Jesus ongu ri Otjiuru tjombongo yOukriste. (Ovaefese 5:23) Ndino Jesus u hongorera po ovemukongorere mbe ri kombanda yehi okuza meyuru okupitira ‘momukarere omuṱakame nomunazondunge.’ (Lesa Mateus 24:45.) Jesus Kristus omuini ongwa zika omukarere ngo, nu we mu pa ouyara wokutjita ozondando tjiva. Posi ya, omukarere ngo ma sokukara nonḓuviro ku Kristus nokuṱakamisa ovangu ve. Omukarere ngo ouṋe? Omomuano uṋe me tu ṱakamisa?

1. Hapo “omukarere omuṱakame nomunazondunge” ouṋe?

Jehova aruhe aa ungurisa omurumendu umwe, poo okambumba okaṱiṱi kovarumendu okuyandja omuhunga kovakarere ve. (Maleaki 2:7; Ovaheberi 1:1) Kombunda yonḓiro ya Jesus, ovaapostele novatarere vombongo moJerusalem aave hongorere po ovakarere va Mukuru. (Oviungura 15:2) Momuano otjingewo, ndino okambumba okaṱiṱi kovarumendu ovakambure ke hongorera po ovakarere va Mukuru. Okambumba nga ke isanewa kutja Orutu Orunane rwOvahongonone va Jehova. Oko ke yandja oviṋa mbya zikamena kOmbeibela nokuhongorera po otjiungura tjokuzuvarisa. Nu ke tjiukwa otja “omukarere omuṱakame nomunazondunge . . .  [Jesus] ngwe mu zika.” (Mateus 24:45a) Ouṋepo auhe wOrutu Orunane orupa rwOvakriste ovatwirisiwa, mbe nomaundjiro wokukanana pu na Kristus mOuhona womayuru, indu ehupo rawo kombanda yehi tji ra yanda.

2. Ovikwaye mbya zikamena kOmbeibela omukarere omuṱakame mbye tu pa?

Jesus wa tja omukarere omuṱakame ngwi ma yandja “ovikurya moruveze ndwa tuwa po” kovakambure ovakwao. (Mateus 24:45b) Tjimuna ovikurya mbi tu rya tji vi vatera orutu rwetu okukara nomasa nokurira oruveruke, omahongero nga zikamena kEmbo ra Mukuru ye tu vatera kutja tu rire ovaṱakame ku Jehova nokuungura otjiungura Jesus tje tu pa. (1 Timoteus 4:6) Eṱe tu muna omahongero nga zikamena kOmbeibela okupitira mozombongarero zombongo, omaworonganeno worukondwa nowotukondwa, na wina okupitira momambo nouvidio mbu u tu vatera okuzuva nawa kutja Mukuru u vanga ye, nokupamisa oupanga wetu ku na ye.

 KONḒONONA OUKOTO

3. Oviungura vyovakarere va Jehova mavi sokurongerisiwa momuano omuhirona

Jesus u hongorera po Orutu Orunane okurongerisa oviungura vyOvahongonone va Jehova. Momuano otjingewo, Jesus aa hongorere po Ovakriste veserewondo etenga. Nyanda OKAVIDIO.

Lesa 1 Ovakorinte 14:33, 40, nu okuzambo hungirira kepuriro ndi:

• Omazeva nga maye raisa vi kutja Jehova u vanga kutja ovakarere ve, ve ungure oviungura vyawo mouhirona?

4. Omukarere omuṱakame u rongerisa otjiungura tjetu tjokuzuvarisa

Otjiungura tjokuzuvarisa tja ri otjiungura otjinanḓengu tjinene Ovakriste veserewondo etenga tjaave ungura. Lesa Oviungura 8:14, 25, nu okuzambo hungirira komapuriro nga:

• Mokati kOvakriste veserewondo etenga, oouṋe mbaave yandja omuhunga ohunga notjiungura tjokuzuvarisa?

• Petrus na Johanes va raisa ongaro iṋe komuhunga mbu va pewa i yovaapostele ovakwao?

Otjiungura tjokuzuvarisa otjiungura otjinanḓengu tjinene tji tji rongerisiwa i yOrutu Orunane. Nyanda OKAVIDIO.

 Jesus wa ṋunisa ounanḓengu wotjiungura tjokuzuvarisa. Lesa Markus 13:10, nu okuzambo hungirira komapuriro nga:

• Ongwaye otjiungura tjokuzuvarisa tji tji ri otjinanḓengu kOrutu Orunane?

• Ongwaye tji tu hepa “omukarere omuṱakame nomunazondunge” okurongerisa otjiungura tjokuzuvarisa mouye auhe?

5. Omukarere omuṱakame u yandja omuhunga

Orutu Orunane ru yandja omuhunga kOvakriste mouye auhe. Hapo ru tya vi kutja omuhunga uṋe mbu sokuyandjewa? Tara komuano Orutu Orunane rweserewondo etenga maaru tjiti nao. Lesa Oviungura 15:1, 2, nu okuzambo hungirira komapuriro nga:

• Otjikwaye tji tja tjita kutja pe kare ombata pokati kOvakriste tjiva veserewondo etenga?

• Paulus, Barnabas na varwe va ningira ombatero koouṋe okuzengurura ombata ndjo?

Lesa Oviungura 15:12-18, 23-29, nu okuzambo hungirira kepuriro ndi:

• Orutu Orunane rweserewondo etenga aaru tjiti vi kutja ru mune omuhunga okuza ku Mukuru, ngunda aru hi ya tjita ondando?—Tara kezeva 12, 15 no 28.

Lesa Oviungura 15:30, 31 no 16:4, 5, nu okuzambo hungirira komapuriro nga:

• Ovakriste veserewondo etenga va raisa ongaro iṋe komuhunga mbu va pewa i yorutu orunane?

• Jehova wa sera vi ondaya konḓuviro yawo?

Lesa 2 Timoteus 3:16 na Jakobus 1:5, nu okuzambo hungirira kepuriro ndi:

• Orutu Orunane ru paha pi omuhunga indu tji maru tjiti ozondando ndino?

 OKUYARUKIRA PO OUSUPI

Orutu Orunane “omukarere omuṱakame nomunazondunge” ngwa zikwa i Jesus. Orwo ru yandja omuhunga noviṋa mbya zikamena kOmbeibela kOvakriste mouye auhe.

Okurizemburukisa

• Ouṋe ngwa zika “omukarere omuṱakame nomunazondunge”?

• Omomuano uṋe Orutu Orunane mu ru tu ṱakamisa?

• Hapo ove u kambura kutja Orutu Orunane ondu ri “omukarere omuṱakame nomunazondunge”?