Ohɔnyɛta wɛ otrɛyi ku ujɔ ku Ācɛ O Yɛɔce Ukraist a. (Ācɛ Ɛ́fēsɔsi 5:23) Icɛ, o bu ipu “ɔ̄cocɛ̄hɔ̄ néē cíkā ō lɛ ɔtū ce ɔ́ nōo jéeyī” a, Ujisɔsi yɔ i da ayikpo ku nu ɔdā néē cika ō ya ŋma ɛga nɛ ó yɔ ɔkpanco a. (Jé Umátiyu 24:45.) Abɔ é miyɛ ɛga nyā ŋma ɛgiyi Ujisɔsi abɔyi nu a, “ɔ̄cocɛ̄hɔ̄” a lɛ íkwu ō ya ōmiya ōhī amáŋ ɔcocɛhɔ a cika ō lɛyitaajɛ lɛ Ujisɔsi klla cɛ ayinɛ ku Ukraist ɛhɔ. Ɔnyɛ wɛ ɔcocɛhɔ nyā a? Ɛgɛnyá nɛ ɔcocɛhɔ a gē teyi tu alɔ a?

1. Ɔnyɛ wɛ “ɔ̄cocɛ̄hɔ̄ néē cíkā ō lɛ ɔtū ce ɔ́ nōo jéeyī” a?

Ujehofa humayi bi ɔcɛ amāŋ ígwu nɛ̄ŋcɛ́ ku alɛɛcɛ le ma ɔwɛ fu lɛ ācɛ ɔlɛ nu ɛ. (Umálakāyi 2:7; Ācɛ Uhíbru 1:1) Igbihi nɛ Ujisɔsi gekwu a, ayikpo a mla anyakwɔcɛ ku ujɔ ipu Ujerusalɛm gbɔɔ ō ma ɔwɛ fu lɛ Ācɛ O Yɛce Ukraist. (Úklɔ́ kú Ācotɛ̄hɔ̄ 15:2) O bu ipu ɔwɛ ekponu ɔɔma, ígwu nɛ̄ŋcɛ́ ku anyakwɔcɛ icɛ néē i hi ka Ígwu Nōo Gē Leyi Kwu Ɔwa ku Ācɛ Ocijali Ku Ujehofa a yɔ i je ɔdole ku alelekwu lɛ alɔ klla yɔ i da alɔ ɛgɛ nɛ uklɔ ku ɔna ō ta géē yɔ i nyɔ lɛ a. Ígwu nyā kē “wɛ ɔ̄cocɛ̄hɔ̄ néē cíkā ō lɛ ɔtū ce ɔ́ nōo jéeyī nɛ [Ujisɔsi] fu” a. (Umátiyu 24:45a) Ɛjɛɛji ācɛ nōo yɔ ipu Ígwu Nōo Gē Leyi Kwu Ɔwa Ku Alɔ a wɛ Ācɛ Ō Yɛce Ukraist néē lɛ anɔ tu uwa ɛyi, é kē lɛ eyiyoce ō lé ɔcɛ́ tɔha mla Ujisɔsi Ajɔɔcɛ ku nu ɔkpanco eko duuma nɛ oyeeyi ku uwa mɛ ipu ɛcɛ nyā.

2. Ɛdɔ ɔdole ku ɛlā Ɔwɔico nyá nɛ ɔcocɛhɔ néē cika ō lɛ ɔtu ce ɔ nōo jeeyi a gē je lɛ alɔ a?

Ujisɔsi ka ɔcocɛhɔ néē cika ō lɛ ɔtu ce ɔ nōo jeeyi a géē yɔ i “je ɔdōlé lɛ [Ācɛ O Yɛce Ukraist ɔmpa uwa ta] eko.” (Umátiyu 24:45b) Ɛgɛ nɛ ɔdole ɔlamu gē tu alɔ abɔ lɔfu iyē klla ya ku ɔkpiye ku alɔ kóō lɔhi ō má eyī a, ɛgɔɔma nɛ ɔdole ku ɛlā Ɔwɔico gē je ɔfu nɛ alɔ cɛgbá a lɛ alɔ o ya ɛɛ ku alɔ hayi kpaakpa lɛ Ujehofa klla yɔ i yuklɔ nɛ Ujisɔsi je lɛ alɔ ō ya a. (1 Utímōti 4:6) Alɔ gē miyɛ ɔdole ku ɛlā Ɔwɔico ɔɔma o bu ipu ōjila ku ujɔ, ojileyi ku usɛkut mla ojileyi nɛhi ku alɔ. Alɔ klla i miyɛ ɔdole a ŋma ō yɔ i jé aɔkpá mla ō yɔ i má auvidio ku alɔ. É géē tu alɔ abɔ jé ɔdā nōo wɛ ococɛ ku Ɔwɔico klla i tu alɔ abɔ ku alɔ lɔfu tu ɛma nɛ alɔ lɛ mla Ujehofa a iyē.

 JÉ GƆBU

3. Ācɛ ɔlɛ Ujehofa cika ō yɔ i ya odee ɔwɛ okpaakpa

Oŋma lɛ ɔ́da ku Ujisɔsi, Ígwu Nōo Gē Leyi Kwu Ɔwa Ku Alɔ a yɔ i miya ɛgɛ nɛ uklɔ ku Ācɛ Ocijali Ku Ujehofa géē yɔ i nyɔ mɛɛlɛ ɔwɛ okpaakpa a. Ōmiya ekponu ɔɔma kē ya ɛpleeko ku Ācɛ O Yɛce Ukraist ku eko aflɛyi a duu. Lɛ UVIDIO nyā mafu.

Jé 1 Ācɛ Ukɔ́rīnti 14:33, 40, cɛɛ ku aa kɔka lɛyikwu ɔka nyā:

• Ɛgɛnyá nɛ aɔgba nyā mafu ka Ujehofa dɔka ka ācɛ ɔlɛ nu kē yɔ i ya odee ɔwɛ okpakpa a?

4. Ɔcocɛhɔ néē cika o lɛ ɔtu ce ɔ a gē miya ɛgɛ nɛ uklɔ ku ɔna ō ta géē yɔ i nyɔ a

Uklɔ ku ɔna ō ta a wɛ uklɔ nōo cɛgbá fiyɛ duu lɛ Ācɛ O Yɛce Ukraist ku eko aflɛyi a. Jé Úklɔ́ kú Ācotɛ̄hɔ̄ 8:14, 25, cɛɛ ku aa kɔka lɛyikwu aɔka nōo ba nyā:

• Ɔtahɛ Ācɛ O Yɛce Ukraist ku eko aflɛyi a, ɔnyɛ gē miya ɛgɛ nɛ ɔna ō ta a géē yɔ i nyɔ a?

• Ɛgɛnyá nɛ Upita mla Ujɔni cɛ mla ōmiya ku acocɛhɔ ɔmpa uwa a?

Uklɔ ku ɔna ō ta a wɛ uklɔ nōo cɛgbá fiyɛ duu nɛ Ígwu Nōo Gē Leyi Kwu Ɔwa Ku Alɔ a gē ya ōmiya ku nu a. Lɛ UVIDIO nyā mafu.

 Ujisɔsi ka ɔdā nōo ya nɛ uklɔ ku ɔna ō ta a cɛgbá nɛhi a. Jé Umáki 13:10, cɛɛ ku aa kɔka lɛyikwu aɔka nōo ba nyā:

• Ɔdiya nɛ uklɔ ku ɔna ō ta a cɛgbá nɛhi lɛ Ígwu Nōo Gē Leyi Kwu Ɔwa Ku Alɔ a?

• Ɔdiya nɛ alɔ cɛgbá “ɔ̄cocɛ̄hɔ̄ néē cíkā ō lɛ ɔtū ce ɔ́ nōo jéeyī” a kóō yɔ i miya ɛgɛ nɛ uklɔ ku ɔna ō ta a gē yɔ i nyɔ lɛ ipu oduudu ɛcɛ a?

5. Ɔcocɛhɔ néē cika ō lɛ ɔtu ce ɔ a gē ma ɔwɛ fu lɛ alɔ a

Ígwu Nōo Gē Leyi Kwu Ɔwa Ku Alɔ a gē ma ɔwɛ fu lɛ Ācɛ O Yɛce Ukraist ipu oduudu ɛcɛ a. Ɛgɛnyá néē gē ya ōmiya ku ɔwɛ ō bi le ya odee ōhī néē gē mafu lɛ alɔ a? Leyi yɛ ɛgɛ nɛ ígwu nōo gē leyi kwu ɔwa ku Ācɛ O Yɛce Ukraist ku eko aflɛyi a gē ya ɛnyā a. Jé Úklɔ́ kú Ācotɛ̄hɔ̄ 15:1, 2, cɛɛ ku aa kɔka lɛyikwu aɔka nōo ba nyā:

• Ɔdi nɛ Ācɛ O Yɛce Ukraist ku eko aflɛyi a ōhī i cɛtɔha mla anu ŋ ma?

• Ɛgiyi ɔnyɛ nɛ Upɔlu, Ubanabasi mla ācɛ ɔhá a nyɔ o ya ɛɛ kéē lɛ ɛlā a ka gwo a?

Jé Úklɔ́ kú Ācotɛ̄hɔ̄ 15:12-18, 23-29, cɛɛ ku aa kɔka lɛyikwu ɔka nyā:

• Gbɔbu ɛɛ ku ígwu nōo gē leyi kwu ɔwa ku eko aflɛyi kéē ya ōmiya, ɔdi néē gē ya o ya ɛɛ ku Ɔwɔico kóō ma ɔwɛ fu lɛ uwa ipu āhɔ̄ a? —Má ɔgba 12, 15, mla 28

Jé Úklɔ́ kú Ācotɛ̄hɔ̄ 15:30, 31; 16:4, 5, cɛɛ ku aa kɔka lɛyikwu aɔka nōo ba nyā:

• Ɛgɛnyá nɛ Ācɛ O Yɛce Ukraist ku eko aflɛyi a ya lɛyikwu ɔwɛ nɛ ígwu nōo gē leyi kwu uwa yɔ i mafu lɛ uwa a?

• Ɛgɛnyá nɛ Ujehofa hɔha ce ɛyi ō le taajɛ ku uwa a?

Jé 2 Utímōti 3:16 mla Ujɛ́mīsi 1:5, cɛɛ ku aa kɔka lɛyikwu ɔka nyā:

• Imi nɛ Ígwu Nōo Gē Leyi Kwu Ɔwa Ku Alɔ a gē dɔka otabɔ ŋma eko duuma néē gáā ya ōmiya icɛ a?

 ƆDI NƐ A NWU A?

Ígwu Nōo Gē Leyi Kwu Ɔwa Ku Alɔ a wɛ “ɔ̄cocɛ̄hɔ̄ néē cíkā ō lɛ ɔtū ce ɔ́ nōo jéeyī” nɛ Ujisɔsi fu a. É gē ma ɔwɛ fu klla gē je ɔdole ku ɛlā Ɔwɔico lɛ Ācɛ O Yɛce Ukraist ipu oduudu ɛcɛ.

Aɔka ō tu alɔ ɛlá kwu ɔdā nɛ alɔ nwu

• Ɔnyɛ fu “ɔ̄cocɛ̄hɔ̄ néē cíkā ō lɛ ɔtū ce ɔ́ nōo jéeyī” a?

• Ɛgɛnyá nɛ Ígwu Nōo Gē Leyi Kwu Ɔwa Ku Alɔ a gē teyi tu alɔ a?

• A kpɔtuce ku Ígwu Nōo Gē Leyi Kwu Ɔwa Ku Alɔ a wɛ “ɔ̄cocɛ̄hɔ̄ néē cíkā ō lɛ ɔtū ce ɔ́ nōo jéeyī” a?