LESN 54

A Uu A “Di Waiz Sorvant We Di Maasta Kyan Chos” An A Wa Da Sorvant De Du?

PLIE

A Jiizas a di ed fi aal a di kanggrigieshan dem. (Ifiijan 5:23) Rait ya nou Jiizas de a evn, an im a yuuz “di waiz sorvant we [im] kyan chos” fi liid im falara dem. (Riid Matyu 24:45.) Kaaz a Jiizas put “di waiz sorvant” inchaaj, dat miin se di sorvant av di rait fi du sortn an sortn tingz, bot dat no miin se da sorvant de kyan du eni an eniting we im waahn fi du. Di sorvant afi du wa Jiizas se im fi du an im afi wok wid di wan dem we Gad pik fi go a evn. Bot a uu a da waiz sorvant de? An wa da sorvant de du fi tek kier a wi?

1. A uu “a di waiz sorvant we di maasta kyan chos”?

Jeuova aalwiez mek im piipl dem nuo wa fi du. Som a di taim a onggl wan man im yuuz fi liid dem, an som ada taim im pik som man fi wok tugeda an dem mek im piipl nuo wa fi du. (Malikai 2:7; Iibruu 1:1) Afta Jiizas ded, wi si se a di apasl dem an di elda dem we did iina Jeruusilem did a wok tugeda fi liid Gad piipl dem. (Aks 15:2) A siem so tide Gad pik som breda we a elda fi wok tugeda fi liid im piipl dem, an dem niem di Govanin Badi fi di Jeuova Witnis dem. Di Govanin Badi mek shuor se wi av di sitn dem we wi niid fi kip wi kluos tu Jeuova, an dem mek di breda an sista dem we de aal uova di worl nuo wa fi du so dat dem kyan priich tu piipl an tiich dem. Da gruup a man de a ‘di waiz sorvant we Jiizas kyan chos we im put inchaaj fi dwi’im wok.’ (Matyu 24:45) Aal a di Govanin Badi breda dem a man dem we Gad pik fi go a evn, an it mek dem api fi nuo se wen dem ded, dem a-go get fi go a evn fi go ruul wid Krais Jiizas iina im Kindom.

2. Wa a di sitn dem we di waiz sorvant gi wi fi elp wi kip kluos tu Jeuova?

Wen Jiizas did a taak bout di waiz sorvant, im did se di sorvant wuda ‘shier out fuud fi [di ada piipl dem we a sorv Gad] wen a taim fi dem nyam.’ (Matyu 24:45) Ef wi waahn fi kip wi badi chrang wi nuo se wi afi nyam som gud fuud. Bot di fuud we di waiz sorvant shier out a di sitn dem we wi get fram Gad Wod, an a dem sitn de mek wi kyan gwaan tan op chrang an stik tu Jeuova an du di wok we Jiizas se wi fi du. (1 Timoti 4:6) A nof difrant tingz wi get we elp wi fi kip kluos tu Jeuova, laik di buk an pamplet dem an di vidiyo dem we wi yuuz fi stodi Gad Wod, an wi miitn dem, wi sorkit miitn dem, an wi kanvenshan dem. Aal a dem sitn ya elp wi fi nuo wa Gad waahn wi fi du an dem elp wi fi kip kluos kluos tu im.

LORN SOM MUO

Luk pan wa mek wi afi av di Govanin Badi uu a “di waiz sorvant we di maasta kyan chos” fi liid wi.

Di Govanin Badi gi wi di sitn dem we wi niid fi kip kluos tu Jeuova, dem tel wi wa fi du, an dem du tingz fi elp di Jeuova Witnis dem we de aal uova di worl

3. Jeuova piipl afi wok tugeda so tingz kyan ron sortn an sortn wie

Jiizas yuuz di Govanin Badi fi mek di Jeuova Witnis dem nuo wa fi du so dat tingz kyan ron sortn an sortn wie. A sitn laik dat did gwaan mongks di Kristiyan dem we did a liv bak iina Baibl taim. Plie di VIDIYO.

VIDIYO: Jeuova Mek Tingz Ron Sortn An Sortn Wie Mongks Im Piipl (6:18)

Riid 1 Korintiyan 14:33, 40, an den wi a-go taak bout da kwestiyan ya:

Ou wi nuo se Jeuova av fi’im wie we im waahn im piipl fi du tingz?

4. Di waiz sorvant tel wi wa fi du so dat di priichin wok kyan gwaan iina sortn an sortn wie

Di bigis ting fi di Kristiyan dem we did de bout iina Baibl taim a did fi priich tu piipl an tiich dem bout di Baibl. Riid Aks 8:14, 25, an den wi a-go taak bout dem kwestiyan ya:

Wen di Kristiyan dem iina Baibl taim did a priich, a uu did tel dem we fi go an wa fi du?
Wen di apasl dem did tel Piita an Jan wa fi du, a wa dem did go du?

Di bigis ting fi di Govanin Badi a fi mek shuor se di priichin wok kyan gwaan iina sortn an sortn wie. Plie di VIDIYO.

VIDIYO: Di Wok We Wi Du Fi Priich Tu Piipl An Tiich Dem—A Dat A Di Bigis Ting Fi Dem (1:24)

Jiizas did mek wi nuo se fi go priich tu piipl an tiich dem a di bigis ting dat. Riid Maak 13:10, an den wi a-go taak bout dem kwestiyan ya:

Wa mek di wok we wi du fi go priich tu piipl an tiich dem a wan big ting fi di Govanin Badi?
Wa mek wi niid “di waiz sorvant we di maasta kyan chos” fi tel wi wa fi du so dat da wok ya kyan gwaan aal uova di worl?

5. Di waiz sorvant mek wi nuo wa fi du

Di Govanin Badi mek di breda an sista dem we de aal uova di worl nuo wa fi du. Ou dem nuo wa an wa fi tel di breda an sista dem an wen dem fi tel dem bout it? Mek wi luk pan wa di Govanin Badi we did inchaaj a di Kristiyan dem iina Baibl taim did du. Riid Aks 15:1, 2, an den wi a-go taak bout dem kwestiyan ya:

Wa som a di Kristiyan dem we did de bout iina Baibl taim did a aagyu bout?
A uu Paal an Baanabas an som ada man did go tu fi saat out tingz?

Riid Aks 15:12-18, 23-29, an den wi a-go taak bout da kwestiyan ya:

Ou di Govanin Badi did mek shuor se dem get fi nuo wa Gad waahn dem fi du bifuo dem mek op dem main fi du sitn?—Luk pan vors 12, 15, an 28.

Riid Aks 15:30, 31 an 16:4, 5, an den wi a-go taak bout dem kwestiyan ya:

Di Kristiyan dem we did de bout iina Baibl taim, wen dem ier wa di Govanin Badi se, ou dem did fiil bout dat?
Kaa dem did du wa di Govanin Badi se dem fi du, ou Jeuova did bles dem?

Riid 2 Timoti 3:16 an Jiemz 1:5, an den wi a-go taak bout da kwestiyan ya:

Wa elp di Govanin Badi fi nuo wa fi du?

SUMADI MAIT-A SE: “Ef yu du wa di Govanin Badi se yu fi du a no Gad ya’a fala, a man ya’a fala.”

Wa mek yu nuo fi shuor se a Jiizas a mek di Govanin Badi nuo wa fi du?

DIS A WA YU FI MEMBA

Di Govanin Badi a “di waiz sorvant we di maasta kyan chos” an a Jiizas put da sorvant de inchaaj a im wok. Di Govanin Badi mek di breda an sista dem we de aal uova di worl nuo wa fi du an gi dem di tingz we dem niid fi kip kluos tu Jeuova.