Jesu ki yena Toho ya puteho ya Sikreste. (Maefese 5:23) Kacenu, Jesu uetelela balateleli bahae kuzwelela kwa lihalimu ka kuitusisa “mutanga yasepahala yanani kutwisiso.” (Mubale Mateu 24:45.) Nihaike kuli “mutanga” yo uketilwe ki Jesu kasibili mi ufilwe maata amañwi, usali mutangaa Kreste mi usebeleza banyani ba Kreste. Ki mañi mutanga yo? Mi ulubabalela cwañi?

1. “Mutanga yasepahala yanani kutwisiso” ki mañi?

Kuzwa feela kwamulaho, Jehova uitusisanga mutu kamba sikwatanyana sa baana kuli baetelele batu bahae. (Malaki 2:7; Maheberu 1:1) Jesu hasaashwile, baapositola ni baana-bahulu ba mwa Jerusalema ki bona bane baetelela batu ba Mulimu. (Likezo 15:2) Ka kulatelela mutala wo, kacenu sikwatanyana sa baana-bahulu, ili sona Sitopa Sesietelela sa Lipaki za Jehova, sisweli kufa lico za kwa moya ni kuetelela musebezi wa kukutaza. Sikwata seo ki sona “mutanga yasepahala yanani kutwisiso.” (Mateu 24:45a) Baba mwa Sitopa Sesietelela kaufela ki Bakreste babatozizwe, ili babanyolelwa kuyo busa ni Kreste mwa Mubuso wa Mulimu kwa lihalimu.

2. Mutanga yasepahala ufa lico zecwañi za kwa moya?

Jesu naabulezi kuli mutanga yasepahala ‘naakafa Bakreste sina yena lico zabona ka nako yeswanela.’ (Mateu 24:45b) Sina feela lico za kwa mubili hali lutusa kuba ni buikangulo bobunde, lico za kwa moya ni zona, ili litaelo zezwa mwa Linzwi la Mulimu, lilufa maata alutusa kuzwelapili kusepahala ku Jehova ni kueza musebezi wanaa lufile Jesu. (1 Timotea 4:6) Lufepiwa kwa moya haluli kwa mikopano ya puteho, mikopano yemituna ni yeminyinyani, ni halubala lihatiso mokufumaneha litaba za mwa Bibele ni kubuha mavidio alutusa kuziba tato ya Mulimu ni kulutusa kuzwelapili kuba ni silikani sesinde ni yena.

MUBATISISE

3. Batu ba Jehova baswanela kuba babaonga-ongilwe hande

Ka kuetelelwa ki Jesu, Sitopa Sesietelela sionga-onga musebezi wa Lipaki za Jehova. Jesu naaetelezi Bakreste ba kwa makalelo ka nzila yeswana. Mubuhe VIDIO.

Mubale 1 Makorinte 14:33, 40, mi kihona mukanyakisisa puzo yelatelela:

• Litimana ze libonisa cwañi kuli Jehova ubata kuli Lipaki zahae baswalisane?

4. Mutanga yasepahala uetelela hande musebezi wa kukutaza

Bakreste ba kwa makalelo nebaanga musebezi wa kukutaza kuba wa butokwa. Mubale Likezo 8:14, 25, mi kihona mukaalaba lipuzo zelatelela:

• Ki mañi yanaaetelela musebezi wa kukutaza mwa linako za baapositola?

• Pitrosi ni Joani nebaezize cwañi hane bakupilwe ki baapositola babañwi kuli baeze nto yeñwi?

Kukutaza ki musebezi wa butokwa hahulu oonga-ongilwe ki Sitopa Sesietelela. Mubuhe VIDIO.

 Jesu naabonisize kuli musebezi wa kukutaza ki wa butokwa hahulu. Mubale Mareka 13:10, mi kihona mukanyakisisa lipuzo zelatelela:

• Ki kabakalañi Sitopa Sesietelela hasiinga musebezi wa kukutaza kuba wa butokwa hahulu?

• Ki kabakalañi halutokwa “mutanga yasepahala yanani kutwisiso” kuonga-onga musebezi wa kukutaza mwa lifasi kaufela?

5. Mutanga yasepahala ki yena yaetelela

Sitopa Sesietelela ki sona sesietelela Bakreste ba niti mwa lifasi kaufela. Siezanga cwañi likatulo ni kufa ketelelo? Munyakisise mo sitopa sesietelela sa Bakreste ba kwa makalelo nesiezelize cwalo. Mubale Likezo 15:1, 2, mi kihona mukanyakisisa lipuzo zelatelela:

• Bakreste ba kwa makalelo nebasika utwana fa taba mañi?

• Paulusi, Barnabasi, ni babañwi nebafumani kai tuso yene batokwa kuli batatulule butata?

Mubale Likezo 15:12-18, 23-29, mi kihona mukanyakisisa puzo yelatelela:

• Pili basika eza kale katulo, ki lika mañi zene banyakisisize ba sitopa sesietelela kuli bazibe mwakutatululela butata ka kuya ka tato ya Mulimu?—Mubone litimana 12, 15, ni 28.

Mubale Likezo 15:30, 31 ni 16:4, 5, mi kihona mukanyakisisa lipuzo zelatelela:

• Bakreste ba kwa makalelo nebaangile cwañi ketelelo yene bafilwe ki sitopa sesietelela?

• Jehova naabafuyauzi cwañi hane balatelezi ketelelo yene bafilwe ki sitopa sesietelela?

Mubale 2 Timotea 3:16 ni Jakobo 1:5, mi kihona mukanyakisisa puzo yelatelela:

• Sitopa Sesietelela mwa linako zaluna sikupanga kai ketelelo pili sisika eza kale likatulo?

 LITABA KA BUKUSWANI

Sitopa Sesietelela ki yena “mutanga yasepahala yanani kutwisiso” yaketilwe ki Kreste. Ufa lico za kwa moya kwa Bakreste mwa lifasi kaufela.

Mulundulule

• Ki mañi yaketile “mutanga yasepahala yanani kutwisiso”?

• Ba Sitopa Sesietelela balubabalela cwañi?

• Kana mwalumela kuli ba Sitopa Sesietelela ki bona “mutanga yasepahala”?