Yesu ya Muthwe w’ekithunga ky’Ekikristayo. (Abanya Efeso 5:23) Munabwire, Yesu iniane omwa kitsumbi kiwe elhubulha, anemusondolha abakamukwama abali okwa kihugho erilhabira omwa “mughombe oyuthereghulha n’ow’amenge.” (Soma Matayo 24:45.) Kundi “omughombe” asombolhawa na Yesu iyuwene-wene, awithe obuthoki bulebe aliwe atholere iniaghondera Kristo kandi iniakolera baghalha bobu Kristo. Omughombe oyo nindi? Omughombe akathutsomana athi?

1. ‘Omughombe oyuthereghulha n’ow’amenge’ nindi?

Mughulhu wosi Yehova akakolesaya omulhume kutse egurupu nyike y’abalhume eriha abandu biwe b’obusondoli. (Malaki 2:7; Abaebrania 1:1) Enyuma w’olhuholho lhwa Yesu, abakwenda n’abasyakulhu e Yerusalemu mubatsuka erisondolha. (Emibiri 15:2) Omwa nzira iya n’eyo, munabwire egurupu nyike y’abasyakulhu​—Akathunga Akakasondolha ak’Abema ba Yehova​—kakaha ebyalya by’obunyakirimu n’erisondolha omubiiri w’erithulira. Egurupu eyi ‘y’omughombe oyuthereghulha n’ow’amenge’ oyo Yesu asombolha. (Matayo 24:45a) Abosi ab’okwa Kathunga Akakasondolha ni Bakristayo ababirihakabibwa omwa mulimu, abalindirire eriyiyunga oku Kristo omo Bwami bwiwe bw’elhubulha engebe yabu y’okwa kihugho yikahwa.

2. Ni byalya byahi eby’obunyakirimu ebya omughombe oyuthereghulha akaha?

Yesu mwabugha athi omughombe oyuthereghulha angahere ‘[Abakristayo balikyabo] akalyo kabo oko mughulhu atholere.’ (Matayo 24:45b) Ngoku ebyalya ebya thukalya bikanaleka ithwathunga amaghalha awuwene n’akaghalha, ebyalya by’obunyakirimu​—obusondoli obukalhua omwa Kinywe kya Nyamuhanga—​bikathuha akaghalha ako thukayithagha erisighalha bathaleghulha oku Yehova n’erikolha omubiiri ogho Yesu abirithuha athi thukole. (1 Timoteo 4:6) Thukabana ebyalya by’obunyakirimu ebyo erilhabira omwa mihindano emike-mike n’eminene-minene, kuthya n’omwa bitabu ebiseghemere okwa Biblia n’esyovidiyo esikaleka ithwaminya erisonda lya Nyamuhanga n’erighumya obunywani bwethu nayu.

 THASYIGHA BINGYI

3. Abandu ba Yehova batholere ibabya omwa buyithondeke

Omw’isondolhwa na Yesu, Akathunga Akakasondolha kakatheghekanaya omubiiri w’Abema ba Yehova. Emitheghekere iya n’eyo y’eyanabya omwa Bakristayo ab’erimbere. Mubughaye EVIDIYO.

Soma 1 Abanya Korinto 14:33, 40, mwanakania okwa kibulyo kino:

• Emilhondo eyi yikakanganaya yithi ngoku Yehova anzire Abema biwe ibyabya omwa buyithondeke?

4. Omughombe oyutheleghulha akatheghekanaya omubiiri wethu w’erithulira

Erithulira abya mubiiri mukulhu kutsibu ogho Abakristayo ab’erimbere bakolha. Soma Emibiri 8:14, 25, mwanakania okwa bibulyo bino:

• Omwa Bakristayo ab’erimbere, ni bahi ababya bakasondolha omubiiri w’erithulira?

• Petero na Yoane mubakolhaki abakwenda balikyabo bakabaha obusondoli?

Erithulira w’omubiiri mukulhu ogho Akathunga Akakasondolha kakatheghekanaya. Mubughaye EVIDIYO.

 Yesu mwakangania ngoku erithulira ni likulhu. Soma Mariko 13:10, mwanakania okwa bibulyo bino:

• Busana naki Akathunga Akakasondolha kakalhangira omubiiri w’erithulira mwa mukulhu?

• Busana naki thukayithagha “omughombe oyuthereghulha n’ow’amenge” eritheghekania omubiiri w’ekihugho kyosi oyu?

5. Omughombe oyuthereghulha akaha obusondoli

Akathunga Akakasondolha kakaha Abakristayo omwa kihugho kyosi b’obusondoli. Kakathwamu kathi bikahika okwa busondoli bw’eriha? Lengekanaya okwa mibere akathunga akakasondolha ak’Abakristayo ab’erimbere kakoleramo ekyo. Soma Emibiri 15:1, 2, mwanakania okwa bibulyo bino:

• Ni mwatsi wahi ow’aletha erithendi yitheghererania omwa bandi Bakristayo ab’erimbere?

• Paulo, Barnaba, n’abandi mubayakania n’abahi erighunzaho mwatsi oyo?

Soma Emibiri 15:12-18, 23-29, mwanakania okwa kibulyo kino:

• Akathunga Akakasondolha ak’erimbere ikakatsuka erikolhaki eribana obusondoli bwa Nyamuhanga oko mwatsi kathe kathwamu? ​—Lebaya omulhondo 12, 15, na 28.

Soma Emibiri 15:30, 31 na 16:4, 5, mwanakania okwa bibulyo bino:

• Abakristayo ab’erimbere mubakolha kyahi bakabana obusondoli obukalhua okwa kathunga akakasondolha?

• Yehova mwatsumulha athi obwowa bwabu?

Soma 2 Timoteo 3:16 na Yakobo 1:5, mwanakania okwa kibulyo kino:

• Munabwire Akathunga Akakasondolha kakabana hayi h’obusondoli kakathwamu?

 OMWA BIKUHI

Akathunga Akakasondolha ‘y’omughombe oyuthereghulha n’ow’amenge’ oyo Kristo asombolha. Kakaha Abakristayo abosi okwa kihugho obusondoli n’ebyalya by’obunyakirimu.

Eriyibukya

• Oyuwasombolha “omughombe oyuthereghulha n’ow’amenge” nindi?

• Akathunga Akakasondolha kakathutsomana kathi?

• Wun’ikirirye ngoku Akathunga Akakasondolha ‘y’omughombe oyuthereghulha n’ow’amenge’?