerusalem ẹkeda ikọt Abasi usụn̄. (Utom 15:2) Ukem ntre mfịn, mbiowo ifan̄—Otu Emi Ẹsede Ẹban̄a Utom Mme Ntiense Jehovah—ẹsikụt ẹte ke ata ikọt Abasi ẹnyene ikọ Abasi ẹkpep; kpa mmọ ẹnyụn̄ ẹda usụn̄ ke utom ukwọrọikọ nnyịn. Otu emi edi “ofụn emi anamde akpanikọ onyụn̄ enyenede ọniọn̄ emi [Jesus] ekemekde.” (Matthew 24:45a) Kpukpru mbon otu oro ẹdi mme Christian oro ẹyetde aran—kpukpru mmọ ẹsịne ke otu mbon emi Abasi emekde ete ẹditienede Christ ẹkara ke heaven, mmọ ẹma ẹkụre utom mmọ mi ke isọn̄.
2. Ewe udia ke ofụn emi anamde akpanikọ esinọ nnyịn?
Jesus ọkọdọhọ ke ofụn emi anamde akpanikọ “ọnọ [mme Christian nte enye] udia ke nnennen ini.” (Matthew 24:45b) Udia esifọn owo ke idem onyụn anam idem ọsọn̄ owo. Se isikpepde ke Ikọ Abasi onyụn̄ etie nte udia—ẹsinọ nnyịn odudu, anam isọn̄ọ ida ye Jehovah, inyụn̄ ika iso inam utom emi Jesus ọkọnọde nnyịn ete inam. (1 Timothy 4:6) Imesikpep mme n̄kpọ emi onyụn̄ etiede mi nte udia ke mme mboho ikọ Abasi nnyịn ye ke mme n̄wed ye vidio ikọ Abasi nnyịn. Se isikpepde esin̄wam nnyịn idiọn̄ọ Ikọ Abasi inyụn̄ inen̄ede ikpere Abasi.
SỊN IDEM KPEP
Se ntak ọfọnde inyene “ofụn emi anamde akpanikọ onyụn̄ enyenede ọniọn̄”—Otu Emi Ẹsede Ẹban̄a Utom Mme Ntiense Jehovah.
Otu Emi Ẹsede Ẹban̄a Utom Mme Ntiense Jehovah ẹsikpep Mme Ntiense Jehovah Ikọ Abasi, ẹtịn̄ se ẹkpenamde, ẹnyụn̄ ẹn̄wam mmọ
3. Ana ikọt Jehovah ẹnyene esop
Jesus esin̄wam Otu Emi Ẹsede Ẹban̄a Utom Mme Ntiense Jehovah ẹnam utom mmọ. Jesus ekesinyụn̄ an̄wam otu emi ẹkesisede ẹban̄a utom mme Christian ke eyo mme apostle. Se VIDIO emi.
Kot 1 Corinth 14:33, 40, ekem ẹbọrọ mbụme emi ẹnyụn̄ ẹneme ẹban̄a enye:
-
Didie ke itie Bible emi owụt ke Jehovah oyom ikọt esie ẹnyene esop?
4. Ofụn emi anamde akpanikọ ada iso ke utom ukwọrọikọ nnyịn
Ukwọrọikọ ekedi akpan utom mme Christian ke eyo mme apostle. Kot Utom 8:14, 25, ekem ẹbọrọ mbụme emi ẹnyụn̄ ẹneme ẹban̄a mmọ:
-
Mmanie ẹkeda usụn̄ ke utom ukwọrọikọ ke eyo mme apostle?
-
Peter ye John ẹkeda didie se mme apostle oro ẹkedade usụn̄ ke utom ukwọrọikọ ẹkedọhọde ẹnam?
Ukwọrọikọ edi ata akpan utom emi Otu Emi Ẹsede Eban̄a Utom Mme Ntiense Jehovah ẹdade usụn̄. Se VIDIO emi.
Jesus ama anam ẹdiọn̄ọ ke ukwọrọikọ edi ata akpan n̄kpọ. Kot Mark 13:10, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso inam Otu Emi Ẹsede Ẹban̄a Utom Mme Ntiense Jehovah ẹda ukwọrọikọ nte ata akpan n̄kpọ?
-
Nso inam nnyịn iyom “ofụn emi anamde akpanikọ onyụn̄ enyenede ọniọn̄” ada usụn̄ ke utom ukwọrọikọ emi ẹnamde ke ofụri ererimbot?
5. Ofụn emi anamde akpanikọ esitịn̄ se ikọt Abasi ẹkpenamde
Otu Emi Ẹsede Ẹban̄a Utom Mme Ntiense Jehovah ẹsitịn̄ se Jehovah oyomde ikọt esie ẹnam. Mmọ ẹsisan̄a didie ẹdiọn̄ọ emi? Ti nte otu emi ẹkesede ẹban̄a utom mme Christian ke eyo mme apostle ẹkesisan̄ade ẹdiọn̄ọ se Abasi oyomde ẹnam. Kot Utom 15:1, 2, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso ke mme Christian ke eyo mme apostle ẹkeneni ẹban̄a?
-
Paul, Barnabas, ye mbon eken ẹkeka ẹbịne mmanie man ẹbiere n̄kpọ oro?
Kot Utom 15:12-18, 23-29, ekem ẹbọrọ mbụme emi ẹnyụn̄ ẹneme ẹban̄a enye:
-
Otu emi ẹkesede ẹban̄a utom mme Christian ke eyo mme apostle ẹkesinam didie ẹdiọn̄ọ se Abasi oyomde, mmọ ẹma ẹyom ndibiere n̄kpọ?—Se ufan̄ikọ 12, 15, ye 28.
Kot Utom 15:30, 31 ye 16:4, 5, ekem ẹbọrọ mbụme emi ẹnyụn̄ ẹneme ẹban̄a mmọ:
-
Mme Christian eyo mme apostle ẹkenam n̄kpọ didie ini otu emi ẹkesede ẹban̄a utom mmọ ẹketịn̄de se ẹyomde ikọt Abasi ẹnam?
-
Didie ke Jehovah ọkọdiọn̄ mmọ ke ntak emi mmọ ẹketienede se ẹketịn̄de oro?
Kot 2 Timothy 3:16 ye James 1:5, ekem ẹbọrọ mbụme emi ẹnyụn̄ ẹneme ẹban̄a enye:
-
Nso isin̄wam Otu Emi Ẹsede Ẹban̄a Utom Mme Ntiense Jehovah ẹdiọn̄ọ se Jehovah oyomde ẹnam?
NDUSỤK OWO ẸSIDỌHỌ ẸTE: “Akpanam se Otu Emi Ẹsede Ẹban̄a Utom Mme Ntiense Jehovah ẹdọhọde, ọwọrọ etiene owo.”
-
Nso inam fi enịm ke Jesus esin̄wam Otu Emi Ẹsede Ẹban̄a Utom Mme Ntiense Jehovah ẹnam utom mmọ?
SE IKPEPDE
Otu Emi Ẹsede Ẹban̄a Utom Mme Ntiense Jehovah edi “ofụn emi anamde akpanikọ onyụn enyenede ọniọn̄” emi Christ ekemekde. Otu emi ẹsiteme ata ikọt Abasi ke ofụri ererimbot se ẹkpenamde ẹnyụn̄ ẹkpep mmọ Ikọ Abasi.
Se M̀mê Emeti
-
Anie ẹkemek “ofụn emi anamde akpanikọ onyụn̄ enyenede ọniọn̄”?
-
Didie ke Otu Emi Ẹsede Ẹban̄a Utom Mme Ntiense Jehovah ẹse ẹban̄a nnyịn?
-
Ndi emenịm ke Otu Emi Ẹsede Ẹban̄a Utom Mme Ntiense Jehovah edi “ofụn emi anamde akpanikọ onyụn̄ enyenede ọniọn̄”?
KPEP N̄KPỌ EN̄WEN
Se nte Otu Emi Ẹsede Ẹban̄a Utom Mme Ntiense Jehovah ẹsinamde utom.
“Mmanie Ẹdi Otu Emi Ẹsesde Ẹban̄a Utom Mme Ntiense Jehovah?” (Odu ke jw.org)
Se nte Otu Emi Ẹsede Ẹban̄a Utom Mme Ntiense Jehovah ẹsikụtde ẹte ke ikpep nnyịn ata nnennen n̄kpọ.
Otu Emi Ẹsede Ẹban̄a Utom Mme Ntiense Jehovah ẹda didie utom emi Jesus ọnọde mmọ ẹnam?
Didie ke mme mboho ikọ Abasi nnyịn owụt ke Jehovah ke ada Otu Emi Ẹsede Ẹban̄a Utom Mme Ntiense Jehovah usụn̄?
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
