Jiisusi ilagiinnut kristumiunut niaquuvoq, tassa siulersuisuuvoq. (Efesossimiut 5:23) Nalitsinni “inussiaq aalajaallunilu silatooq” aqqutigalugu malinnitsini nunarsuarmiittut qilammiit siulersorpai. (Matiusi 24:45 atuarsiuk). Inussiaq taanna Jiisusimit oqartus­saassusiler­neqarsimavoq, tamatigullu Jiisusi naalattarpaa kristumiullu tanitat kiffartuut­tarlugit. Inussiaq taanna kinaava? Aamma qanoq ikiortarpaatigut?

1. “Inussiaq aalajaallunilu silatooq” kinaava?

Itsarli Jehovap angut ataaseq aqqutigalugu eqimattan­nguilluunniit aqqutigalugit innuttani ilitsersortarpai. (Malaki 2:7; Hebræerit 1:1) Jiisusip toqunerata kingorna apustilit utoqqaanertallu Jerusalem­mimiittut siulersuisoqatigiin­ngorput. (Apustilit Suliaat 15:2) Taamatuttaaq nalitsinni utoqqaanertat ikittut – tassa Jehovap Nalunaajaasuisa Siulersuisoqatigiivi – anersaakkut inuussutissanik pilersuisarlutillu oqaluus­sinermik aaqqissuus­sisarput. Taakku tassaapput “inussiaq aalajaallunilu silatooq ... [Jiisusip] toqqagaa”. (Matiusi 24:45) Siulersuisoqatigiinnut ilaasortaasut tamarmik tanitaapput, nunarsuarmilu inuunertik naagunikku qilaliassapput Guutillu kunngeqarfiani Jiisusi kunngioqatigis­sallugu.

2. Inussiaq aalajaatsoq anersaakkut inuussutissanik sunik pilersitsisarpa?

Jiisusi oqarpoq inussiaq taanna uppeqatiminut ‘nerisassanik piffissaq eqqorlugu tunnius­sisartussaasoq’. (Matiusi 24:45) Nerisassat peqqinnerulis­sutigisarlugillu nukissaqalis­sutigisarpagut. Taamatuttaaq anersaakkut inuussutissat, tassa Biibilimit ilitsersor­neqarneq, nakussatsis­sutigalugit Jehovamut aalajaas­sinnaavugut Jiisusillu suliassiissutaa naammas­sisinnaallugu. (Timuutiusimut 1. 4:6) Anersaakkut inuussutissat qanoq pisarpagut? Ataatsimiinnerit, ataatsimeersuarnerit aamma Biibili tunngavigalugu atuagassiat isiginnaagassiallu aqqutigalugit. Tamakkumi iluaqutigalugit Jehovap piumasaa paasinerusin­naavarput taassumunngalu qaninnerulerluta.

 ITISILIINEQ

3. Jehovap innuttai aaqqissuul­luagaasariaqarput

Jiisusimit siulersor­neqarlutik Siulersuisoqatigiit Jehovap Nalunaajaasuisa suliaat aaqqissor­tarpaat. Kristumiut siulliit aamma taamatut siulersor­neqartarsimapput. VIDEO takusiuk.

Korintimiunut 1. 14:33, 40 atuarsigit apeqqullu una eqqartorlugu:

• Allassimaffinni qanoq erserpa Jehovap kissaatigigaa innuttani aaqqissuul­luagaassasut?

 4. Inussiap aalajaatsup oqaluus­sinerput aaqqissuuttarpaa

Kristumiut siulliit suliaat pingaar­nerpaaq tassaavoq oqaluussineq. Apustilit Suliaat 8:14, 25 atuarsigit apeqqutillu uku eqqartorlugit:

• Kristumiut siulliit oqaluus­sinerat kikkunnit aaqqissuun­neqartarpa?

• Petrusi Johannesilu apustileqatiminnit peqquneqaramik suppat?

Siulersuisoqatigiit aaqqissugaasa oqaluussineq pingaar­nerpaartaraat. VIDEO takusiuk.

Jiisusip ersersippaa oqaluussineq qanoq pingaaruteqar­tigisoq. Makkorsi 13:10 atuarsiuk apeqqutillu uku eqqartorlugit:

• Sooq Siulersuisoqatigiit oqaluussineq taama pingaar­titsigaat?

• Sooq suliaq tamanna ‘inussiamit aalajaallunilu silatuumit’ aaqqissuun­neqartariaqarpa?

5. Inussiaq aalajaatsoq ilitsersuisarpoq

Siulersuisoqatigiit kristumiunik nunarsuarmi sumi tamaniittunik ilitsersuisarput. Ilitsersuus­sutissatik qanoq aalajanger­tarpaat? Kristumiut siulliit siulersuisoqatigiivi qanoq taamaaliornersut sammeriartigu. Apustilit Suliaat 15:1, 2 atuarsigit apeqqutillu uku eqqartorlugit:

• Kristumiut siulliit suna isumaqatigiin­ngissutigaat?

• Isumaqatigiin­ngissut aaqqikkumallugu Paulusi, Barnaba allallu kikkunnukarpat?

Apustilit Suliaat 15:12-18, 23-29 atuarsigit apeqqullu una eqqartorlugu:

• Aalajangiin­nginnerminni kristumiut siulliit siulersuisoqatigiivi Jehovamit siulersor­neqarumallutik suppat? – Versit 12, 15, aamma 28 takukkit.

Apustilit Suliaat 15:30, 31 aamma 16:4, 5 atuarsigit apeqqutillu uku eqqartorlugit:

• Kristumiut siulliit siulersuisoqatigiinnit ilitsersor­neqarnertik qanoq qisuariarfigaat?

• Naalannertik Jehovamit qanoq pilluaq­quneqaatigaat?

Timuutiusimut 2. 3:16 aamma Jaaku 1:5 atuarsigit apeqqullu una eqqartorlugu:

• Nalitsinni Siulersuisoqatigiit suna tunngavigalugu aalajangiisarpat?

 EQIKKAANEQ

Siulersuisoqatigiit tassaapput “inussiaq aalajaallunilu silatooq” Kristusip toqqagaa. Kristumiut nunarsuarmi sumi tamaniittut ilitsersor­tarlugillu anersaakkut inuussutis­saqartit­tarpaat.

Uteqqiineq

• Kia “inussiaq aalajaallunilu silatooq” toqqarpaa?

• Siulersuisoqatigiit qanoq ikiortarpaatigut?

• Illit upperaajuk Siulersuisoqatigiit tassaasut “inussiaq aalajaallunilu silatooq”?