Iesu bon Atun te Ekaretia ni Kristian. (I-Ebeto 5:23) Ni boong aikai ao e kairiria taan rimwina n te aonnaba Iesu mai karawa rinanon “te toro ae kakaonimaki ma ni wanawana.” (Wareka Mataio 24:45.) Bon Iesu ae mwiokoa te “toro” ao n anganna te mwaaka ni kona ni karaoi babaire tabeua, ma e bon riai n ongeaba te toro iroun Iesu ao ni beku ibukia tarini Kristo. Antai te toro anne? E na kangaa n tabeakinira?

1. Antai “te toro ae kakaonimaki ma ni wanawana”?

E aki toki Iehova ni kakabongana te mwaane temanna ke mwaane bwa a na anga ana kaetieti nakoia ana aomata. (Maraki 2:7; Ebera 1:1) Imwini maten Iesu ao a a kairiri abotoro ao unimwaane ake i Ierutarem. (Mwakuri 15:2) N aron naba anne, ni boong aikai ao unimwaane aika kaain te Rabwata n Tautaeka ibukia Ana Tia Kakoaua, a katauraoi amwarake n taamnei ao ni kaira te mwakuri n uarongorongo. Te koraki aei bon “te toro ae kakaonimaki ma ni wanawana, are e mwiokoia [Iesu].” (Mataio 24:45a) Boni Kristian aika kabiraki kaain te Rabwata n Tautaeka ni kabane ake a kantaninga te tai are a nang raona Iesu n ana Tautaeka i karawa ngkana e toki maiuia i aon te aba.

2. Baikara amwarake n taamnei aika e katauraoi te toro ae kakaonimaki?

E taekinna Iesu bwa te toro ae kakaonimaki e “na angangania [raona ni Kristian] kanaia n te tai ae riai.” (Mataio 24:45b) E buokira te amwarake ae ti kanna ni kakorakoraira ao ni kamarurungira. N aron anne, amwarake n taamnei ae taekani kaetieti man Ana Taeka te Atua, a buokira naba n anganira te korakora ae ti kainnanoia bwa ti aonga n teimatoa ni kakaonimaki ni koaua nakon Iehova ao ni kakororaoa te mwakuri are e mwiokoira iai Iesu. (1 Timoteo 4:6) Ti karerekei amwarake n taamnei akanne rinanoni bobotaki, ruunga ao bwabwaro, ao rinanon naba booki aika aanaki man te Baibara ao taamnei aika buokira n ota n nanon te Atua ao ni kakorakoraa ara iraorao ma ngaia.

 REIAKINA AE BATI RIKI

3. A riai ni baireaki raoi ana aomata Iehova

E baireaki aia mwakuri Ana Tia Kakoaua iroun te Rabwata n Tautaeka i aan ana kairiri Iesu . E karaoaki naba te babaire ae titeboo ma anne irouia Kristian ake rimoa. Kaota te TAAMNEI.

Wareka 1 I-Korinto 14:​33, 40, ao maroroakina te titiraki aei:

• E kangaa n oti ni kiibu aikai bwa e tangiriia Iehova ana tia Kakoaua bwa a na baireaki raoi?

4. E bairea aron ara mwakuri n uarongorongo te toro ae kakaonimaki

Te uarongorongo bon te mwakuri ae rangi ni kakawaki ae a karaoia Kristian ake rimoa. Wareka Mwakuri 8:​14, 25, ao maroroakin titiraki aikai:

• N aia tai Kristian ake rimoa, antai ae kaira te mwakuri n uarongorongo?

• Tera aroia Betero ao Ioane nakon aia kairiri raoia n abotoro?

Te uarongorongo bon te mwakuri ae rangi ni kakawaki ae baireaki arona iroun te Rabwata n Tautaeka. Kaota te TAAMNEI.

 E katuruturua Iesu kakawakin te uarongorongo. Wareka Mareko 13:​10, ao maroroakin titiraki aikai:

• Bukin tera bwa e rangi ni kakawaki te mwakuri n uarongorongo iroun te Rabwata n Tautaeka?

• Bukin tera bwa ti kainnanoa “te toro ae kakaonimaki ma ni wanawana” bwa e na bairea aron te mwakuri ae katobibia te aonnaba aei?

5. E katauraoa te kairiri te toro ae kakaonimaki

E katauraoa te kairiri te Rabwata n Tautaeka ibukia Kristian ni katobibia te aonnaba. Tera arona ni bairea te kairiri are e anga? Nora aron te rabwata n tautaeka ni karaoa anne n aia tai Kristian ake rimoa. Wareka Mwakuri 15:​1, 2, ao maroroakin titiraki aikai:

• Tera te bwai are a aki boraoi n iango iai Kristian ake rimoa?

• Antai are a kawaria Bauro ao Barenaba ao tabeman riki ibukini kanakoraoan te kangaanga?

Wareka Mwakuri 15:​12-18, 23-29, ao maroroakina te titiraki aei:

• Imwaini karaoan te babaire, tera are e karaoia te rabwata n tautaeka rimoa n ukera iai ana kairiri te Atua i aon te kangaanga?​—Nora kibuna 12, 15, ao 28.

Wareka Mwakuri 15:​30, 31 ao 16:​4, 5, ao maroroakin titiraki aikai:

• Tera aroia Kristian rimoa nakon ana kairiri te rabwata n tautaeka are e anga?

• E kangaa Iehova ni kakabwaiaa ongeabaia?

Wareka 2 Timoteo 3:16 ao Iakobo 1:​5, ao maroroakina te titiraki aei:

• E karekea mai ia te kairiri te Rabwata n Tautaeka ibukini karaoani babaire ni boong aikai?

 KAKIMOTOTOANA

Te Rabwata n Tautaeka bon “te toro ae kakaonimaki ma ni wanawana” are e mwiokoia Kristo. E anga te kairiri ao amwarake n taamnei nakoia Kristian ni katobibia te aonnaba.

Kauring

• Antai ae e mwiokoa “te toro ae kakaonimaki ma ni wanawana”?

• E kangaa te Rabwata n Tautaeka n tabeakinira?

• Ko kakoauaa ae te Rabwata n Tautaeka bon “te toro ae kakaonimaki ma ni wanawana”?