Yexus yog tus coj lub koom txoos Khixatias. (Efexus 5:23) Niaj hnub no, Yexus nyob saum ntuj tiam sis nws xaiv tsa “tus qhev ncaj thiab ntse” los pab coj cov Khixatias hauv ntiaj teb. (Nyeem Mathais 24:45.) Yog li, muaj tej yam Yexus yeej tso cai rau “tus qhev ncaj thiab ntse” txiav txim siab seb yuav ua li cas. Tiam sis “tus qhev ncaj thiab ntse” yuav tsum mloog Yexus lus thiab ua hauj lwm pab cov xaiv tseg. Tus tub qhe no yog leej twg thiab nws ho saib xyuas peb li cas?

1. “Tus qhev ncaj thiab ntse” yog leej twg?

Yehauvas yeej ib txwm siv ib tug txiv neej los sis ib pab txiv neej los coj nws haiv neeg. (Malakis 2:7; Henplais 1:1) Tom qab Yexus tuag lawd, cov tub txib thiab cov txwj laus hauv Yeluxalees yog cov coj cov Khixatias. (Tes Haujlwm 15:2) Niaj hnub no los yeej tseem yog ib pab txwj laus coj cov Khixatias. Lawv yog Pab Uas Ntaus Thawj ntawm Yehauvas Cov Tim Khawv. Lawv yog cov faib zaub faib mov ntawm sab kev ntseeg rau cov Khixatias thiab saib xyuas txoj kev tshaj tawm txoj xov zoo. Pab txwj laus no yog “tus qhev ncaj thiab ntse” uas Yexus tsa. (Mathais 24:45) Txhua tus ntawm Pab Uas Ntaus Thawj puav leej yog cov xaiv tseg. Lawv tos tsis taus yuav mus nrog Yexus ua vaj ntxwv kav nyob saum ntuj.

2. Tej zaub mov ntawm sab kev ntseeg uas “tus qhev ncaj thiab ntse” faib yog dab tsi?

Yexus hais tias tus qhev ncaj thiab ntse yuav “faib zaub faib mov rau [cov Khixatias] raws caij raws nyoog.” (Mathais 24:45) Zoo ib yam li tej zaub mov uas peb noj pab kom peb muaj zog thiab tsis muaj mob muaj nkeeg, cov zaub mov ntawm sab kev ntseeg yog kev cob qhia los ntawm Vajtswv Txoj Lus uas yuav pab kom peb muab siab npuab Yehauvas thiab ua tes hauj lwm uas Yexus muab rau peb ua. (1 Timautes 4:6) Peb tau tej kev cob qhia no thaum peb mus kev sib txoos, mus tej rooj sib txoos, thiab thaum peb nyeem tej ntaub ntawv Vajlugkub. Peb kuj muaj tej yeeb yaj kiab uas pab kom peb muaj kev sib raug zoo nrog Yehauvas thiab paub tias Nws xav kom peb ua dab tsi thiab.

 KAWM NTXIV

3. Yehauvas cov neeg yuav tsum muaj ib lub koom haum

Yexus yog tus coj Pab Uas Ntaus Thawj thiab cob qhia lawv saib xyuas Yehauvas Cov Tim Khawv tej hauj lwm. Yexus kuj coj cov Khixatias thaum ub li no thiab. Saib zaj YEEB YAJ KIAB.

Nyeem 1 Kauleethaus 14:33, 40 thiab tham txog lo lus no:

• Ua cas peb thiaj paub tias Yehauvas xav kom nws cov neeg muaj ib lub koom haum uas muaj kab muaj kev taug?

4. “Tus qhev ncaj thiab ntse” saib xyuas kev tshaj tawm

Kev tshaj tawm txoj xov zoo yog txoj hauj lwm tseem ceeb tshaj plaws rau cov Khixatias thaum ub. Nyeem Tes Haujlwm 8:14, 25 thiab tham txog ob lo lus no:

• Leej twg yog cov saib xyuas kev tshaj tawm rau cov Khixatias thaum ub?

• Petus thiab Yauhas ua li cas xwb, thaum cov tub txib txib nkawd?

Txoj hauj lwm tseem ceeb tshaj plaws uas Pab Uas Ntaus Thawj saib xyuas niaj hnub no los yeej tseem yog txoj kev tshaj tawm txoj xov zoo. Saib zaj YEEB YAJ KIAB.

 Yexus hais tias kev tshaj tawm txoj xov zoo tseem ceeb dua lwm yam huv tib si. Nyeem Malakaus 13:10 thiab tham txog ob lo lus no:

• Yog vim li cas txoj kev tshaj tawm txoj xov zoo thiaj li tseem ceeb ua luaj rau Pab Uas Ntaus Thawj?

• Vim li cas “tus qhev ncaj thiab ntse” thiaj yuav tsum saib xyuas tes hauj lwm tshaj tawm txoj xov zoo thoob qab ntuj?

5. “Tus qhev ncaj thiab ntse” yog tus cob qhia Yehauvas cov neeg

Ua li cas Pab Uas Ntaus Thawj thiaj paub tias lawv yuav cob qhia cov Khixatias li cas? Cia peb mus kawm seb pab uas ntaus thawj ntawm cov Khixatias txheej thaum ub ua li cas. Nyeem Tes Haujlwm 15:1, 2 thiab tham txog ob lo lus no:

• Cov Khixatias thaum ub muaj teeb meem dab tsi?

• Povlauj, Npananpas, thiab lwm cov ntseeg mus cuag leej twg pab lawv?

Nyeem Tes Haujlwm 15:12-18, 23-29 thiab tham txog lo lus no:

• Pab uas ntaus thawj thaum ub ua li cas, lawv thiaj txawj txiav txim siab kom zoo raws li Yehauvas lub siab nyiam?​—Saib nqe 12, 15, thiab 28.

Nyeem Tes Haujlwm 15:30, 31 thiab 16:4, 5 ces tham txog ob lo lus no:

• Cov Khixatias thaum ub ua li cas thaum lawv hnov pab uas ntaus thawj cov lus sau tuaj rau lawv?

• Thaum lawv ua li pab uas ntaus thawj hais, Yehauvas foom koob hmoov li cas rau lawv?

Nyeem 2 Timautes 3:16 thiab Yakaunpaus 1:5 ces tham txog lo lus no:

• Niaj hnub no, thaum Pab Uas Ntaus Thawj yuav ua ib yam dab tsi, lawv mus cuag leej twg pab tswv yim rau lawv?

 KOJ KAWM TAU DAB TSI

Pab Uas Ntaus Thawj yog “tus qhev ncaj thiab ntse” uas Yexus xaiv tsa los faib zaub mov ntawm sab kev ntseeg rau cov Khixatias thoob qab ntuj.

Rov Tham Dua

• Leej twg yog tus xaiv tsa “tus qhev ncaj thiab ntse”?

• Pab Uas Ntaus Thawj saib xyuas peb li cas?

• Koj puas ntseeg tias Pab Uas Ntaus Thawj yog “tus qhev ncaj thiab ntse”?