Yezu n de Kristakɔma tansugere la Zuodaana. (Epesus 5:23) Yezu boi la saazuo ge dɔla “sakerɛ la yɛm yameŋa la” poan pa’ala a podɔleba tingɔŋɔ wa zuo zina beere wa. (Kaalɛ Matu 24:45.) Yezu mea n loe en la zuo “yameŋa” wa tari kpe’eŋo mɛ ge la bala la za’a la, a kelum dɛna la Krista yameŋa ge me tuna bɔ’ɔra Krista suurɔ la. Ani n de yameŋa wa? Yameŋa wa bisera to la wani wani?

1. Ani n de “sakerɛ la yɛm yameŋa la”?

Saŋa woo, Yehowa ni loe la buraa bii buraasi fii wa ti ba pa’ala a nɛreba. (Malaki 2:7; Hebru 1:1) Yezu n yuun ki la, tuuntuneba la keendoma n boi Yerusalem la, n yuun boi nɛŋa bisa tuuma la. (Tooma 15:2) Bala mea nɔɔ ti zina beere wa, ti to tara keendoma fii n de Yehowa Sɛɛradoma Tigere Zuo Bisegadoma la n bo’ori to vo’osum poan dia ge pa’ala tɔ to wan tuna to na’am mɔɔlegɔ tuuma la se’em la. Nɛrebama n de “sakerɛ la yɛm yameŋa la ti [Yezu] loe la.” (Matu 24:45a) Tigere Zuo Bisegadoma la za’a dela loore Kristakɔma n guri ti ba san ta ki, ba wan naɛ la Krista bɔna a saazuo Na’am la poan.

2. Bem vo’osum poan dia ti sakerɛ yameŋa la tara bɔ’ɔra tɔ?

Yezu yuun yeti sakerɛ yameŋa la wan “bɔ’ɔra [ba Kristakɔma tadaandoma] dia sansɛka n nari poan.” (Matu 24:45b) Wuu dia n soŋeri tɔ ti to nyɛta paŋa ge tara imma’asum se’em la, bala mea nɔɔ ti vo’osum dia n de pa’alegɔ n ze’ele Naayinɛ Yetɔɣum la poan me bɔ’ɔra tɔ paŋa ti to ta’an tara yelemɛŋɛrɛ bɔ’ɔra Yehowa ge me tuna tuunɛ la ti Yezu dekɛ bo to la. (1 Timoti 4:6) To nyɛti vo’osum poan dia wa la zamesegɔ poan, laɣesebibisi poan, laɣesekãra la Baabule gɔnɔ la vidiyodoma n soŋeri tɔ ti to bɔkera Naayinɛ puti’irɛ n de sɛla ge kelum basɛ ti to tara bɔnsoŋa la en.

 VIISƐ PA’ASƐ

3. Yehowa nɛreba nari ti ba tigese bamesi mɛ

Yezu n pa’ali Tigere Zuo Bisegadoma la ti ba me pa’ala Yehowa Sɛɛradoma n nari ti ba tuna ba tuuma se’em. Kristakɔma sɛba n yuun deŋɛ nɛŋa la, yuun tari Tigere Zuo Bisegadoma mɛ. Ŋmɛ VIDIYO la.

Kaalɛ 1 Korint 14:33, 40 ge nyaa sɔsɛ sokere wa:

• Sore kani poan ti kaalegɔ zɛ’ɛsi wa pa’alɛ ti Yehowa boti la a Sɛɛradoma la tigesɛ bamesi?

4. Sakerɛ yameŋa la n bisera to na’am tuuma la

Na’am mɔɔlegɔ tuuma la yuun dela ninmɔ’ɔrɛ yele bo Kristakɔma sɛba n deŋɛ nɛŋa la. Kaalɛ Tooma 8:14, 25 ge nyaa sɔsɛ sokere ana wa:

• Bani n yuun biseri Kristakɔma sɛba n deŋɛ nɛŋa la na’am mɔɔlegɔ tuuma la?

• Peter la Yon yuun to’e pa’alegɔ seko ti ba tuuntuneba tadaandoma la yuun dekɛ bo ba la wani?

Na’am mɔɔlegɔ tuuma la n de ninmɔ’ɔrɛ tuunɛ n gaŋɛ za’a ti Tigere Zuo Bisegadoma la bisera ti la tuna. Ŋmɛ VIDIYO la.

 Yezu yuun pa’alɛ na’am mɔɔlegɔ tuuma la yele n pakɛ se’em mɛ. Kaalɛ Mark 13:10 ge nyaa sɔsɛ sokere ana wa:

• Beni n sɔi ti na’am mɔɔlegɔ tuuma la dɛna ninmɔ’ɔrɛ yele bo Tigere Zuo Bisegadoma la?

• Beni n sɔi ti to ɛɛra “sakerɛ la yɛm yameŋa la” ti ba pa’ala tɔ ti to tuna tuunɛ wa tingole wa poan?

5. Sakerɛ yameŋa la bo’ori to la pa’alegɔ

Tigere Zuo Bisegadoma la tari la pa’alegɔ bɔ’ɔra Kristakɔma n boi tingɔŋɔ wa zuo. Ba ni eŋɛ la wani ta’an bo pa’alegɔ? Geele bisɛ Kristakɔma sɛba n deŋɛ nɛŋa la tigere zuo bisegadoma la n yuun iti wana se’em. Kaalɛ Tooma 15:1, 2 ge nyaa sɔsɛ sokere ana wa:

• Bem yele n yuun tari nɔkpe’ene wa’an Kristakɔma sɛba n deŋɛ nɛŋa la tiŋasuka?

• Paul, Barnabas la nɛreba basɛba yuun keŋɛ la bani zɛ’an ti ba ta maalɛ yele wa?

Kaalɛ Tooma 15:12-18, 23-29 ge nyaa sɔsɛ sokere wa:

• Ge ti tigere zuo bisegadoma sɛba n deŋɛ nɛŋa la yuun kɔ’ɛ ba puti’irɛ la, ba yuun geele la bem yele se’em ma’a ti ba yuun ɛɛra ti Naayinɛ soŋɛ ba ti ba maalɛ yele la?​—Bisɛ kaalegɔ zɛ’ɛsi 12, 15 la 28.

Kaalɛ Tooma 15:30, 31 la 16:4, 5 ge nyaa sɔsɛ sokere ana wa:

• Tigere zuo bisegadoma la n yuun bo pa’alegɔ la, Kristakɔma sɛba n deŋɛ nɛŋa la yuun eŋɛ la wani?

• Ba yuun doose pa’alegɔ la zuo la, Yehowa yuun kã bo ba la wani?

Kaalɛ 2 Timoti 3:16 la Yames 1:5 ge nyaa sɔsɛ sokere wa:

• Tigere Zuo Bisegadoma la nyɛti pa’alegɔ la bɛ ge ta’an ni kɔ’ɛ ba puti’irɛ soŋa zina wa?

 YELEKPINE

Tigere Zuo Bisegadoma la n de “sakerɛ la yɛm yameŋa la” ti Krista loe la. Bamam n tari pa’alegɔ la vo’osum poan dia bɔ’ɔra Kristakɔma tingɔŋɔ wa za’a waabi poan.

Tiisegɔ Sokere

• Ani n loe “sakerɛ la yɛm yameŋa la”?

• Tigere Zuo Bisegadoma la biseri to la wani?

• Hon sakɛ ti Tigere Zuo Bisegadoma la n de “sakerɛ la yɛm yameŋa la”?