Yesũ nĩwe Mũtwe wa kĩkundi kya Kĩklĩsto. (Aeveso 5:23) Ũmũnthĩ, e ĩtunĩ, nũtongoeasya aatĩĩi make vaa ĩũlũ wa nthĩ atũmĩĩte “ngombo ndĩkĩĩku na mbũĩ.” (Soma Mathayo 24:45.) Nũndũ Yesũ mwene nĩwe ũnyuvĩte “ngombo” ĩsu, nĩyĩthĩawa na ũkũmũ wĩana ũna. Ĩndĩ yaĩle kũendeea kwĩthĩwa yĩ ngombo ya Klĩsto na kũthũkũma ana-a-asa ma Klĩsto. Yo ngombo ĩsu nũũ? Na ĩtũsũvĩaa ata?

1. “Ngombo ndĩkĩĩku na mbũĩ” nũũ?

Yeova nĩwĩthĩĩtwe aitũmĩa mũndũ kana kĩkundi kĩnini kya andũ kũtongoesya andũ make. (Malaki 2:7; Aevelania 1:1) Ĩtina wa Yesũ kũkwʼa, atũmwa na atumĩa ala maĩ Yelusaleme nĩmo mambĩĩie kũtongoesya. (Meko ma Atũmwa 15:2) Ũmũnthĩ, o tũatĩĩe ngelekanyʼo ĩsu, Nzama Ĩla Ĩtongoesye ya Ngũsĩ sya Yeova nĩyo ĩseũvasya lĩu wa kĩ-veva na kũtongoesya wĩanĩ wa kũtavanyʼa. Na nzama ĩsu nĩyo “ngombo ndĩkĩĩku na mbũĩ ĩla [Yesũ] wamĩnyuvie.” (Mathayo 24:45a) Onthe ala me Nzamanĩ Ĩla Ĩtongoesye nĩ Aklĩsto etĩkĩwʼa mauta, ala meteele kũsumbĩka ĩtunĩ vamwe na Klĩsto Ũsumbĩnĩ wake, mamina kyalo kyoo vaa ĩũlũ wa nthĩ.

2. Nĩ lĩu wĩva wa kĩ-veva ũseũvawʼa nĩ ngombo ĩsu ndĩkĩĩku?

Yesũ aisye kana ngombo ĩsu ndĩkĩĩku yaĩ ‘ĩnengae Aklĩsto ala angĩ lĩu ĩvinda yĩla yaĩle.’ (Mathayo 24:45b) O tondũ lĩu ũla tũĩsaa ũtũtetheeasya kwĩthĩwa na mĩĩ mĩlũmu na tũiendeea nesa, o nawʼo lĩu wa kĩ-veva, ũla nĩ motao ala tũnengawe kuma Ndetonĩ ya Ngai, nũtũnengae vinya nĩ kana tũendeee kũlũmanyʼa na Ngai, na tũyĩanĩsya wĩa ũla Yesũ watũnengie. (1 Timotheo 4:6) Tũkwataa lĩu ũsu wa kĩ-veva kwĩsĩla maũmbano ma kĩkundi, maũmbano manene, o na kwĩsĩla vitio na mavuku maitũ ala maeleetye Mbivilia, ala matũtetheeasya kũelewa kwenda kwa Ngai nĩ kwĩva, na mailũlũmĩĩlya ngwatanĩo yitũ vamwe nake.

 ĨMANYĨSYE MŨNANGO

3. Andũ ma Yeova no nginya methĩwe mavangĩtwe nesa

Nzama Ĩla Ĩtongoesye nĩyo ĩvangĩthasya wĩa wa Ngũsĩ sya Yeova, ĩtongoewʼe nĩ Yesũ. Mũvango ta ũsu waĩ o kwʼo ĩvindanĩ ya Aklĩsto ma mbee. Ĩloelei VITIO.

Somai 1 Akolintho 14:33, 40, na ĩndĩ mũineenea ĩkũlyo yĩĩ:

• Mĩsoa ĩsu yoonanyʼa ata kana Yeova endaa andũ make methĩwe mavangĩtwe nesa ta kĩkundi?

4. Ngombo ndĩkĩĩku nĩyo ĩvangĩthasya wĩa wa kũtavanyʼa

Wĩa ũla wa vata vyũ watethawʼa nĩ Aklĩsto ma mbee nĩ kũtavanyʼa. Somai Meko ma Atũmwa 8:14, 25, na ĩndĩ mũineenea makũlyo aa:

• Ĩvindanĩ ya atũmwa, naaũ matongoesye wĩa wa kũtavanyʼa?

• Vetelo na Yoana meekie ata ĩtina wa atũmwa ala angĩ kwĩka ũtwi mũna?

Wĩa ũla wa vata vyũ ũvangĩthawʼa nĩ Nzama Ĩla Ĩtongoesye nĩ wĩa wa kũtavanyʼa. Ĩloelei VITIO.

 Yesũ nĩwakindĩlĩĩile ũndũ wĩa wa kũtavanyʼa ne wa vata. Somai Maliko 13:10, na ĩndĩ mũineenea makũlyo aa:

• Nĩkĩ Nzama Ĩla Ĩtongoesye yonaa wĩa wa kũtavanyʼa wĩ wa vata mũno?

• Nĩkĩ “ngombo ndĩkĩĩku na mbũĩ” yaĩle kũtongoesya wĩa wa kũtavanyʼa ĩũlũ wa nthĩ yonthe?

5. Ngombo ndĩkĩĩku nĩnenganae myolooto

Nzama Ĩla Ĩtongoesye nĩyo ĩnenganae myolooto ĩla yaĩle kũatĩĩwa nĩ Aklĩsto onthe ĩũlũ wa nthĩ. Matusaa ata nĩ myolooto yĩva maĩle kũnengane? Soma wone ũndũ Nzama Ĩla Ĩtongoesye ya ĩvinda ya atũmwa yeekie. Somai Meko ma Atũmwa 15:1, 2, na ĩndĩ mũineenea makũlyo aa:

• Nĩ ũndũ wĩva watumie Aklĩsto ma ĩvinda ya atũmwa matakwatĩanĩa?

• Vaulo, Valanava, na ala angĩ maendie kũmantha ũtethyo kũla kwĩ aaũ nĩ kana mamine thĩna ũsu?

Somai Meko ma Atũmwa 15:12-18, 23-29, na ĩndĩ mũineenea ĩkũlyo yĩĩ:

• Ĩtanamba kwĩka ũtwi, Nzama Ĩla Ĩtongoesye yeekie ata nĩ kana ĩmanye woni wa Ngai ĩũlũ wa ũndũ ũsu?—Sisya mũsoa wa 12, 15, na 28.

Somai Meko ma Atũmwa 15:30, 31 na 16:4, 5, na ĩndĩ mũineenea makũlyo aa:

• Aklĩsto ma ĩvinda ya atũmwa meekie ata yĩla Nzama Ĩla Ĩtongoesye yeekie ũtwi?

• Yeova amaathimie ata nũndũ wa kwĩthĩwa me ewi?

Somai 2 Timotheo 3:16 na Yakovo 1:5, na ĩndĩ mũineenea ĩkũlyo yĩĩ:

• Ũmũnthĩ Nzama Ĩla Ĩtongoesye ĩmanthaa ũtao va yĩla ĩkwenda kwĩka motwi?

 KĨLA TWEEMANYĨSYA

Nzama Ĩla Ĩtongoesye nĩyo “ngombo ndĩkĩĩku na mbũĩ” ĩla ĩnyuvĩtwe nĩ Yesũ. Nĩyo ĩnengae Aklĩsto ĩũlũ wa nthĩ myolooto, na lĩu wa kĩ-veva.

Makũlyo ma Kũsyokeleela

• Nũũ wanyuvie “ngombo ndĩkĩĩku na mbũĩ”?

• Nzama Ĩla Ĩtongoesye ĩtũsũvĩaa ata?

• We nũkũĩkĩĩa kana Nzama Ĩla Ĩtongoesye nĩyo “ngombo ndĩkĩĩku na mbũĩ”?