IJisọsị à ri Olegbeju nya Ọjịra-jịra lẹ. (Ala Efesọsị 5:23) Lẹẹlẹẹ ọ wẹẹ kpa angịnyị nyamwụ ilodehe ụgbẹyị bwu epwoohe bwula “ọnchẹ ọ-chịla o-hu ọkịlẹtụ ha bala ọngọ jẹ́ ẹla.” (Wa ịMatiyu 24:45.) IJisọsị lịlọmwụ à chụ “ọnchẹ” ọwẹ bala ọ-ya ọngịrị họọ nyọka cheje ịhyẹ lẹ. Ọ tị lịnyị odu lẹ, o ri ọnchẹ nya ịKịrayịsị wẹẹ, ọ ka jwoo ihi bala ọ-myị ẹrụ ha anyịnịna nya ịKịrayịsị pyii. Owo ọnchẹ ọwẹ à tị́ ri? Ányị ọnchẹ ọwẹ à tị́ kaa kpẹhị rịrịịhị?

1. Owo à tị́ ri “ọnchẹ ọ-chịla o-hu ọkịlẹtụ ha bala ọngọ jẹ́ ẹla”?

Gbalẹ-gbalẹ, iJihova kaa kpa angịnyị nyamwụ ụgbẹyị bwula ọngịnyị ehe ọhẹ lee ebwo nya angịnyị. (ỊMalakayị 2:7; Ala iHiburu 1:1) Nyọlẹ ká iJisọsị gbu kpá, alẹrụ nyamwụ bala angịgbahị ịla iJerusalẹm dọmwụ nyọka kpịlahị. (Ụkụrwọ nya Alẹrụ 15:2) Ụgbẹyị ọlịnyị-ịnyị ebwo ochiche nya angịgbahị ịhyẹ à kaa kpịlahị alẹ lẹ. Ị kaa wụrụ ebwo ọwẹ nya Angị Kpẹhị Rịrị Ogu nya Alibeenu nya iJihova. Ebwo ọwẹ kaa nwụla ang oriri nya olegu nọ bala ọ-kpịlahị nya ụkụrwọ nya ẹrụ ọnyịịla. Ebwo ọwẹ à ri “ọnchẹ ọ-chịla o-hu ọkịlẹtụ ha bala ọngọ jẹ́ ẹla” ọlẹ ká iJisọsị “hu” lẹ. (ỊMatiyu 24:45a) Angị Kpẹhị Rịrị Ogu wuu ri angịlẹ ká Ohe ya ida wụ́ bwula olegu ịgọgọ, kị tị la ẹhị ọrịrịị-rịrị nyọka kpeji bala ịKịrayịsị e-epwoohe ụka kị họ ụkụrwọ nyaa olodehe kpá.

2. Ang oriri nya olegu iyina ọnchẹ ọ-chịla o-hu ọkịlẹtụ ha à tị́ kaa nwụlanọ?

IJisọsị ya nyori ọnchẹ ọ-chịla o-hu ọkịlẹtụ ha nyị ka “hu ang oriri ha [angịnyị nya ịKịrayịsị ịkịla] ri lụka ọchịla-chịla.” (ỊMatiyu 24:45b) Ang oriri ọlam oriri kaa dahị ụbwọ nyọka la gogo ị-ịnyịrọ. Ịnyịnyị ang oriri nya olegu, ko ri ẹla ọmẹjẹ bwu Omyi Ẹla nya Ohe, à kaa ya ọngịrị hahị nyọka ju ihi nya iJihova bala ọ-ka họ ụkụrwọ ọlẹ ká iJisọsị ya juhi ụ-ụbwọ lẹ. (1 iTimoti 4:6) Ahị kaa ye ang oriri nya olegu ọwẹ ri bwu ọjịra-jịra nya epwihi-epwihi, ọjịra-jịra nya isekut, ọjịra-jịra ịtụka, bwula apwụ ị-da ịBayịbụụ wụlẹ bala ifim ịlẹ kị kaa dahị ụbwọ nyọka jẹ́ irya nya Ohe bala o-ju igu oriri nyahị ọngịrị balọọ.

 JẸ́ GỤ ỌỌWA

3. Angịnyị nya iJihova ka họ ụkụrwọ lawụlẹ pyii

E-ekpeleji nya olegbeju oriri nya iJisọsị, Angị Kpẹhị Rịrị Ogu kaa maga ká ụkụrwọ nya iJihova ka jẹ memeeme. IJisọsị kpa angịnyị nyamwụ iloyi nya ọgbanyẹ ụgbẹyị ịwịịwẹ. Yẹ IFIM ọwẹ.

Wa 1 Ala ịKọrịntị 14:33, 40, kanụ ya ẹla u-uhye nya ịtọ ẹla ọlẹ:

• Ányị ọgba ọwẹ à tị́ mẹjẹ nyori iJihova tịtọ ká Alibeenu nyamwụ ka họ ang lawụlẹ?

4. Ọnchẹ ọ-chịla o-hu ọkịlẹtụ ha kaa kpẹhị rịrị ẹrụ ọnyịịla ọ-kpa pyẹ

Ẹrụ ọnyịịla ọ-kpa pyẹ à ri ụkụrwọ ọgụgụ wuu ọlẹ ká Angịnyị nya ịKịrayịsị nya ọgbanyẹ kaa họ lẹ. Wa Ụkụrwọ nya Alẹrụ 8:14, 25, kanụ ya ẹla u-uhye nya ịtọ ẹla ịlẹ:

• Ẹ-ẹpwarịrị nya Angịnyị nya ịKịrayịsị nya ọgbanyẹ, owo à tị́ kpịlahị nya ẹrụ ọnyịịla ọ-kpa pyẹ?

• Ányị iPita bala ịJọn à tị́ họ nyọlẹ ká alẹrụ ịkịla ya ụkụrwọ haa?

Ẹrụ ọnyịịla ọ-kpa pyẹ à ri ụkụrwọ ọgụgụ wuu ọlẹ ká Angị Kpẹhị Rịrị Ogu kaa họ lẹ. Yẹ IFIM ọwẹ.

 IJisọsị ya jaabwọ ká ẹrụ ọnyịịla ọ-kpa pyẹ baba ka ba. Wa ịMakị 13:10, kanụ ya ẹla u-uhye nya ịtọ ẹla ịlẹ:

• Ịyẹ tị́ du ká ẹrụ ọnyịịla ọ-kpa pyẹ ri ụkụrwọ ọbaba ha Angị Kpẹhị Rịrị Ogu ịịwẹ?

• Ịyẹ tị́ du kahị baba nya “ọnchẹ ọ-chịla o-hu ọkịlẹtụ ha bala ọngọ jẹ́ ẹla” nyọka kpẹhị rịrị ụkụrwọ nyahị ọla odehe wuu?

5. Ọnchẹ ọ-chịla o-hu ọkịlẹtụ ha kaa kpahị ụgbẹyị

Angị Kpẹhị Rịrị Ogu kaa mẹ ang jẹ Angịnyị nya ịKịrayịsị ịla ịkịka nya odehe wuu. Ányị ị tị́ kaa bwu cheje u-uhye nya ẹla ọlẹ kị ka mẹjẹ? Yẹ jaabwọ ká angị kpẹhị rịrị ogu ịla oyi ọhọhẹ kaa họ lẹẹ. Wa Ụkụrwọ nya Alẹrụ 15:1, 2, kanụ ya ẹla u-uhye nya ịtọ ẹla ịlẹ:

• Ẹlịyẹ à tị́ kpa o-wo lawụlẹ-ka wẹ ẹpwarịrị nya Angịnyị nya ịKịrayịsị nya ọgbanyẹ?

• Ẹga nya owo ịPọlụ, ịBanabasị, bala angịkịla à tị́ ka nyọka myị́ ẹla ọwa?

Wa Ụkụrwọ nya Alẹrụ 15:12-18, 23-29, kanụ ya ẹla u-uhye nya ịtọ ẹla ọlẹ:

• Ene ká angị kpẹhị rịrị ogu ịla oyi nya ọgbanyẹ ka cheje, ịyẹ ị tị́ kụ ẹhị yẹ nyọka jẹ́ ẹla ọlẹ ká Ohe tịtọ?—Yẹ ọgba 12, 15, bala 28.

Wa Ụkụrwọ nya Alẹrụ 15:30, 31 bala 16:4, 5, kanụ ya ẹla u-uhye nya ịtọ ẹla ịlẹ:

• Ányị Angịnyị nya ịKịrayịsị nya ọgbanyẹ à tị́ họ nyọlẹ kị wo ẹla bwu ẹga nya angị kpẹhị rịrị ogu?

• Ányị iJihova à tị́ wahị kụrụ ihi ojuju nyaa?

Wa 2 iTimoti 3:16 bala iJemsi 1:5, kanụ ya ẹla u-uhye nya ịtọ ẹla ọlẹ:

• Ịyẹ à tị́ kaa kpa Angị Kpẹhị Rịrị Ogu ụgbẹyị ụka kị ja cheje nya ẹla alẹ?

 ẸLỊYẸ A TỊ́ JẸ́?

Angị Kpẹhị Rịrị Ogu à ri “ọnchẹ ọ-chịla o-hu ọkịlẹtụ ha bala ọngọ jẹ́ ẹla” ọlẹ ká ịKịrayịsị chụ lẹ. Ọnchẹ ọwẹ kaa kpa Angịnyị nya ịKịrayịsị ịla ịkịka nya odehe wuu ụgbẹyị bala ọ-ya ang oriri nya olegu haa ri.

Ẹlịyẹ A Tị́ Yụbwọ Chị?

• Owo à tị́ chụ “ọnchẹ ọ-chịla o-hu ọkịlẹtụ ha bala ọngọ jẹ́ ẹla”?

• Ányị Angị Kpẹhị Rịrị Ogu à tị́ kaa kpẹhị rịrịịhị?

• À myị nyori Angị Kpẹhị Rịrị Ogu à ri “ọnchẹ ọ-chịla o-hu ọkịlẹtụ ha bala ọngọ jẹ́ ẹla” lẹ?