Jíízọ̀s ní ea dú togó boo bõ̀ònatõ̀ò Kráìst e. (Ẹ́fẹsọ̀s 5:23) Deè nieí, Jíízọ̀s tõó káála vaá tulè pá a gbò nyòòne nvée e bà di boo kunukẽ̀í tení dú ló “gyóòlo ea nyímá nu vaá bọ́ló dẹ̀lẹ̀ nyíé boo.” (Bugi Máátìù 24:45, NW.) Jíízọ̀s Kráìst ní ea beè íbá ló ‘gyóòloí’ vaá nèe nèà deè ge nèèmà sìgà béèlàfùl e, sõò àé íè ge gbàntṍ ló Kráìst vaá sí tóm nè pá vígà Kráìst. Mée ní ea dú gyóòloí é? Vaá mósĩ́ deè ní e gyóòloí ólò ẹ̀b nú ea kilíí ló é?

1. Mée ní ea dú “gyóòlo ea nyímá nu vaá bọ́ló dẹ̀lẹ̀ nyíé boo” é?

Lọ̀l gé tṍó ea kil nvéeá, Jìhóvà ólò bọọgẹ̀ tú enè nen àbèè ńkem̀ gbò nen nèèmà tùle pá a gbò. (Málakaì 2:7; Híbrù 1:1) Tṍó e Jíízọ̀s ni ú lọ̀l, gbò tóm nè gbò kànen e ba beè di Jèrúsalẹ̀m ní e bà géè tulè gbò níí Kráìst e. (Tóm 15:2) Mm̀ tẽ̀ènè sĩ́deèá, pọ́ì ńkem̀ gbò kànen, ea dú Gbò Ge Tulè Tóm Gbò Neǹ Ditõ̀ò Jìhóvà ní ea gé néi gbò nú ea síè kpóó ló bẹẹ gbaa ló kilma ló Bàrì vaá tulè sìtóm kọ̀ kpẹ̀aí deè nieí é. Gbòí ní ea dú ‘gyóòlo ea nyímá nu vaá bọ́ló dẹ̀lẹ̀ nyíé boo e Jíízọ̀s beè íbá ló é.’ (Máátìù 24:45a, NW) Dénè nen ea dṹùnà Gbò Ge Tulè Tóm dú gbò e Bàrì beè tṍ nóo ból, e bà íe ból dẽe sĩ́ gè zọ̀ Kráìst bẹ̀l gbẹá káála tṍó e bà ni sí ba tóm boo kunukẽ̀í lọ̀l.

2. Gbò éé ea é síè kpóó ló bẹẹ gbaa ló kilma ló Bàrì ní e gyóòlo ea bọ́ló dẹ̀lẹ̀ nyíé booí ólò nèi ẽ́?

Jíízọ̀s beè kọọ̀ gyóòlo ea bọ́ló dẹ̀lẹ̀ nyíé booí é ne “gyã́á [gbò e bà gé gbá nyoone nvéè Kráìst] boo tṍó.” (Máátìù 24:45b) Dì belí bé e gyã́á e déè ólò nèi válá ló vaá naa kọọ̀ lóói á àgà naaá, níà bé e dùùlà bá deè tṍ ea di mm̀ Moǹ Bel Bàrì ólò nèi kói ea é náa kọ é kilsĩ́ gè bọ́ló dẹ̀lẹ̀ nyíé boo nè Jìhóvà vaá sí tóm e Jíízọ̀s beè nèi kọ é sì naa ẽ́. (1 Tímotì 4:6) È ólò ié gbò dùùlà bá deè tṍá tṍó e síì nònù, àsémblì, pọ̀bkà bõ̀ònaló, nè tṍó e ẹbvì gbò vídiò vaá bugi gbò kpá ea dẹẹ̀a boo Kpá Káí. Dénè gbò nuí ólò nvèè bá nèi kọ é láá dã́tẽ́ ló bùlà Bàrì vaá siè kpóó ló bẹẹ gbaa ló kìlmàé ló.

 KPÁÁ NÓ BỌ̀Ọ̀VẸ̀

3. Gbò níí Jìhóvà é íè ge naa nu boo kúu

Gbò Ge Tulè Tóm ólò tulè tóm Gbò Neǹ Ditõ̀ò Jìhóvà kèbá tùle Jíízọ̀s. Íb nakà nòònùí beè dì nàgé mm̀ túá gbò gbááá. Bìlà VÍDIÒÍ.

Bugi 1 Kọ́rìnt 14:33, 40, vaá ò gbóó aalai nakà bíbví:

• Mósĩ́ deè ní e dọ̀ Kpá Káíí zógè kọ Jìhóvà gbĩ́ kọọ̀ pá a gyóòlo á naa nú boo kúu é?

4. Gyóòlo ea bọ́ló dẹ̀lẹ̀ nyíé booí ólò noo bé eé kọ́ kpẹ̀a naa

Ge kọ́ kpẹ̀a ní ea beè dú pọ̀bkà tóm e gbò níí Kráìst mm̀ túá gbò gbááá géè sìe. Bugi Tóm 8:14, 25, vaá ò gbóó aalai gbò bíbví:

• Gbàà gbò níí Kráìst mm̀ túá gbò gbááá, bà mée ní e bà géè tulè sìtóm kọ̀ kpẹ̀a ẹ́?

• Éé ní e Pítà nè Jọ́ọ̀n beè naa tṍó e bà dã́ tùle ea aa bá dõòna kà gbò tóm ẽ́?

Ge kọ́ kpẹ̀a ní ea dú pọ̀bkà tóm e Gbò Ge Tulè Tóm gé noo bé ea é síá naa ẽ́. Bìlà VÍDIÒÍ.

 Jíízọ̀s beè kọ́ bé e gè kọ́ kpẹ̀a palàge dú bíi naa. Bugi Máàk 13:10, vaá ò gbóó aalai gbò bíbví:

• Éé ní ea náa vaá sìtóm kọ̀ kpẹ̀a à palàge bọọ ló Gbò Ge Tulè Tóm ẽ́?

• Éé ní ea náa vaá “gyóòlo ea nyímá nu vaá bọ́ló dẹ̀lẹ̀ nyíé boo” ní ea bọ́ló kọ á tulè nakà tóm ea gé síá beeá ló bàlà booí é?

5. Gyóòlo ea bọ́ló dẹ̀lẹ̀ nyíé booí ólò nèi tùle

Gbò Ge Tulè Tóm ólò nè tùle gbò níí Kráìst beeá ló bàlà booí. Mósĩ́ deè ní ea ólò nè béèlàfùl kilma ló íb tùle ea é ne ẽ́? Bugi togó boo bé e gbò ge tulè tóm mm̀ túá gbò gbááá beè naa vó naa. Bugi Tóm 15:1, 2, vaá ò gbóó aalai gbò bíbví:

• Éé ní ea beè domà tã̀àgã̀ zẹ̀ẹ̀ gbò níí Kráìst mm̀ túá gbò gbááá ẹ́?

• Bà mée ní e Pọ́ọ̀l, Bánabàs, nè dõòna gbò beè sí ló kọbé bà kpóògè dee ló belá ẹ́?

Bugi Tóm 15:12-18, 23-29, vaá ò gbóó aalai nakà bíbví:

• Besĩ́ gbò ge tulè tóm e ba beè di mm̀ túá gbò gbááá à kálá nè béèlàfùl, éé ní e ba beè naa kọbé bà íe tùle ea aa bá Bàrì e?—Ẹ̀b 12, 15, nè 28 gã́bel.

Bugi Tóm 15:30, 31 nè 16:4, 5, vaá ò gbóó aalai gbò bíbví:

• Éé ní e gbò nyòòne nvéè Kráìst mm̀ túá gbò gbááá beè naa tṍó e bà dã́ tùle ea aa bá gbò ge tulè tóm ẽ́?

• Mósĩ́ deè ní e Jìhóvà beè tãanè va dee bá boo béè kọọ̀ bà gbantṍ ló é?

Bugi 2 Tímotì 3:16 nè Jém̀z 1:5, vaá ò gbóó aalai nakà bíbví:

• Ãàe ní e Gbò Ge Tulè Tóm ólò gbĩ́ tùle lọ̀l tṍó e bà gbĩ́ gè nè béèlàfùl deè nieí é?

 NÚ E NI NÓ

Gbò Ge Tulè Tóm ní ea dú “gyóòlo ea nyímá nu vaá bọ́ló dẹ̀lẹ̀ nyíé boo” e Kráìst beè íbá ló é. Bà ólò nè tùle nè gbò nú ea é síè kpóó ló zìgà gbò e bà gé nyoone nvéè Kráìst beeá ló bàlà booí.

Ge Òòa Boo

• Mée ní ea beè íbá ló “gyóòlo ea nyímá nu vaá bọ́ló dẹ̀lẹ̀ nyíé boo” é?

• Mósĩ́ deè ní e Gbò Ge Tulè Tóm ólò ẹ̀b nú ea kilíí ló é?

• É kọọ̀ olo zigà kọọ̀ Gbò Ge Tulè Tóm ní ea dú “gyóòlo ea nyímá nu vaá bọ́ló dẹ̀lẹ̀ nyíé boo” é?