Iesu be Keristani kongrigeisen ena Kwarana. (Efeso 5:​23) Hari, Iesu be king guba ai bona “hesiai tauna mai ena kamonai bona mai ena aonega” ia gaukaralaia, tanobada ai iena murinai idia raka taudia ia gunalaia totona. (Mataio 24:45 duahia.) Unai “hesiai tauna” be Iesu ese ia makaia bona gwaumaoro ia henia abia hidi haida ia karaia totona. To, ia ese Keriso do ia badinaia bona Keriso ena tadikaka do ia hesiai henidia. Unai hesiai tauna be daika, bona edena dala ai ita ia naria?

1. “Hesiai tauna mai ena kamonai bona mai ena aonega” be daika?

Iehova be hanaihanai tau ta o tatau haida orea maragina ta lalonai ia gaukaralaia, iena taunimanima dekenai hakaua herevadia ia henia totona. (Malaki 2:7; Heberu 1:1) Iesu ia mase murinai, Ierusalema ai aposetolo taudia bona elda taudia ese orea idia hakaua. (Kara 15:2) Unai hegeregerena, hari inai negai elda orea maragina ta, Iehova ena Witnes taudia edia Hakaua Oreana unai, ese Baibel ena pablikeisen idia halasia bona haroro gaukara idia naria. Unai orea be “hesiai tauna mai ena kamonai bona mai ena aonega, [Iesu] ese ia abia hidi.” (Mataio 24:45a) Hakaua Oreana taudia ibounai be lauma helaga ese ia horoa Keristani taudia, bona idia mase murinai Keriso ida ena guba Basileia lalonai idia lohia negana idia naria noho.

2. Hesiai tauna mai ena kamonai ese edena bamona aniani ia henia?

Iesu ia gwau hesiai tauna mai ena kamonai ese “nega korikori ai [Keristani tadikaka] edia aniani do ia henia.” (Mataio 24:45b) Iseda tauanina ia goada bona ita gorere lasi totona, aniani ita ania. Unai hegeregerena, Dirava ena Hereva ese ita ia hagoadaia, Iehova ita abidadama henia bona Iesu ese ia henia gaukara ita karaia totona. (1 Timoteo 4:6) Baibel ena buka, magasin, vidio idauidau, kongrigeisen heboudia, hebouhebou maragidia bona badadia amo Dirava ena Hereva ita abia. Unai gaudia ese ita idia durua ena ura ita lalopararalaia bona iseda hetura karana ia ida ita hagoadaia totona.

 DIBA MA HAIDA ABIA

3. Iehova ena taunimanima idia gaukara hebou be namo

Iesu ena hakaua dalana henunai, Hakaua Oreana ese Iehova ena Witnes Taudia edia gaukara ia naria. Iesu ese Keristani ginigunadia beunai bamona ia hakaua danu. VIDIO itaia.

Korinto Ginigunana 14:​33, 40 duahia, bena inai henanadai herevalaia:

• Edena dala ai inai siri ese idia hahedinaraia Iehova ia ura iena Witnes taudia be orea ta ai do idia gaukara hebou?

4. Hesiai tauna mai ena kamonai ese iseda haroro gaukara ia naria

Keristani taudia ginigunadia ese idia karaia gaukara badana be haroro gaukara. Kara 8:​14, 25 duahia, bena inai henanadai herevalaia:

• Keristani ginigunadia edia negai, daika ese haroro gaukara karaia dalana ia naria?

• Aposetolo taudia ma haida ese Petero bona Ioane dekenai gaukara ta idia henia neganai, dahaka idia karaia?

Hakaua Oreana ese ia gunalaia gaukara badana be haroro gaukara. VIDIO itaia.

 Iesu ia hahedinaraia haroro gaukara be mai anina bada. Mareko 13:10 duahia, bena inai henanadai herevalaidia:

• Dahaka dainai Hakaua Oreana be haroro gaukara ia laloa bada?

• Dahaka dainai “hesiai tauna mai ena kamonai bona mai ena aonega” ese tanobada ibounai ai haroro gaukara ia naria be maoro?

5. Hesiai tauna mai ena kamonai ese hakaua herevadia ia henia

Hakaua Oreana ese tanobada ibounai ai Keristani tadikaka dekenai hakaua herevadia ia henia. Edena dala ai ia diba edena hakaua herevadia do ia henia? Keristani taudia ginigunadia edia nega ai, Hakaua Oreana ese ena gaukara ia karaia dalana mani ita laloa. Kara 15:​1, 2 duahia, bena inai henanadai herevalaia:

• Keristani taudia ginigunadia haida be dahaka dainai idia lalotamona lasi?

• Paulo, Banaba, bona ma haida be daidia dekenai idia lao unai hekwakwanai idia hamaoromaoroa totona?

Kara 15:​12-​18, 23-​29 duahia, bena inai henanadai herevalaia:

• Ierusalema ai aposetolo bona elda taudia idia ura abia hidi idia karaia neganai, dahaka idia karaia Dirava ena lalohadai idia abia totona?—Siri 12, 15, bona 28 itaia.

Kara 15:​30, 31 bona 16:​4, 5 duahia, bena inai henanadai herevalaia:

• Keristani ginigunadia be aposetolo bona elda taudia edia abia hidi idia kamonai neganai, dahaka idia karaia?

• Edena dala ai Iehova ese edia kamonai karana ia hanamoa?

Timoteo Iharuana 3:​16 bona Iamesi 1:5 duahia, bena inai henanadai herevalaia:

• Hari inai negai Hakaua Oreana be abia hidi ia karaia totona daika ena heduru ia tahua?

 POINT BADANA

Hakaua Oreana be Keriso ese ia abia hidi “hesiai tauna mai ena kamonai bona mai ena aonega.” Tanobada ibounai dekenai Keristani taudia dekenai Dirava ena hereva bona hakaua herevadia ia henia.

Riviu

• Daika ese “hesiai tauna mai ena kamonai bona mai ena aonega” ia abia hidi?

• Hakaua Oreana ese edena dala ai ita idia naria?

• Oi abia dae Hakaua Oreana be “hesiai tauna mai ena kamonai bona mai ena aonega,” a?