Na Jizɔs de oba di Kristian kɔngrigeshɔn. (Ɛfishians 5:​23) Tide, Jizɔs de na ɛvin, ɛn i de yuz di “slev we fetful ɛn gɛt sɛns” fɔ dayrɛkt in savant dɛn na di wɔl. (Rid Matyu 24:​45.) Na Krays pik di slev, we min se di slev gɛt rayt fɔ du sɔm tin dɛn. Bɔt i go stil bi slev fɔ Krays ɛn wok fɔ Krays in brɔda dɛn. Udat na da slev de? Aw di slev de kia fɔ wi?

1. Udat na “di slev we fetful ɛn gɛt sɛns”?

Frɔm tɛm, Jiova bin dɔn de yuz wan man ɔ sɔm man dɛn fɔ dayrɛkt in pipul dɛn. (Malakay 2:​7; Ibruz 1:​1) Afta Jizɔs day, na di apɔsul dɛn ɛn di ɛlda dɛn na Jerusɛlɛm bin de tek di lid. (Akt 15:​2) Semweso tide, na sɔm ɛlda dɛn de tek di lid. Dɛn kɔl dis grup Gɔvnin Bɔdi fɔ Jiova Witnɛs dɛn. Na dɛn de ɛp Gɔd in pipul dɛn fɔ gɛt wetin dɛn nid fɔ gɛt tayt padi biznɛs wit Gɔd ɛn fɔ dayrɛkt di prichin wok. Na dis grup na di “di slev we fetful ɛn gɛt sɛns we [Jizɔs] dɔn pik.” (Matyu 24:​45a) Ɔl di wan dɛn we de na di Gɔvnin Bɔdi na anɔyntɛd Kristian dɛn we gɛt di op fɔ jɔyn Jizɔs na in Kiŋdɔm we de na ɛvin afta dɛn dɔn dɛn wok na dis wɔl.

2. Us it di slev we fetful de gi?

Jizɔs bin tɔk se di slev we fetful go “gi dɛn [kɔmpin Kristian dɛn], dɛn it di rayt tɛm.” (Matyu 24:​45b) Jɔs lɛk we it de ɛp pɔsin fɔ strɔng ɛn fɔ gɛt wɛlbɔdi, na so di it we Gɔd de gi, dat na wetin de na Gɔd in Wɔd, de gi wi di trɛnk we wi nid fɔ kɔntinyu fɔ de biɛn Jiova ɛn fɔ du di wok we Jizɔs dɔn gi wi fɔ du. (1 Timoti 4:​6) Wi de gɛt da it de tru wi mitin, asɛmbli, ɛn kɔnvɛnshɔn dɛn. Dɔn bak wi de gɛt am frɔm wi buk, magazin ɛn vidio dɛn we de ɛp wi fɔ ɔndastand wetin Gɔd want ɛn fɔ mek wi padi biznɛs wit am tayt mɔ ɛn mɔ.

 LAN MƆ

3. Jiova in pipul dɛn fɔ ɔganayz

Na Jizɔs de dayrɛkt di Gɔvnin Bɔdi fɔ ɔganayz di wok we Jiova Witnɛs dɛn de du. Na di sem arenjmɛnt bin de insay di fɔstɛm Kristian dɛn tɛm. Ple di VIDIO.

Rid 1 Kɔrintians 14:​33, 40, dɔn una tɔk bɔt dis kwɛstyɔn:

• Aw dɛn vas dɛn ya de sho se Jiova want in savant dɛn fɔ ɔganayz?

4. Na di slev we fetful de ɔganayz di prichin wok

Di prichin wok na di wok we impɔtant pas ɔl we di fɔstɛm Kristian dɛn bin de du. Rid Akt 8:​14, 25, dɔn una tɔk bɔt dɛn kwɛstyɔn dɛn ya:

• Insay di fɔstɛm Kristian dɛn tɛm, udat bin de dayrɛkt di prichin wok?

• Wetin Pita ɛn Jɔn bin du we dɛn kɔmpin apɔsul dɛn bin de dayrɛkt dɛn?

Di prichin wok na di wok we impɔtant pas ɔl we di Gɔvnin Bɔdi de ɔganayz. Ple di VIDIO.

Jizɔs bin mek wi no klia wan se di prichin wok rili impɔtant. Rid Mak 13:​10, dɔn una tɔk bɔt dɛn kwɛstyɔn dɛn ya:

• Wetin mek di prichin wok rili impɔtant to di Gɔvnin Bɔdi?

• Wetin mek wi nid “di slev we fetful ɛn gɛt sɛns” fɔ ɔganayz dis wok ɔlsay na di wɔl?

5. Di slev we fetful de tɛl wi wetin fɔ du

Di Gɔvnin Bɔdi de tɛl Kristian dɛn ɔlsay na di wɔl wetin fɔ du. Aw dɛn kin disayd wetin fɔ tɛl wi? Tink bɔt aw di gɔvnin bɔdi we bin de insay di fɔstɛm Kristian dɛn tɛm bin du dat. Rid Akt 15:​1, 2, dɔn una tɔk bɔt dɛn kwɛstyɔn dɛn ya:

• Wetin di fɔstɛm Kristian dɛn nɔ bin gri bɔt?

• Na to udat Pɔl, Banabas, ɛn di ɔda wan dɛn bin go fɔ sɛtul di prɔblɛm?

Rid Akt 15:​12-​18, 23-​29, dɔn una tɔk bɔt dis kwɛstyɔn:

• Bifo di gɔvnin bɔdi we bin de trade disayd wetin fɔ du, wetin dɛn du fɔ no wetin Gɔd tink bɔt di prɔblɛm?​—Rid vas 12, 15, ɛn 28.

Rid Akt 15:​30, 31 ɛn 16:​4, 5, dɔn una tɔk bɔt dɛn kwɛstyɔn dɛn ya:

• Wetin di fɔstɛm Kristian dɛn du we di gɔvnin bɔdi tɛl dɛn wetin dɛn disayd?

• Aw Jiova bin blɛs dɛn bikɔs dɛn obe?

Rid 2 Timoti 3:​16 ɛn Jems 1:​5, dɔn una tɔk bɔt dis kwɛstyɔn:

• Tide, udat di Gɔvnin Bɔdi kin luk to we i want fɔ disayd fɔ du sɔntin?

 WETIN YU DƆN LAN?

Di Gɔvnin Bɔdi na “di slev we fetful ɛn gɛt sɛns” we Krays dɔn pik. I de dayrɛkt di Kristian dɛn we de ɔlsay na di wɔl, ɛn i de gi dɛn it we kɔmɔt frɔm Gɔd.

Rivyu

• Udat pik “di slev we fetful ɛn gɛt sɛns”?

• Aw di Gɔvnin Bɔdi de kia fɔ wi?

• Yu biliv se di Gɔvnin Bɔdi na “di slev we fetful ɛn gɛt sɛns”?