Yesu kɛnɩ Krɩstʋ ɛgbɛyɛ Ñʋʋdʋ. (Efɛɛzɩ mba 5:23) Ɛwɛ ɛsɔdaa nɛ ɛtɩŋɩɣnɩ «yom siɣsiɣ tʋ nɛ lɔŋsɩnɖʋ» yɔɔ nɛ eɖiyiɣ ɛ-wayɩ tɩŋɩyaa tɛtʋ yɔɔ sɔnɔ. (Kalɩ Maatiyee 24:45.) Yesu maɣmaɣ lɩzɩnɩ «yom» ɛnʋ, nɛ ɛha-ɩ waɖɛ se ɛkpakɩɣ lɩmaɣza naayɛ. Paa mbʋ yɔ ɛkɛ yom nɛ pʋyɔɔ lɛ, eluzuu ɛ-tɩ Krɩstʋ tɛɛ nɛ ɛɖʋʋ nesi Krɩstʋ koobiya. Akɛ yom ɛnʋ? Ɛzɩma ɛcɔŋnɩ ɖɔ-yɔɔ?

1. Akɛnɩ «yom siɣsiɣ tʋ nɛ lɔŋsɩnɖʋ»?

Kpaɣnɩ ɖooo caanaʋ taa nɛ pɩtalɩ sɔnɔ, ɛyʋ nɔɔyʋ yaa ɛyaa nabɛyɛ yɔɔ Yehowa tɩŋɩɣna nɛ eɖiyiɣ ɛ-samaɣ. (Malakii 2:7; Ebree mba 1:1) Yesu sɩm wayɩ lɛ, apostoloowaa nɛ Yeruzalɛm ɛzʋtʋyaa ɖiyaɣni ɛgbɛyɛ. (Tʋma Labʋ 15:2) Sɔnɔ ɛzʋtʋyaa nabɛyɛ cabɩ kpɛndɩna nɛ pɛkɛ Yehowa Aseɣɖe Tɩnaa tɛ Nɔɔɖɛyaa ɛgbɛyɛ, nɛ mba haɣnɩ Ɛsɔ samaɣ fezuu taa tɔɔnaɣ nɛ patasɩɣ-kɛ lɔŋ pɩlɩɩnɩ tɔm susuu tʋmɩyɛ yɔɔ. Ɛgbɛyɛ nɖɩ, nɖɩ kɛnɩ «yom siɣsiɣ tʋ nɛ lɔŋsɩnɖʋ weyi [Yesu] lɩzaa» yɔ. (Maatiyee 24:45a) Mba pɛwɛ Nɔɔɖɛyaa ɛgbɛyɛ taa yɔ, pa-tɩŋa payɩ pɛkɛ Krɩstʋ mba patam numwaa nɛ pɛwɛnɩ lidaʋ se pa nɛ Krɩstʋ pakaɣ tɔɔʋ kewiyitu ɛsɔdaa, alɩwaatʋ ndʋ pe-wezuu sɩɣ tɩnaɣ tɛtʋ yɔɔ yɔ.

2. Fezuu taa tɔɔnaɣ ŋga yom siɣsiɣ tʋ haɣ-ɖʋ?

Yesu yɔɔdaa se «yom siɣsiɣ tʋ nɛ lɔŋsɩnɖʋ» kaɣ haʋ Krɩstʋ mba «pɔ-tɔɔnaɣ alɩwaatʋ ndʋ tɩmʋnaa yɔ tɩ-yɔɔ.» (Maatiyee 24:45b) Tomnaɣ yɔɔ tɔɔnaɣ haɣ-ɖʋ ɖoŋ nɛ tɔnʋʋ taa alaafɩya; mbʋ ɖɔɖɔ fezuu taa tɔɔnaɣ pʋ-tɔbʋʋ se lɔŋ tasʋʋ mbʋ pɩwɛ Ɛsɔtɔm taa yɔ, pɩsɩɣnɩ-ɖʋ se ɖɩwɛɛ ɖoŋ fezuu taa nɛ ɖɩpɩzɩ nɛ ɖɩwɛɛ siɣsiɣ Yehowa ɛsɩndaa nɛ ɖɩla ɖɔɖɔ tʋmɩyɛ nɖɩ Yesu ɖʋ-ɖʋ yɔ. (1 Timootee 4:6) Patɩŋɩɣnɩ kediɣzisi, egeetiye kigbeɣliŋ, kigbeɣliŋ sɔsɔŋ, takayɩsɩ nɛ videowaa yɔɔ na nɛ pahaɣ-ɖʋ fezuu taa tɔɔnaɣ ŋga; nɛ fezuu taa tɔɔnaɣ ŋga kasɩɣnɩ-ɖʋ se ɖɩtɩlɩ Ɛsɔ sɔɔlɩm nɛ ɖɩkpazɩ ɖama ɖoŋ.

 TAZƖ NƐ PILIMI

3. Pɩpɔzʋʋ se pɔñɔɔzɩ Yehowa samaɣ camɩyɛ

Yesu ɖiyiɣ Nɔɔɖɛyaa ɛgbɛyɛ taa mba nɛ palakɩ ɖʋtʋ se pɩsa nɛ Yehowa Aseɣɖe Tɩnaa la pa-tʋmɩyɛ camɩyɛ. Paalabɩ ɖʋtʋ ndʋ ɖɔɖɔ kajalaɣ Krɩstʋ mba alɩwaatʋ taa. Ɩcɔnɩ VIDEO.

Ɩkalɩ 1 Kɔrɛntɩ mba 14:33, 40; nɛ pʋwayɩ lɛ ɩtazɩ tɔm tʋnɛ tɩ-taa:

• Ɛzɩma masɩ sɩnɛ sɩwɩlɩɣ se Yehowa sɔɔlaa se pɔñɔɔzɩ ɛ-Aseɣɖe Tɩnaa camɩyɛ?

4. Yom siɣsiɣ tʋ ñɔɔzʋʋ ɖɔ-tɔm susuu tʋmɩyɛ camɩyɛ

Tɔm susuu tʋmɩyɛ kɛnɩ tʋmɩyɛ sɔsɔɖɛ nɖɩ kajalaɣ Krɩstʋ mba kaalaba yɔ. Ɩkalɩ Tʋma Labʋ 8:14, 25; nɛ pʋwayɩ lɛ ɩtazɩ tɔm tʋnɛ tɩ-taa:

• Aɖiyaɣ tɔm susuu tʋmɩyɛ kajalaɣ Krɩstʋ mba alɩwaatʋ taa?

• Ɛbɛ Pɩyɛɛrɩ nɛ Yohanɛɛsɩ palaba alɩwaatʋ ndʋ apostoloowaa lalaa tiyini lɔŋ tasʋʋ yɔ?

Tɔm susuu kɛnɩ tʋmɩyɛ sɔsɔɖɛ nɖɩ ɖɩ-yɔɔ Nɔɔɖɛyaa ɛgbɛyɛ cɔŋnɩ sɔnɔ yɔ. Ɩcɔnɩ VIDEO.

 Yesu kaawɩlaa se tɔm susuu tʋmɩyɛ tɔm cɛyaa pɩdɩɩfɛyɩ. Ɩkalɩ Maarɩkɩ 13:10, nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ yɔɔ tɔm susuu tʋmɩyɛ tɔm cɛyɩ Nɔɔɖɛyaa ɛgbɛyɛ ɛsɩndaa siŋŋ?

• Ɛbɛ yɔɔ pɩcɛyaa se Nɔɔɖɛyaa ɛgbɛyɛ ɛñɔɔzɩ ɛzɩma palakɩ tʋmɩyɛ nɖɩ ɛjaɖɛ kpeekpe yɔɔ yɔ?

5. Nɔɔɖɛyaa ɛgbɛyɛ tasɩɣ lɔŋ

Nɔɔɖɛyaa ɛgbɛyɛ tiyiɣni lɔŋ tasʋʋ Krɩstʋ ñɩma mba pɛwɛ kedeŋa kpeekpe yɔɔ yɔ. Ɛbɛ sɩɣnɩ Nɔɔɖɛyaa ɛgbɛyɛ taa mba se patɩlɩ lɔŋ tasʋʋ mbʋ pɩpɔzʋʋ koobiya yɔ? Na ɛzɩma kajalaɣ pɩnzɩ mɩnʋʋ taa Nɔɔɖɛyaa ɛgbɛyɛ taa mba lakaɣ yɔ. Ɩkalɩ Tʋma Labʋ 15:1, 2; nɛ pʋwayɩ lɛ ɩtazɩ tɔm tʋnɛ tɩ-taa:

• Tɔm ndʋ kaakɔnɩ tayʋʋ kajalaɣ Krɩstʋ mba hɛkʋ taa?

• Mba cɔlɔ Pɔɔlɩ, Barnaabaasɩ nɛ lalaa paawoni tɔm ndʋ se pɔcɔnɩ ti-ɖeɖe?

Ɩkalɩ Tʋma Labʋ 15:12-18, 23-29; nɛ pʋwayɩ lɛ ɩtazɩ tɔm tʋnɛ tɩ-taa:

• Ɛbɛ Nɔɔɖɛyaa ɛgbɛyɛ laba se pɩsa nɛ Ɛsɔ ɖiyi-ɖɩ nɛ ɖɩkpaɣ lɩmaɣzɩyɛ kɩbanɖɛ?—Ɩcɔnɩ kalɩtʋ 12, 15 nɛ 28.

Ɩkalɩ Tʋma Labʋ 15:30, 31 nɛ 16:4, 5; nɛ pʋwayɩ lɛ, ɩtazɩ tɔm tʋnɛ tɩ-taa:

• Nɔɔɖɛyaa ɛgbɛyɛ tiyini lɔŋ tasʋʋ lɛ, ɛbɛ kajalaɣ Krɩstʋ mba laba?

• Ɛzɩma Yehowa wazɩ-wɛ pa-ñamtʋ yɔɔ?

Ɩkalɩ 2 Timootee 3:16 nɛ Yakubu 1:5, nɛ pʋwayɩ lɛ ɩtazɩ tɔm tʋnɛ tɩ-taa:

• Le Nɔɔɖɛyaa ɛgbɛyɛ taa mba ñɩnɩɣ lɔŋ tasʋʋ pʋcɔ nɛ pakpakɩɣ lɩmaɣza sɔnɔ?

 TOBI LƐ

Nɔɔɖɛyaa ɛgbɛyɛ kɛnɩ «yom siɣsiɣ tʋ nɛ lɔŋsɩnɖʋ» weyi Krɩstʋ lɩzaa yɔ. Ðɩhaɣ fezuu taa tɔɔnaɣ Krɩstʋ ñɩma mba pɛwɛ kedeŋa kpeekpe yɔɔ yɔ nɛ ɖɩtasɩɣ-wɛ lɔŋ ɖɔɖɔ.

Tɔm taa tazʋʋ

• Alɩzɩ «yom siɣsiɣ tʋ nɛ lɔŋsɩnɖʋ»?

• Ɛzɩma Nɔɔɖɛyaa ɛgbɛyɛ cɔŋnɩ ɖɔ-yɔɔ?

• Ŋtisaa se Nɔɔɖɛyaa ɛgbɛyɛ kɛnɩ «yom siɣsiɣ tʋ nɛ lɔŋsɩnɖʋ» na?