KALABO 54

Tii Gala Goo Wotii Maazu Vɛtɛ Veaitiɛ Ta Kɛ

TƐ GÁ

Ziizɛ ɣa e ga kuuwui mawũgi. (Ɛfɛsɔitiɛ 5:23) Ziizɛ ɣa Gala ta yiɛ pele wulo ga pulu veaitiɛ Gala goo wotii maazu vɛtɛ veaitiɛ zaala zu. (Mafiyu 24:45 lodo.) Velei ɓalaa gaa-ɓaa la te ya ga te deʋe wo, Ziizɛ ɣa ya yee ɓado te va. Na ɣa ɣɛɛna manɛɛ te ɣaa-ɓaa tiɛ goo-mɛni kulo Ziizɛ ya tiɛ tii ɣɛ te ɣaa yɔwɔ̃itiɛ ʋaa ma. Ɓɛɛni ka te ga Gala goo wotii maazu vɛtɛ veaitiɛ? Ta Jehova na numaitiɛ maazu vɛtɛsu ɣɛ le?

1. Ɓɛɛni ka te ga Gala goo wotii maazu vɛtɛ veaitiɛ?

Jehova vɛɛ yee ɓadosu numaa va ga te pele wulo ga na numaitiɛ. (Malachi 2:7; Hiiɓuluitiɛ 1:1) Tei Ziizɛ zaani na kala dopoitiɛ ɣa te ɣɛni pele wulozu ga na numaitiɛ. (Te Ɣɛɛ Ʋaitiɛ 15:2) Vele ɣana nɔ e la zaa, kuuwu wũ-tuo veai niitiɛ ta te lili ga Gala Goo Wotii Maazu Vɛtɛ Veaitiɛ, tiɛ ka ta da zɔɔlaitiɛ ɓɔgapɛ kpɛtɛ. Tiɛ ɣa wɔnɔ ta deʋe wo e vile Gala goo wotii va. Tiɛ ɣa te “ga tii-ɣɛɛ nui nu ɣa laa la [te] ga nui kele-ɣelegɛi” Ziizɛ yee ɓadoga te va. (Mafiyu 24:45) Jehova yee ɓadoga Gala Goo Wotii Maazu Vɛtɛ Veaitiɛ ɓɔgapɛ ba ga baa ŋinɛgi. Nii ɣa dɛɛzu ga ta zaana ta vaazu liizu te vɛɛ Ziizɛ va ga te zui leʋe.

2. Daa-mii ŋɛni zɛɓɛi Gala goo wotii maazu vɛtɛ veaitiɛ ta fe de ya?

Ziizɛ boni ga na tii ɣɛɛ veai niitiɛ nu ɣa la ga tiɛ tɔ “daa-mii ŋɛni ʋe [pulu veaitiɛ ya] maziɛ vagɔi ma.” (Mafiyu 24:45) Daa-mii ŋɛnii ɣa ɓɔ de va e gaa-ɓaa ʋe de ya ta kɔlɔ-su-wodo. Vele nɔ na ki-daa-wodoitiɛ te Gala Kɔlɔi zu ta ɓɔ la de va de lo kpã Jehova ʋeli ʋai zu. Ta ɓɔ wɔnɔ de va de tii nii ɣɛ Jehova fea de ya ga de kɛ. (1 Temete 4:6) Da niitiɛ maa zɔlɔwo ani da ɣɛna liizu da ɣaalɛ-baitiɛ zu e vɛɛ da ɣaalɛ-ba walaitiɛ va. Da zoo wɔnɔ de daa-mii ŋɛnii niitiɛ maa zɔlɔwo ani da ɣɛna kɔlɔitiɛ lodosu, diɛ wɛlɛ ʋiliogitiɛ va ta ɓɔ de va de Gala Kɔlɔi ɣaa ɣa. Towa ɓɔ de va wɔnɔ de da ziɛ-pului zu-ɓaa de yɔɔzu da Jehova.

FAA LAMAA MAA WOLI

Wɛlɛ velei Gala Goo Wotii Maazu Vɛtɛ Veaitiɛ ta ɓɔ la de va.

Gala Goo Wotii Maazu Vɛtɛ Veaitiɛ ta kɔlɔ lamaa ɓɛtɛ ga ya ɓɔ Jehova ʋeli veaitiɛ va. Ta tɛnɛ fe te ya na ɣa ɣɛɛna ta faa taniga ɣɛ ga te ɓɔ te va te ŋetea ɣɛ

3. Jehova na numaitiɛ te ɣaa lɛɛvɛ ɓɔɔ ba ɓulu gila su

Ziizɛ ɣa pele wulo ga Gala Goo Wotii Maazu Vɛtɛ Veaitiɛ ga te pele wulo ga Jehova Na Seeleitiɛ Gala goo wotii zu. Vele ɣana nɔ e ɣɛɛni la Kolai Maa Veaitiɛ yɔɔzu wɔlɔ-wɔlɔi zu. ƲILIOGI nii lɛ ga.

ƲILIOGI: Jehova Na Numaitiɛ Ɣaa Lɛɛ Ba (6:18)

A 1 Kɔlĩitiɛ 14:33, 40 lodo, wo gaa-zaɣa-kɛɛ nii ɣaa wote:

Gala goi nii dɛɛvɛ ɣɛ le ga Jehova wõini na numaitiɛ te ɣɛ ga ɓulu gila?

4. Gala goo wotii maazu vɛtɛ veaitiɛ ɣa ta pele wulo ga diɛ Gala goo wotii zu

Gala goo wotii ɣɛni ɓɔɔ ga faa ɓi Kolai Maa Veaitiɛ ɣaazu wɔlɔ-wɔlɔi zu. A Te Ɣɛɛ Ʋaitiɛ 8:14, 25 lodo, wo gaa-zaɣa-kɛɛ niitiɛ ɣaa wote:

Ɓɛɛni ka tɔ pele wulo ga Gala goo wotii wɔlɔ-wɔlɔi zu?
Zɛɓɛi Pite ɓɔga Jɔ̃ te kɛɛni e vile deʋei nii va te veaitiɛ te feeni te ya?

Gala Goo Wotii Maazu Vɛtɛ Veaitiɛ ɣa te deʋe ʋeezu e vile Gala goo wo fai va. Gala goo wotii ɣa ɓɔɔ ga faa ɓi te ɣaazu. ƲILIOGI nii lɛ ga.

ƲILIOGI: Ɣaazu Ɓado Gala Goo Wotii Va (1:24)

Ziizɛ dɛɛni ga Gala goo wotii ɣa ɓɔɔ ga faa ɓi. A Maki 13:10 lodo, wo gaa-zaɣa-kɛɛ niitiɛ ɣaa wote:

Zɛɓɛi e kɛɛ Gala goo wo fai ɓɔɔ ga faa ɓi Gala Goo Wotii Maazu Vɛtɛ Veaitiɛ ɣaazu?
Zɛɓɛi e kɛɛ manɛɛ Gala Goo Wotii Maazu Vɛtɛ Veaitiɛ te deʋe wo e vile Gala goo wo fai va zui wɔlɔ-kɔlɔ ma?

5. Gala goo wotii maazu vɛtɛ veaitiɛ ta pele wulo ga Kolai Maa Veaitiɛ

Gala Goo Wotii Maazu Vɛtɛ Veaitiɛ ta pele wulo ga Kolai Maa Veaitiɛ zui wɔlɔ-kɔlɔ ma. Ta leve ɣɛ le te kwɛ̃ɛ ki-daa-wodoi manɛɛ te fe? Wɛlɛ velei Gala goo wotii maazu vɛtɛ veaitiɛ tɔ nii ɣɛɛ la wɔlɔ-wɔlɔi zu. A Te Ɣɛɛ Ʋaitiɛ 15:1, 2 lodo, wo gaa-zaɣa-kɛɛ niitiɛ ɣaa wote:

Zɛɓɛi e kɛɛni kpɔɛ yɛ loo Kolai Maa Vea taniga yɔɔzu wɔlɔ-wɔlɔi zu?
Ɓɛɛni ka Pɔɔ, Banaba ɓɔga numai zɔitiɛ te liini te wɔ ga te fai nii ɣaa wulo ba?

A Te Ɣɛɛ Ʋaitiɛ 15:12-18, 23-29 lodo, wo gaa-zaɣa-kɛɛ nii ɣaa wote:

Zɛɓɛi Gala goo wotii maazu vɛtɛ veaitiɛ te kɛɛni ga Jehova pele wulo ga tiɛ fai nii zu?—A wɛlɛ ma woo 12, 15, ɓɔga 28 va.

A Te Ɣɛɛ Ʋaitiɛ 15:30, 31 ɓɔga 16:4, 5, lodo, wo gaa-zaɣa-kɛɛ niitiɛ ɣaa wote:

Zɛɓɛi de ɣaa yɔwɔ̃itiɛ te kɛɛni ga deʋei nii Gala goo wotii maazu vɛtɛ veaitiɛ te feeni?
Jehova tuuyiɛ looni te ma ɣɛ le?

A 2 Temete 3:16 ɓɔga Jĩi 1:5 lodo, wo gaa-zaɣa-kɛɛ nii ɣaa wote:

Zɛɓɛi zaa ya ɓɔ Gala Goo Wotii Maazu Vɛtɛ Veaitiɛ va ga te deʋe vagɔ wo?

NUMAA TANIGA TA ƔƐ TEA: “Ya wuitona Gala Goo Wotii Maazu Vɛtɛ Veaitiɛ ma, nu ɓuse nɔ ɣana e vilesu pulu.”

Zɛɓɛi e dɛɛ ga yiɛ ga Ziizɛ ɣa pele wulozu ga Gala Goo Wotii Maazu Vɛtɛ Veaitiɛ?

NII SA È MAA WOLIA

Kolai ɣa e yee ɓadoga Gala Goo Wotii Maazu Vɛtɛ Veaitiɛ va. Tiɛ ɣa te da zɔɔlaitiɛ ɓɛtɛzu na ɣa ɣɛɛna tiɛ ki-daa-wodo ʋe de ya zui wɔlɔ-kɔlɔ ma.

Ma-ɓigitiɛ

Ɓɛɛ ɣa e yee ɓadoga Gala goo wotii maazu vɛtɛ veaitiɛ va?
Gala Goo Wotii Maazu Vɛtɛ Veaitiɛ ta de maazu vɛtɛ ɣɛ le?
E laavɛ la ga Gala Goo Wotii Maazu Vɛtɛ Veaitiɛ ɣa te ga ‘nui niitiɛ nu ɣa laala, te ga numaitiɛ te ɣele-ɣelegɛi’?

Kalabogi laa wuloa foloi nii ma:

Ɣaa-ɓaa e nii ɣɛ

E ɣɛ velei 2 Tɛsɛlonaikaitiɛ 3:1 boga la, manɛɛ e ɣaa-ɓaa yiɛ Gala feli siɛ nɛpɛ ma ga Jehova tuuyiɛ loo tii nii ma Gala Goo Wotii Maazu Vɛtɛ Veaitiɛ te kɛɛzu.

Zɔitiɛ e wõini e kɛ ponɛ vɛ:

Your other goal