Zesu ɓə gaa a galangbɔn nwun namu (Efɛsə 5:23). Zesu kaa haakələi yələkɔlɔn ɉu yɛ tɛɛ “ Luwɔ təlimoɔ kiliŋalaa ” kɔwɔi yɛ ŋɔ kalan nea tənəndɔɔ ɓɛ lɔi mɛi. Biblə kaa kɛi ma : “ Gbɛɛ ɓə a luwɔ təlimoɔn kiliŋalaa, yii namu ə ɉee ɲee pɔ nua mɛi ə gɛ ə di kɔnɔn dɛɛ di pɔ a dɛɛ lowai ? ” (Matie 24:45 ɓo, NWT). Tɔɔi kaa “ Luwɔ ” təlimoɔ kiliŋalaa yəi, maahɔlɔɓo Zesu yaa kpinii ɓə ɉee, kəlaa gaa a Zesu ŋɔ luwɔ ə lɛɛ a kóló kɛ Zesu da Nan nonnii diɛ. Gbɛɛ ɓaa a Nuwɔ təlimoɔ kiliŋalaa tii ? Ə lɛɛ a gu maakpanŋaa kpɛɛ ləi ?

1. Gbɛɛ ɓaa “ Luwɔ təlimoɔ kiliŋalaa ” ?

Kɛlɛ-kɛlɛ hu Zehova a nuta həɠə ɉu awala kɛtii nu kpulu logolo ta ə gɛ diɛ pɛli ŋɔ nu huwui tənəndɔɔi (Malasi 2:7 ; Hebreu 1:1). Zesu haa pulu, apɔtɛlɛɠaa da galaɉonɠaa kɛ Ɉerusalɛmə diɛ ɓə kɛi kalangbɔnŋaa tənəndɔɔ (Gɛlaɠaa 15:2). Haakələi nwɔnɔ nu kpulu logolo diɛi a kalaɉonɠaa diɛ ɓo a Zehova ŋɔ Kələɠaa ɲɛitɔwɔnua, diɛ ɓə da kɛ gu nii kɔnɔn gɛi ə lɛɛ diɛ Yálá Lawoo laahəli kóló tənəndoɔ. “ Gbului tii ɓə a luwɔ təlimoɔ kiliŋalaa yii Zesu yaa kpinii ə ɉee ” (Matie 24:45a, NWT). Luwɔ təlimoɔ kiliŋalaa hu nua kəlee kaa a kilistalea maatiɛɠaa, di kwəinɛɛ maahɔlɔɓo da pa haai, di kaa pai nwun ɉii ə lɛɛ da Zesu ni di tɔɔlaa kɛ yələkɔlɔn ɉu.

2. Gu nii kɔnɔn luwɔ təlimoɔ kiliŋalaa a kɛ gɛi yaa ɓaa a lə ?

Zesu ə kɛ ma, “ luwɔ təlimoɔ kiliŋalaa ” kaa pai kɛi “ kɔnɔn dɛɛ ŋɔ kalan nea pɔ a dɛɛ lowai ” (Matie 24:45b, NWT). Gɔnɔnŋaa gwa kɛ mii a hwaŋa tɛɛ gu pɔ ə lɛɛ yɛ gɛ guɔ lɛɛ a gu kɔlɔi ponoɔ. Ɓələ lɔ ɓə gu nii kɔlɔn gaa laa, yili mukulaa ɓa galan nwooɠaa Yálá Lawoo hu a hwaŋa tɛɛ gu pɔ guɔ lɛɛ a gu təlimoɔ Zehova ɓa ə lɛɛ gólói Zesu ə galihwaɓo guɔ, guɔ pɛli gɛi (Timote dɔlɔɔ 4:6). Gwa gu nii kɔnɔnŋaa tii hɔlɔɓo gu wɔ ŋaakpɔnŋaa da gu wɔ ŋaakpɔn gbea-gbea diɛ, ə ma kɛ gu wɔ kalan ɉɛɓɛɠaa hu ə lɛɛ da vidioɠaa diɛi di huwoo a kulɔ Biblə hu, diɛ kpɔnmaa tɛɛ gu pɔ guɔ pɛli Zehova liiɓa kɔlɔn ɉii ə lɛɛ yili yɛ gu wɔ ɓəlan naa huwala-wala gwa diɛ nii.

 Ə́ WƆ MƐNIKƆLƆNŊAA TA PƐLƐ MA

3. Zehova ŋɔ nu huwui maamɛni hiɛi gbaŋa

Ɓɛlɛkɛnɛlanua kaa Zesu ŋɔ tənəndɔɔɓo mu, diɛ Zehova ŋɔ nu huwui maamɛni hee gbaŋa. Ɓələ lɔ ɓə wɔlɔ a kɛ la Kilista lea tɔwɔɔɠaa di wɔ lowai VIDIO kaa.

Korɛntə dɔlɔɔ 14:​33, 40 ɓo, ə lɛɛ ka lono kɛ gɛɛmaalən ŋɛi mɛi :

• Vɛlisɛɛɠaa ŋɛi da nɛ ləi diɛ ma Zehova kaa bɔ ŋɔ nu huwui maamɛni ə kɛ a ɉiɛ gbaŋa ?

4. Luwɔ təlimoɔ kiliŋalaa a Yálá Lawoo laahəli kóló hee gbaŋa

Yálá Lawoo laahəli mɛni ə kɛ a kóló yii maamɛni wala-wala Kilistalea tolooɠaa yəi. Gɛlaɠaa 8:​14, 25 ɓo, ə lɛɛ ka lono kɛ gɛɛmaalənŋaa ŋɛi mɛi :

• Gbɛɛ nua ɓə kɛ Yálá Lawoo laahəli kóló hee gbaŋa Kilistalea tolooɠaa di wɔ lowai ?

• Piɛrə da Ɉaan di túwɔ́ ləi di ɓəlaa apotɛlɛɠaa di wɔ tənəndɔɔɓo mu ?

Yálá Lawoo laahəli mɛni kaa a kóló yii maamɛni wala-wala bɛlɛkɛnɛlanua yəi. VIDIO kaa.

 Zesu ə kɛ ma Yálá Lawoo laahəli kóló maamɛni wala-wala kpɔ kɛnɛ. Markə 13:10 ɓo, ə lɛɛ ka lono kɛ gɛɛmaalənŋaa ŋɛi mɛi :

• Lə mɛni ɓa Yálá Lawoo laahəli kóló maamɛni wala-walai kpɔ kɛnɛ Bɛlɛkɛnlanua yəi ?

• Lə mɛni ɓa maanɛɛ “ Luwɔ təlimoɔ kiliŋalaa ” ə Yálá Lawoo laahəli kóló hee gbaŋaa ?

5. Luwɔ təlimoɔ kiliŋalaa a tənəndɔɔ wooɠaa tɛɛ

Tənəndɔɔ wooɠaai yii kilistalea maakpaan gaa ma lɔi mɛi naa kəlee, luwɔ təlimoɔ kiliŋalaa ɓə a dɛɛ di pɔ. A ɉəɠə pələ kɛ ləi ɉu ? Gaa pələi Bɛlɛkɛnlanua di kɛi gɛ la kilistalea tolooɠaa di wɔ lowai. Gɛlaɠaa 15:​1, 2 ɓo, ə lɛɛ ka lono kɛ gɛɛmaalənŋaa ŋɛi mɛi :

• Mɛni ləkɛɛ ɓə gɛ kilistalea tolooɠaa taɠaa woo yɛ bula ma ?

• Gbɛɛ nua ɓə Poli da Barnabasə dəli di pɔ ə gɛ di mɛnii tii ɲɛi kulɔ ?

Gɛlaɠaa 15:​12-18, 23-29 ɓo, ə lɛɛ ka lono kɛ gɛɛmaalən ŋɛi mɛi :

• Mɛnii ŋɛi kɛ galangbɔn ɉu kilistalea tolooɠaa di wɔ lowai, lə ɓə Bɛlɛkɛnlanua di gɛ, ə gɛ Zehova yɛ pɛli di tənəndɔɔ ? (Nwookpuɔ 12, 15, da 28 kaa).

Gɛlaɠaa 15:​30, 31 da 16:​4, 5 ɓo, ə lɛɛ ka lono kɛ gɛɛmaalənŋaa ŋɛi mɛi :

• Dənəndɔɓoɠaai Bɛlɛkɛnlanua di dɛɛ, kilistalea tolooɠaa di túwɔ́ ləi yɛ hwilɛn na ma ?

• Zehova ə lúwɔ́ too ləi di wɔ lɛɛnwoomulaa ɓa ?

Timote veelɛ 3:16 da Ɉakə 1:5 ɓo, ə lɛɛ ka lono kɛ gɛɛmaalən ŋɛi mɛi :

• Haakələi Bɛlɛkɛnɛlanua diɛ kpɛli da kɛi pa mɛni ta həɠəi ɉu, lə ɓə a di tənəndɔɔ ?

 YII GU GALAN

Bɛlɛkɛnlanua ɓə a luwɔ təlimoɔ kiliŋalaa ŋɛi Zesu ə ɉee. Diɛ ɓə da kilistaleai kpɔ lɔi mɛi naa kəlee tənəndɔɔ ə lɛɛ diɛ di nii kɔnɔn gɛ.

Nɛɛ ə́ kili pɔ

• Gbɛɛ ɓə luwɔ təlimoɔ kiliŋalaa hee ?

• Luwɔ təlimoɔ kiliŋalaa a gu hon nəi ?

• Ə́ laana yɛ́ ma Bɛlɛkɛnlanua ɓə a luwɔ təlimoɔ kiliŋalaa ?