Yesu i Ntu a nkutakani a Kikristu. (Efeso 5:23) O unu, tuka kuna zulu Yesu osadilanga “ntaudi akwikizi yo lulungalalu” mu twadisa alandi andi ova ntoto. (Tanga Matai 24:45.) Yesu yandi kibeni watumbika “ntaudi” ndioyo yo kumvana wisa kia baka nzengo. Kansi, ntaudi ndioyo olemvokelanga Kristu yo sadila mpangi za Kristu. Nani i ntaudi ndioyo? Aweyi kekutulunga-lungilanga?

1. Nani i “Ntaudi Akwikizi yo Lulungalalu”?

Tuka kolo Yave osadilanga muntu yovo buka kiakete kia wantu mu vana luludiku kwa nkangu andi. (Malaki 2:7; Ayibere 1:1) Kuna nim’a lufwa lwa Yesu, antumwa ye akuluntu kuna Yerusaleme, yau bavitanga o ntu. (Mavangu 15:2) O unu mpe, buka kiakete kia akuluntu, i sia vo, Selo Yambuta ya Mbangi za Yave, bevananga madia ma mwanda yo fila salu kia samuna e nsangu zambote. E buka kiaki i “Ntaudi Akwikizi yo Lulungalalu ona wavewa kiyekwa kwa [Yesu].” (Matai 24:45a) Awonso bena muna buka kia Selo Yambuta, Akristu akuswa, ana beyala yo Kristu muna Kintinu kiandi kuna zulu.

2. O ntaudi akwikizi aweyi kevaninanga madia ma mwanda kwa nkangu a Yave?

Yesu wavova vo ntaudi akwikizi ‘ovana madia [kwa akw’andi Akristu] muna ntangwa ifwene.’ (Matai 24:45b) Wauna e madia mekumikanga nitu zeto yo kutuvana mavimpi mambote, e madia ma mwanda, i sia vo, malongi metukanga muna Diambu dia Nzambi, mekutuvananga nkuma tuvuidi o mfunu mu tatidila kwikizi kieto muna Yave yo sala e salu Yesu katuvana. (1 Timoteo 4:6) Tutambulanga madia mama muna tukutakanu twa nkutakani, tukutakanu twampwena, muna nkanda ye video zikutusadisanga mu bakula luzolo lwa Nzambi yo siamisa kikundi kieto yo yandi.

 ZAYA DIAKA MANKAKA

3. Nkangu a Yave watoma kubikwa

Muna lutumu lwa Yesu, Selo Yambuta bekubikanga e salu kia Mbangi za Yave. I wauna mpe Yesu kafidilanga Akristu a tandu kiantete. Tala e VIDEO.

Tanga 1 Korinto 14:33, 40, i bosi, vana e mvutu za kiuvu eki:

• Aweyi e sono kiaki kisongelanga vo Yave ozolele vo Mbangi zandi bakala mu nkubika?

4. Ntaudi akwikizi okubikanga e salu kia umbangi

E salu kia umbangi i salu kiasunda o mfunu kwa Akristu a tandu kiantete. Tanga Mavangu 8:14, 25, i bosi, vana e mvutu za yuvu eyi:

• Nani wavananga luludiku kwa Akristu a tandu kiantete mu kuma kia mpila ifwete sadilwa e salu kia umbangi?

• Nga Petelo yo Yoane batambulwila luludiku bavewa kwa ntumwa zankaka?

E salu kia umbangi i salu kisundidi o mfunu kikubikwanga kwa Selo Yambuta. Tala e VIDEO.

 Yesu wasonga vo salu kia samuna e nsangu zambote mfunu kikilu kina. Tanga Maku 13:10, i bosi, vana e mvutu za yuvu eyi:

• Ekuma e salu kia umbangi kinina o mfunu kwa Selo Yambuta?

• Ekuma tuvuididi o mfunu wa “ntaudi akwikizi yo lulungalalu” mu kubika e salu kia umbangi mu nza yawonso?

5. Ntaudi akwikizi ovananga tuludiku

E Selo Yambuta bevananga tuludiku kwa Akristu mu nza yawonso. Aweyi bebakilanga e nzengo za luludiku bevana? Tala una e Selo Yambuta muna tandu kiantete bavangilanga wo. Tanga Mavangu 15:1, 2, i bosi, vana e mvutu za yuvu eyi:

• Nkia diambu diatwasa ntantani vana kati kwa Akristu a tandu kiantete?

• O Paulu, Banaba ye akaka, kwa nani bayenda lomba lusadisu mu singika diambu diadi?

Tanga Mavangu 15:12-18, 23-29, i bosi, vana e mvutu za kiuvu eki:

• Vitila babaka nzengo, aweyi selo yambuta muna tandu kiantete bavavila luludiku lwa Nzambi mu diambu diadi?—Tala tini kia 12, 15, ye 28.

Tanga Mavangu 15:30, 31 ye 16:4, 5, i bosi, vana e mvutu za yuvu eyi:

• Akristu a tandu kiantete, nga batambulwila luludiku bavewa kwa selo yambuta?

• Aweyi Yave kasambulwila o nlemvo basonga?

Tanga 2 Timoteo 3:16 ye Yakobo 1:5, i bosi, vana e mvutu za kiuvu eki:

• O unu, akweyi Selo Yambuta bevavilanga luludiku muna baka nzengo?

 MAMBU MASINA MA LONGI DIADI

E Selo Yambuta i “ntaudi akwikizi yo lulungalalu” ona wasolwa kwa Kristu. Ovananga tuludiku ye madia ma mwanda kwa Akristu mu nza yawonso.

Nkia Mambu Olongokele?

• Nani wasola “ntaudi akwikizi yo lulungalalu”?

• Aweyi Selo Yambuta betokanenanga e wete dieto?

• Nga okwikidi vo e Selo Yambuta i “ntaudi akwikizi yo lulungalalu”?