Jesús abokän konkrekasion kristiana jie ngwanka (Efesios 5:23). Nengwane tä “ni klabore ja ngwanka metre aune töbikaka kwin käne” yebiti nitre ja tötikaka niarabe Kä Tibienbätä jie ngwen (mäkwe ñäkä Mateo 24:45 yebätä). Jesukwe “nitre klabore” ye kädekani, ye medenbätä tätre kukwe ruäre den nuaindre mikakäre täte. Akwa yebiti ta, nitre klabore ye rabadre Kristo mike täte aune sribire Kristo etebatre kräke. ¿Ni klabore ye abokän nire? ¿Tä ni ngübare ño?

1. ¿“Ni klabore ja ngwanka metre aune töbikaka kwin käne” ye nire?

Käre Jehovata ni iti o ni ruäre yebiti juta kwe jie ngwen (Malaquías 2:7; Hebreos 1:1). Ñodre, Jesús murie ketani ye bitikäre nitre apóstol aune nitre umbre ji ngwanka Jerusalén käkwe konkrekasion jie ngwani (Hechos 15:2). Nuainbare kira erere, nengwane nitre umbre ji ngwaka braibe Cuerpo Gobernante testiko Jehovakwe tä mrö ja üaire bien aune tä kukwe drie jie ngwen. “Ni klabore ja ngwanka metre aune töbikaka kwin käne” ye kötärä Jesukwe sribi ye mikani (Mateo 24:45a, TNM). Cuerpo Gobernante ye jökrä diankata üai demebiti aune niaratre krütai ye bitikäre gobrandi kwetre Gobran Ngöbökwe yete kä kwinbiti Jesube ngübata kwetre.

2. ¿Ni klabore ye tä mrö ja üaire meden bien?

Ni klabore ja ngwanka metre ye rabadre ni kristiano mada buke “kä debe näre te” niebare Jesukwe (Mateo 24:45b, TNM). Mrö kwetata ye köböire nita dite aune kwin ngrabare. Ye erere mrö ja üaire, ye abokän kukwe ja jie ngwankäre Ngöbö Kukweibätä tä ni dimike ja ngwen metre Jehovai aune sribi mikani Jesukwe ni kisete ye mike nemen bare (1 Timoteo 4:6). Mrö ja üaire ne tä nemen nikwe, gätä, gätä kri, täräkwata aune video känti kukwe Bibliabätä kädrieta yebiti. Kukwe ne ta ni dimike ja kete bäri kwin Jehovabe aune nikwe dre nuaindre ie tö ye tä mike gare nie.

 JA TÖTIKE BÄRI NGUSETA

3. Juta Jehovakwe tädre ükaninte kwin

Nitre testiko Jehovakwe tä sribi nuainne ye Jesuta jie ngwen Cuerpo Gobernante yebiti. Siklo kena konkrekasion nämäne ükaninte ye erere. VIDEO mikadre ñärärä.

Ñäkädre 1 Corintios 14:33, 40 yebätä aune kukwe ne kädriedre jabe:

• Bersikulo ne tä niere erere, ¿Jehová tö ni testiko kwe tuai ja ükaninte kwin? ¿Ñobätä mätä töbike kore?

4. Ni klabore tä kukwe drie ye ükete

Kukwe driedre ye nämäne bäri ütiäte nitre kristiano kena kräke. Ñäkädre Hechos 8:14, 25 yebätä aune kukwe ne kädriedre jabe:

• Siklo kena yete, ¿nire nämäne kukwe drie jie ngwen?

• ¿Nitre apóstol mada käkwe kukwe niebare Pedro aune Juan ie yebiti dre nuainbare kwetre?

Kukwe drie ye sribi bäri ütiäte ükateta Cuerpo Gobernantekwe. VIDEO mikadre ñärärä.

 Kukwe driedre ye ütiäte krubäte Jesukwe mikani gare. Ñäkädre Marcos 13:10 yebätä aune kukwe ne kädriedre jabe:

• ¿Ñobätä kukwe drie ye ütiäte krubäte Cuerpo Gobernante kräke?

• ¿Ñobätä “ni klabore ja ngwanka metre aune töbikaka kwin käne” käkwe sribi nuainta kä jökräbiti tibien ne ükadrete ye nita ribere?

5. Ni klabore ja ngwanka metre tä ni jie ngwen

Cuerpo Gobernante tä ni kristiano kä jökräbiti jie ngwen. Jämi kukwe keteiti den nuaindre jai känenkri, ¿tätre dre nuainne? Cuerpo gobernante siklo kena nämäne nuainne ño ye mike ñärärä. Ñäkädre Hechos 15:1, 2 yebätä aune kukwe ne kädriedre jabe:

• ¿Dre käkwe nitre kristiano siklo kena ñäkäninbiti?

• ¿Pablo, Bernabé aune nitre kristiano mada käkwe ja di käräbare nirei kukwe ye ükatekäre?

Ñäkädre Hechos 15:12-18 aune 23-29 yebätä aune kukwe ne kädriedre jabe:

• Cuerpo Gobernante jämi kukwe den nuaindre jai ye känenkri, ¿dre nuainbare kwetre ne kwe Ngöbökwe jie ngwandre kukwe ye ükatekäre? (Bersikulo 12, 15 aune 28 mikadre ñärärä).

Ñäkädre Hechos 15:30, 31 aune 16:4, 5 yebätä aune kukwe ne kädriedre jabe:

• Kukwe mika mananbare täte Cuerpo Gobernantekwe nitre kristiano siklo kena ie ngwane, ¿kani ngäbiti ño kwetre?

• Ja mikani täte kwetre ye köböire Jehovakwe kukwe kwin mikani nemen bare kräketre, ¿ye ñokänti gare nie?

Ñäkädre 2 Timoteo 3:16; Santiago 1:5 yebätä aune kukwe ne kädriedre jabe:

• ¿Cuerpo Gobernante nengwane ie kukweta nemen diandre nuaindre ngwane tätre dre nuainne?

 ¿DRE NIBI GARE MÄI?

Cuerpo Gobernante ye abokän “ni klabore ja ngwanka metre aune töbikaka kwin käne” abokän kädekani Jesukwe. Nitre klabore ne tä nitre kristiano kä jökräbiti tibien buke mrö ja üaire te aune dre nuaindre kwetre ye tä mike gare ietre arato.

Ngwankäreta törö

• ¿Nirekwe “ni klabore ja ngwanka metre aune töbikaka kwin käne” ye kädekani?

• ¿Cuerpo Gobernante ye tä ni ngübarebiti ño?

• ¿Cuerpo Gobernante ye “ni klabore ja ngwanka metre aune töbikaka kwin käne” ruin mäi?