Yesu ye mutwe wa kipwilo kya bena Kilishitu. (Efisesa 5:23) Yesu uji mwiulu kabiji wingijisha “kalume wa kishinka kabiji wa maana” kutangijila baana banji ba bwanga pano pa ntanda. (Tangai Mateo 24:45.) Yesu Kilishitu ye watongwele uno kalume ne kumupa luusa lwa kufuukulanga bintu bimo. Nangwa byonkabyo, uno kalume wakishinka wafwainwa kukookela Yesu. Nanchi uno kalume ye ñanyi? Kabiji witukwasha byepi?

1. Nanchi “kalume wakishinka kabiji wa maana” ye ñanyi?

Kufumatu ne kala, Yehoba wingijisha bantu nangwa kajibumba kacheche ka banabalume kutangijila bantu banji. (Malakai 2:7; Bahebelu 1:1) Yesu byo afwile, batumwa ne bakulumpe mu kipwilo kyajinga mu Yelusalema bo batangijilenga. (Byubilo 15:2) Byonkatu byo kyajinga kala, ne lelo jino jibumba jicheche ja bakulumpe mu kipwilo jitelwa’mba Jibumba Jitangijila ja Bakamonyi ba kwa Yehoba jo jibena kunengezha kajo ka ku mupashi ne kutangijila mwingilo wa kusapwila. Ajino jibumba ye “kalume wa kishinka kabiji wa maana [Yesu] ye atongwele.” (Mateo 24:45) Bonse baji mu Jibumba Jitangijila ke bena Kilishitu bashingwa na mupashi bakalamanga pamo ne Kilishitu mu Bufumu bwanji bwa mwiulu.

2. Ñanyi kajo ka ku mupashi kanengezha kalume wakishinka?

Yesu waambile’mba kalume wakishinka ‘ukapanga [bena Kilishitu] kajo pa kimye kyafwainwa.’ (Mateo 24:45b) Kajo ko tuja kakosesha bingi mubiji wetu ne kwikala bulongo. Kyo kimotu ne kajo ka ku mupashi nangwa’mba mikambizho iji mu Mambo a Lesa itukwasha kutwajijila kwikala bakishinka kwi Yehoba ne kwingila mwingilo witupa Yesu. (1 Timoti 4:6) Tutambwila ino mikambizho pa kupwila, pa kubuñana kwa mwanzo, pa kushonkena kwa kijiiji ne mu mabuku alumbulula Baibolo. Mavidyo nao etukwasha kuyuka bintu bikeba Lesa ne kwitukwasha kukosesha bulunda bwetu ne aye.

 FUNJILAIPO BIKWABO

3. Bantu ba Yehoba bafwainwa kukwatankana

Yesu ye ubena kutangijila Jibumba Jitangijila ne kunengezha mwingilo wa Bakamonyi ba kwa Yehoba. Abino byo byo atangijilenga ne bena Kilishitu batanshi. Tambai VIDYO.

Tangai 1 Kolinda 14:33, 40, ne kwisamba buno bwipuzho:

• Abino byepelo byamwesha byepi amba Yehoba ukeba Bakamonyi banji kukwatankana?

4. Kalume wakishinka ye unengezha mwingilo wetu wa kusapwila

Mwingilo wa kusapwila ye mwingilo wanema bingi waingijile bena Kilishitu batanshi. Tangai Byubilo 8:14, 25, ne kwisamba ano mepuzho:

• Ñanyi wapeele mikambizho bena Kilishitu batanshi bya kwingila mwingilo wa kusapwila?

• Petelo ne Yoano baubile byepi na mikambizho yapaine batumwa bakwabo?

Kusapwila ye mwingilo wanema bingi ubena kutangijila Jibumba Jitangijila. Tambai VIDYO.

 Yesu waambishepo bingi pa ene mambo mwingilo wa kusapwila o anemena. Tangai Mako 13:10, ne kwisamba ano mepuzho:

• Mambo ka Jibumba Jitangijila o janemekela bingi mwingilo wa kusapwila?

• Mambo ka o tukebela “kalume wa kishinka kabiji wa maana” kunengezha mwingilo wa kusapwila ntanda yonse?

5. Kalume wakishinka upana mikambizho

Jibumba Jitangijila jo jipana mikambizho ku bena Kilishitu ntanda yonse. Pano boba byepi pa kuba’mba bayuke mikambizho ya kupana? Monai byaubanga jibumba jitangijila kimye kya bena Kilishitu batanshi. Tangai Byubilo 15:1, 2, ne kwisamba ano mepuzho:

• Ñanyi kintu kyalengejile bena Kilishitu batanshi bamo kupusenamo?

• Paulo, Banabasa ne bakwabo baubile byepi pa kuba’mba bapwishe luno lukatazho?

Tangai Byubilo 15:12-18, 23-29, ne kwisamba buno bwipuzho:

• Saka bakyangye kufuukulapo mwa kubila, jibumba jitangijila jaubile byepi pa kuba’mba Lesa ebakwashe mwa kupwishisha lukatazho?—Monai kyepelo 12, 15 ne 28.

Tangai Byubilo 15:30, 31 ne 16:4, 5, ne kwisamba ano mepuzho:

• Bena Kilishitu batanshi baubile byepi byo batambwijile mikambizho yatumine jibumba jitangijila?

• Nga Yehoba wibakwashishe byepi byo bakookejile?

Tangai 2 Timoti 3:16 ne Yakoba 1:5, ne kwisamba buno bwipuzho:

• Jibumba Jitangijila juba byepi pa kufuukula bintu lelo jino?

 ÑANYI BISHINKA BYO MWAFUNDA?

Jibumba Jitangijila ye “kalume wa kishinka kabiji wa maana” ye batongola kwi Kilishitu. Kabiji jipana mikambizho ne kajo ka ku mupashi ku bena Kilishitu ntanda yonse.

Mepuzho a kupitulukamo

• Ñanyi watongwele “kalume wakishinka kabiji wa maana”?

• Jibumba Jitangijila jitukwasha byepi?

• Mwaswa kuba’mba Jibumba Jitangijila ye “kalume wakishinka kabiji wa maana” nyi?