ບົດທີ 54

“ທາດທີ່ສັດຊື່ແລະສຸຂຸມ” ແມ່ນໃຜແລະເຂົາເຈົ້າເຮັດຫຍັງ?

ເປີດ

ພະເຢຊູເປັນຜູ້ນຳປະຊາຄົມຄລິດສະຕຽນ. (ເອເຟໂຊ 5:23) ເຖິງວ່າເພິ່ນຈະຢູ່ໃນສະຫວັນ ແຕ່ເພິ່ນກໍຊີ້ນຳປະຊາຄົມໂດຍແຕ່ງຕັ້ງ “ທາດທີ່ສັດຊື່ແລະສຸຂຸມ” ໃຫ້ເບິ່ງແຍງຄລິດສະຕຽນທີ່ຢູ່ເທິງໂລກ. (ອ່ານມັດທາຍ 24:45) ພະເຢຊູໃຫ້ທາດທີ່ສັດຊື່ແລະສຸຂຸມມີອຳນາດທີ່ຈະຕັດສິນໃຈບາງເລື່ອງໄດ້ ເຖິງຈະເປັນແນວນັ້ນ ເຂົາເຈົ້າກໍຕ້ອງເຊື່ອຟັງເພິ່ນແລະຮັບໃຊ້ພີ່ນ້ອງຂອງເພິ່ນ. ແລ້ວທາດທີ່ສັດຊື່ແລະສຸຂຸມແມ່ນໃຜ? ແລະເຂົາເຈົ້າເບິ່ງແຍງເຮົາແນວໃດ?

1. “ທາດທີ່ສັດຊື່ແລະສຸຂຸມ” ແມ່ນໃຜ?

ທີ່ຜ່ານມາ ບາງຄັ້ງພະເຢໂຫວາແຕ່ງຕັ້ງຜູ້ຊາຍຄົນໜຶ່ງໃຫ້ຊີ້ນຳຄົນຂອງເພິ່ນ ແລະບາງຄັ້ງເພິ່ນກໍແຕ່ງຕັ້ງຜູ້ຊາຍກຸ່ມໜຶ່ງໃຫ້ເຮັດໜ້າທີ່ນີ້. (ມາລາກີ 2:7; ເຮັບເຣີ 1:1) ເຊັ່ນ ຫຼັງຈາກທີ່ພະເຢຊູເສຍຊີວິດ ພວກອັກຄະສາວົກແລະພວກຜູ້ດູແລໃນເມືອງເຢຣູຊາເລັມກໍໄດ້ເຮັດໜ້າທີ່ຊີ້ນຳຄົນຂອງພະເຈົ້າ. (ກິດຈະການ 15:2) ໃນທຸກມື້ນີ້ກໍມີຜູ້ດູແລກຸ່ມໜຶ່ງທີ່ເອີ້ນວ່າ ຄະນະກຳມະການປົກຄອງຂອງພະຍານພະເຢໂຫວາ ທີ່ຄອຍຊີ້ນຳຄົນຂອງພະເຈົ້າ ເຂົາເຈົ້າຈັດໃຫ້ມີຄວາມຮູ້ຈາກພະເຈົ້າທີ່ເປັນຄືອາຫານທີ່ເຮັດໃຫ້ຄວາມເຊື່ອຂອງພວກເຮົາເຂັ້ມແຂງແລະຄອຍເບິ່ງແຍງວຽກປະກາດ. ຄົນກຸ່ມນີ້ແມ່ນ “ທາດທີ່ສັດຊື່ແລະສຸຂຸມທີ່ [ພະເຢຊູ] ແຕ່ງຕັ້ງໄວ້.” (ມັດທາຍ 24:45ກ) ສະມາຊິກທຸກຄົນຂອງຄະນະກຳມະການປົກຄອງເປັນຜູ້ຖືກເຈີມ ເຊິ່ງກໍຄືຄົນທີ່ຖືກເລືອກໃຫ້ໄປຮ່ວມປົກຄອງກັບພະເຢຊູໃນການປົກຄອງຂອງພະເຈົ້າ.

2. ທາດທີ່ສັດຊື່ແລະສຸຂຸມຈັດໃຫ້ມີຫຍັງແດ່ທີ່ເປັນຄືອາຫານທີ່ເຮັດໃຫ້ຄວາມເຊື່ອຂອງເຮົາເຂັ້ມແຂງ?

ພະເຢຊູບອກວ່າທາດທີ່ສັດຊື່ແລະສຸຂຸມຈະ “ແຈກຢາຍອາຫານໃຫ້ [ພີ່ນ້ອງຄລິດສະຕຽນ] ຕາມເວລາທີ່ເໝາະສົມ.” (ມັດທາຍ 24:45ຂ) ອາຫານທີ່ເຮົາກິນຈະເຮັດໃຫ້ເຮົາແຂງແຮງແລະມີສຸຂະພາບທີ່ດີ ຄວາມຮູ້ທີ່ມາຈາກພະເຈົ້າກໍເປັນຄືອາຫານທີ່ຈະເຮັດໃຫ້ຄວາມເຊື່ອເຂັ້ມແຂງ ເພື່ອເຮົາຈະພັກດີຕໍ່ພະເຢໂຫວາໄດ້ແລະພ້ອມຈະເຮັດວຽກມອບໝາຍທີ່ພະເຢຊູໃຫ້ເຮົາເຮັດ. (1 ຕີໂມທຽວ 4:6) ເຮົາໄດ້ຮັບຄວາມຮູ້ເຫຼົ່ານີ້ຈາກການປະຊຸມປະຊາຄົມ ການປະຊຸມໝວດ ການປະຊຸມພາກ ແລະຜ່ານທາງໜັງສື ວິດີໂອ ແລະສື່ຕ່າງໆ ຄວາມຮູ້ທັງໝົດນີ້ຊ່ວຍໃຫ້ເຮົາສະໜິດກັບພະເຢໂຫວາຫຼາຍຂຶ້ນແລະຊ່ວຍໃຫ້ຮູ້ວ່າເພິ່ນຢາກໃຫ້ເຮົາເຮັດຫຍັງ.

ຮຽນຮູ້ຫຼາຍຂຶ້ນ

ມາເບິ່ງເຫດຜົນວ່າເປັນຫຍັງຕ້ອງມີ “ທາດທີ່ສັດຊື່ແລະສຸຂຸມ” ຫຼືຄະນະກຳມະການປົກຄອງ.

ຄະນະກຳມະການປົກຄອງຈັດກຽມຄວາມຮູ້ທີ່ມາຈາກພະເຈົ້າ ໃຫ້ການຊີ້ນຳ ແລະຄອຍຊ່ວຍເຫຼືອພະຍານພະເຢໂຫວາຕະຫຼອດທົ່ວໂລກ

3. ຄົນຂອງພະເຢໂຫວາຕ້ອງມີອົງການທີ່ເປັນລະບຽບ

ພະເຢຊູຊີ້ນຳຄະນະກຳມະການປົກຄອງໃຫ້ເບິ່ງແຍງວຽກຕ່າງໆຂອງພະຍານພະເຢໂຫວາ. ແລະເພິ່ນກໍໃຊ້ວິທີຄ້າຍຄືກັນນີ້ເພື່ອຊີ້ນຳຄລິດສະຕຽນລຸ້ນທຳອິດນຳ. ເປີດວິດີໂອ.

ວິດີໂອ: ພະເຢໂຫວາຊີ້ນຳຄົນຂອງເພິ່ນ (6:18)

ອ່ານ 1 ໂກຣິນໂທ 14:33, 40 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຈາກຂໍ້ຄຳພີທີ່ອ່ານໄປ ເປັນຫຍັງເຮົາຈຶ່ງຮູ້ວ່າພະເຢໂຫວາຢາກໃຫ້ພະຍານຂອງເພິ່ນມີອົງການທີ່ເປັນລະບຽບ?

4. ທາດທີ່ສັດຊື່ແລະສຸຂຸມເບິ່ງແຍງວຽກປະກາດໃຫ້ເປັນລະບຽບ

ວຽກສຳຄັນທີ່ສຸດທີ່ຄລິດສະຕຽນລຸ້ນທຳອິດເຮັດກໍຄືວຽກປະກາດ. ອ່ານກິດຈະການ 8:14, 25 ແລ້ວລົມກັນກ່ຽວກັບຄຳຖາມຕໍ່ໄປນີ້:

ໃນສະໄໝຄລິດສະຕຽນລຸ້ນທຳອິດ ໃຜມີໜ້າທີ່ເບິ່ງແຍງວຽກປະກາດ?
ເປໂຕແລະໂຢຮັນເຮັດແນວໃດເມື່ອໄດ້ຮັບການຊີ້ນຳຈາກອັກຄະສາວົກຄົນອື່ນໆ?

ວຽກສຳຄັນທີ່ສຸດທີ່ຄະນະກຳມະການປົກຄອງເບິ່ງແຍງໃຫ້ເປັນລະບຽບກໍຄືວຽກປະກາດ. ເປີດວິດີໂອ.

ວິດີໂອ: ວຽກປະກາດເປັນວຽກສຳຄັນ (1:24)

ພະເຢຊູບອກວ່າວຽກປະກາດເປັນວຽກທີ່ສຳຄັນຫຼາຍ. ອ່ານມາຣະໂກ 13:10 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເປັນຫຍັງຄະນະກຳມະການປົກຄອງຈຶ່ງໃຫ້ຄວາມສຳຄັນຫຼາຍກັບວຽກປະກາດ?
ເປັນຫຍັງວຽກປະກາດທົ່ວໂລກຕ້ອງມີ “ທາດທີ່ສັດຊື່ແລະສຸຂຸມ” ຄອຍເບິ່ງແຍງໃຫ້ເປັນລະບຽບ?

5. ທາດທີ່ສັດຊື່ແລະສຸຂຸມຄອຍໃຫ້ການຊີ້ນຳ

ຄະນະກຳມະການປົກຄອງໃຫ້ການຊີ້ນຳຄລິດສະຕຽນທົ່ວໂລກ. ແຕ່ເຂົາເຈົ້າຮູ້ໄດ້ແນວໃດວ່າຈະຊີ້ນຳແບບໃດ? ໃຫ້ເຮົາມາເບິ່ງວ່າຄະນະກຳມະການປົກຄອງໃນສະໄໝຄລິດສະຕຽນລຸ້ນທຳອິດເຮັດແນວໃດ. ອ່ານກິດຈະການ 15:1, 2 ແລ້ວລົມກັນກ່ຽວກັບຄຳຖາມຕໍ່ໄປນີ້:

ຄລິດສະຕຽນລຸ້ນທຳອິດໂຕ້ຖຽງກັນເລື່ອງຫຍັງ?
ແລ້ວໂປໂລ ບາຣະນາບາ ແລະພີ່ນ້ອງຄົນອື່ນໆໄປຂໍການຊີ້ນຳຈາກໃຜ?

ອ່ານກິດຈະການ 15:12-18, 23-29 ແລ້ວລົມກັນກ່ຽວກັບຄຳຖາມຕໍ່ໄປນີ້:

ກ່ອນທີ່ຄະນະກຳມະການປົກຄອງຈະຕັດສິນໃຈ ເຂົາເຈົ້າເຮັດຫຍັງແດ່ເພື່ອຈະໄດ້ຮັບການຊີ້ນຳຈາກພະເຈົ້າ?—ເບິ່ງຂໍ້ 12, 15 ແລະ 28

ອ່ານກິດຈະການ 15:30, 31 ແລະ 16:4, 5 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເມື່ອຄລິດສະຕຽນລຸ້ນທຳອິດໄດ້ຮັບການຊີ້ນຳຈາກຄະນະກຳມະການປົກຄອງ ເຂົາເຈົ້າຮູ້ສຶກແນວໃດ? ແລະເຂົາເຈົ້າເຮັດຫຍັງ?
ເມື່ອເຂົາເຈົ້າເຮັດຕາມການຊີ້ນຳ ພະເຢໂຫວາອວຍພອນເຂົາເຈົ້າແນວໃດ?

ອ່ານ 2 ຕີໂມທຽວ 3:16 ແລະຢາໂກໂບ 1:5 ແລ້ວລົມກັນກ່ຽວກັບຄຳຖາມຕໍ່ໄປນີ້:

ເມື່ອຄະນະກຳມະການປົກຄອງໃນທຸກມື້ນີ້ມີເລື່ອງທີ່ຕ້ອງຕັດສິນໃຈ ເຂົາເຈົ້າເພິ່ງການຊີ້ນຳຈາກໃສ?

ບາງຄົນເວົ້າວ່າ: “ບໍ່ຕ້ອງໄປເຊື່ອຄະນະກຳມະການປົກຄອງດອກ ເຂົາເຈົ້າກໍເປັນຄົນທຳມະດາຄືເຮົານີ້ແຫຼະ.”

ເປັນຫຍັງເຈົ້າຈຶ່ງໝັ້ນໃຈວ່າພະເຢຊູຊີ້ນຳຄະນະກຳມະການປົກຄອງ?

ສະຫຼຸບ

ຄະນະກຳມະການປົກຄອງແມ່ນ “ທາດທີ່ສັດຊື່ແລະສຸຂຸມ” ທີ່ໄດ້ຮັບການແຕ່ງຕັ້ງຈາກພະຄລິດ. ເຂົາເຈົ້າຄອຍໃຫ້ການຊີ້ນຳແລະຈັດກຽມຄວາມຮູ້ທີ່ມາຈາກພະເຈົ້າໃຫ້ກັບຄລິດສະຕຽນທີ່ຢູ່ທົ່ວໂລກ.