KAPITE 54

“Le Tagata Fakasausau Agatonu Mo Poto”

PLAY

Ko Sesu le pule o le kokelekasio. (Efeso 5:23) I aso nei, e takitaki e Sesu mei le lagi ana tisipulo, ti e fakaʼaogaʼi e ia i le kele lana “tagata fakasausau agatonu mo poto” ke fai le gaʼoi lenā. (Lau Mateo 24:45.) Ko Sesu totonu leia na fakanofoʼia le “tagata fakasausau” lenā. Ko ia e maʼua e ia se faʼasiga tuʼulaga, kae ko le tagata fakasausau aia a Kilisito ti e tausi e ia ona fetaina. Ko ai le tagata fakasausau lenā? Ti e tokaga fefeʼaki aia kia tātou?

1. Ko ai le “tagata fakasausau agatonu mo poto”?

Na fakaʼaogaʼi e Seova se tagata pe ko se gā kutuga ke takitakiʼia lana kakai. (Malakia 2:7; Epeleo 1:1) I le ʼoki o le mate o Sesu, ko le kau apositolo mo le kau tagata āfea o Selusalemi alā na takitakiʼia le kokelekasio. (Tosi Gaoi 15:2) O toe felaʼaki i aso nei, ko se gā kutuga ko ni tagata ʼāfea e lotou soli le neʼa kai fakalaumālie ti mo takitaki le gaʼoi faifakamafola. Ti ko lātou anā ko le Kolesi Pule a le Kau Fakamāʼoki a Seova. Ti ko le gā kutuga lenā ko ‘le tagata fakasausau agatonu mo poto, leia kua fakanofo e Sesu.’ (Mateo 24:45, ʼuluaki koga) Ko lātou fuli alā e kau ki le Kolesi Pule, ko le kau Kilisiteano na filifili e le laumālie māʼokiʼoki. E lotou fiafia i lalātou iloa leia e lotou kauga sau loa mo Kilisito i lona Puleʼaga i selo mokā lotou mamate.

2. Koleā le neʼa kai fakalaumālie leia e soli e le tagata fakasausau?

Na pati Sesu e ‘soli’ loa e le tagata fakasausau agatonu mo poto ‘ki ana [tisipulo] le neʼa kai i lona temi totonu.’ (Mateo 24:45, lua koga) O fai pe le neʼa kai leia e tou ʼaga o kai e mafai ke tou maʼua mei ai le makeke ti mo le maʼuli mālōlō. Ti e toe felaʼaki mo le neʼa kai fakalaumālie, a akonaki o le Folafola a le Atua. E tou maʼua ai le makeke leia e ʼaoga ke tou nofo agatonu kia Seova ti mo fakasoko le gaʼoi leia na tuku mai e Sesu ke tou fai. (1 Timoteo 4:6) E tou maʼua le neʼa kai fakalaumālie lenā i atātou fono mo atātou fakatasi lalasi o felaʼaki mo atātou tosi mo ʼata alā e fakatafito ki le Tosi-Tapu. E tokoi mai le neʼa kai fakalaumālie lenā ke tou matala ki le finegalo o le Atua ti mo fakamakekeʼi ai atātou felogoi mo ia.

MANATU LOLOTO

Ta tioʼi pe koleā e ʼaoga ke tokoi mai kia tātou le “tagata fakasausau agatonu mo poto.”

E soli e le Kolesi Pule le neʼa kai fakalaumālie, mo ni fakatotonu, ti mo ni tokoi ʼaoga ki le Kau Fakamāʼoki a Seova o le mālamanei kātoa

3. E tonu ke fakatuʼutuʼu fakamālielie le kakai a Seova

E fakalogo le Kolesi Pule ki le takitaki a Sesu ti e lotou fakatuʼutuʼu a gaʼoi a le Kau Fakamāʼoki a Seova. E tatau mo le anoʼaga leia na soko i le temi o le kau ʼuluaki Kilisiteano. Tioʼi le GĀ ʼATA.

GĀ ʼATA: E Takitaki e Seova Lana Kakai (6:18)

Lau 1 Kolinito 14:33, 40, ti fai le vesili leinei:

E sā fefeʼaki i vaega anei, e loto a Seova ke fakatuʼutuʼu fakamālielie lana kakai?

4. E fakatuʼutuʼu e le tagata fakasausau agatonu mo poto a le faifakamafola

Na maʼuiga a le gaʼoi faifakamafola ki le kau ʼuluaki Kilisiteano. Lau Tosi Gaoi 8:14, 25, ti fai a vesili anei:

Ko ai leia na takitakiʼia le gaʼoi faifakamafola i le kau ʼuluaki Kilisiteano?
Koleā leia na fai e Petelo mo Soane i fakatotonu alā na soli ake e lā ake apositolo?

Ko le faifakamafola ko se gaʼoi maʼuiga ʼai, ti ko le Kolesi Pule leia e fakatuʼutuʼuʼia. Tioʼi le GĀ ʼATA.

GĀ ʼATA: Tokaga Tāfito Ki Le Faifakamafola (1:24)

Na pati a Sesu e maʼuiga le faifakamafola. Lau Maleko 13:10, ti fai a vesili anei:

Koleā e maʼuiga ai le gaʼoi faifakamafola ki le Kolesi Pule?
Koleā e tonu ai ke fakatuʼutuʼu e “le tagata fakasausau agatonu mo poto” a le gaʼoi fakamālamanei lenā?

5. E soli e le tagata fakasausau agatonu mo poto a ni fakatotonu

E soli e le Kolesi Pule ni fakatotonu ki le kau Kilisiteano o le mālamanei kātoa. E toʼo fefeʼaki e ia ana tonu? Ta tioʼi pe na fai fefeʼaki e le Kolesi Pule o le kau ʼuluaki Kilisiteano le koga lenā. Lau Tosi Gaoi 15:1, 2, ti fai a vesili anei:

Koleā le anoʼaga leia na leʼaise manatu tasi ai le kau ʼuluaki Kilisiteano?
Ko ai ma lātou na ano ki ai a Paulo mo Palenapa ti mo ʼiki ke lotou maʼua ai se puleʼaki?

Lau Tosi Gaoi 15:12-18, 23-29, ti fai le vesili leinei:

Koleā na fai e le Kolesi Pule ke takitaki ai e le Atua lalātou a tonu?—Tioʼi a vaega 12, 15, mo le 28.

Lau Tosi Gaoi 15:30, 31 mo le 16:4, 5, ti fai a vesili anei:

Koleā leia na fai e le kau ʼuluaki Kilisiteano i le soli ake e le Kolesi Pule a fakatotonu?
Na tapuakinaʼi fefeʼaki e Seova a lalātou fakalogo?

Lau 2 Timoteo 3:16 mo Sakopo 1:5, ti fai le vesili leinei:

I aso nei, koleā e fai e le Kolesi Pule mokā toʼo e ia ni tonu?

E PATI A ʼIKI: “Kāpau e ke fakalogo ki le Kolesi Pule e fai faʼi pe lau fakalogo ki le tagata la.”

Koleā e fakamāʼoki ai e takitaki a le Kolesi Pule e Sesu?

MANATU TĀFITO

Ko le Kolesi Pule ko “le tagata fakasausau agatonu mo poto” leia na fakanofo e Kilisito. E soli e ia ni fakatotonu mo le neʼa kai fakalaumālie ki le kau Kilisiteano o le mālamanei kātoa.