Jesus nya kepala eklisia Kristian. (Epesus 5:23) Kemayaharitu, iya milih “ulun ke tetap ati sereta bepenemu-dalam” ngiring nembiak iya ba dunya. (Bacha Matthew 24:45.) Taja pan “ulun” nya dipilih sereta diberi kuasa ari Jesus, tang iya patut mengkang ngasika Jesus, Tuan iya sereta bekereja ke bala menyadi Jesus. Sapa ulun nya? Baka ni iya nyaga nembiak Petara ba dunya?

1. Sapa “ulun ke tetap ati sereta bepenemu-dalam”?

Kenyau ari suba, Jehovah ngena seiku tauka seraban lelaki ngiring nembiak Iya. (Malaki 2:7; Hebrew 1:1) Pengudah Jesus mati, bala rasul enggau bala tuai ba Jerusalem ngiring nembiak Jehovah. (Surat Kereja Rasul 15:2) Kemayaharitu mega, seraban mit bala tuai gempuru ke dikumbai Raban ti Ngiring Saksi-Saksi Jehovah, nyediaka utai ti diguna ba pengarap ke nembiak Petara sereta ngiring pengawa nginjil di serata dunya. Raban tu dikumbai “ulun ke tetap ati sereta bepenemu-dalam, ke udah diasuh [Jesus].” (Matthew 24:45a) Tiap iku Raban ti Ngiring nya orang Kristian ke dipilih ngagai serega, ke deka enggau Jesus merintah dunya ila.

2. Nama “pemakai” ti disediaka ulun ke tetap ati?

Jesus madah, ulun ke tetap ati tu deka “meri [orang Kristian] pemakai ba maya ti patut.” (Matthew 24:45b) Baka pemakai ke meri kitai pengering sereta nulung kitai mengkang gerai, pengarap kitai mega begunaka “pemakai.” Nama “pemakai” nya? Ajar ari Jaku Petara. Tu deka nulung negapka pengarap kitai ngambika ulih mengkang tetap ati ngagai Jehovah sereta ngereja pengawa ti diasuh Jesus. (1 Timoti 4:6) Kitai ulih nerima ajar ti negapka pengarap ari gempuru, gempuru besai, konvensyen, sereta litaricha enggau video ti bepelasarka Bup Kudus. Semua tu nulung kitai meretika peneka Petara sereta negapka kaul kitai enggau Iya.

 BELAJAR MAYUH AGI

3. Nembiak Jehovah patut teratur

Di baruh jaga Jesus, Raban ti Ngiring ngatur pengawa Saksi-Saksi Jehovah. Orang Kristian ba abad ti keterubah mega diatur ngena chara ti sama. Mainka VIDEO.

Bacha 1 Korint 14:33, 40, lalu kerandauka tanya tu:

• Baka ni kitai nemu Jehovah dekaka nembiak Iya diatur enggau manah?

4. Ulun ke tetap ati ngatur pengawa nginjil

Pengawa nginjil nya pengawa ti pemadu beguna ti dikereja orang Kristian abad keterubah. Bacha Surat Kereja Rasul 8:14, 25, lalu kerandauka tanya tu:

• Nitihka ayat nya, sapa ke ngiring pengawa nginjil orang Kristian ba abad keterubah?

• Nama digaga Peter enggau John pengudah nerima iring ari bala rasul bukai?

Pengawa nginjil nya pengawa ti pemadu beguna ti diatur Raban ti Ngiring. Mainka VIDEO.

 Ba Jesus pengawa nginjil nya amat beguna. Bacha Mark 13:10, lalu kerandauka tanya tu:

• Nama kebuah pengawa nginjil beguna bendar ba Raban ti Ngiring?

• Nama kebuah kitai begunaka atur ari “ulun ke tetap ati sereta bepenemu-dalam” ba pengawa nginjil di serata dunya?

5. Ulun ke tetap ati meri iring

Raban ti Ngiring meri iring ngagai nembiak Jehovah di serata dunya. Baka ni sida ngaga pemutus lebuh sida deka meri iring? Peratika chara raban ti ngiring ba abad keterubah ngaga pemutus. Bacha Surat Kereja Rasul 15:1, 2, lalu kerandauka tanya tu:

• Nama utai ke ngasuh orang Kristian abad keterubah bekelikuh enggau pangan diri?

• Paul, Barnabas, enggau orang bukai minta iring ari sapa kena mutarka penanggul nya?

Bacha Surat Kereja Rasul 15:12-18, 23-29, lalu kerandauka tanya tu:

• Ngambika bulih iring ari Petara, nama utai ke diperatika raban ti ngiring ba abad keterubah?—Peda ayat 12, 15, enggau 28.

Bacha Surat Kereja Rasul 15:30, 31 enggau 16:4, 5, lalu kerandauka tanya tu:

• Nama digaga orang Kristian abad keterubah pengudah nerima iring ari raban ti ngiring?

• Nama berekat ke diulih sida ketegal ngasika iring?

Bacha 2 Timoti 3:16 enggau James 1:5, lalu kerandauka tanya tu:

• Ari ni Raban ti Ngiring bulih iring lebuh ngaga pemutus kemayaharitu?

 LANSA

Raban ti Ngiring nya “ulun ke tetap ati sereta bepenemu-dalam” ke dipilih Kristus. Ulun tu meri iring sereta utai ti negapka pengarap ngagai nembiak Jehovah di serata dunya.

Ulang Kaji

• Sapa ke milih “ulun ke tetap ati sereta bepenemu-dalam”?

• Baka ni Raban ti Ngiring nyaga kitai?

• Kati nuan pechaya Raban ti Ngiring nya “ulun ke tetap ati sereta bepenemu-dalam”?