DILONGESHA DIA 54
Mudimu wa “mupika wa lulamatu udi mudimuke”
Yezu ke udi ku mutu kua tshisumbu tshia bena Kristo. (Efeso 5:23) Lelu eu, Yezu udi ulombuela bayidi bende badi pa buloba mu diulu ku diambuluisha dia “mupika wa lulamatu udi mudimuke.” (Balayi Matayi 24:45.) Mudi “mupika” eu mutekibue kudi Yezu nkayende, udi ne ndambu wa bukokeshi; nansha nanku, mmushale anu mupika wa Kristo udi wenzela bana babu ne Kristo mudimu. Mupika au nnganyi? Mmunyi mudiye utabalela majinga etu?
1. Nnganyi udi “mupika wa lulamatu udi mudimuke”?
Yehowa utu anu ulombola bantu bende ku diambuluisha dia muntu umue anyi dia kasumbu kakese ka bantu balume. (Malaki 2:7; Ebelu 1:1) Panyima pa lufu lua Yezu, bapostolo ne bakulu bavua mu Yelushalema ke bavua balombola tshisumbu. (Bienzedi 15:2) Lelu eu kabidi, kasumbu kakese ka bakulu, anyi Kasumbu kaludiki ka Bantemu ba Yehowa, ke kadi kafila biakudia bia mu nyuma ne kalombola mudimu wa buambi. Kasumbu aku ke “mupika wa lulamatu udi mudimuke uvua [Yezu] muteke.” (Matayi 24:45a) Bena mu Kasumbu kaludiki bonso mbena Kristo bela manyi a nyuma. Badi ne ditekemena dia kuya kukokesha ne Kristo mu Bukalenge buende bua mu diulu padibu bafua pa buloba apa.
2. Mbiakudia kayi bia mu nyuma bidi mupika wa lulamatu ufila?
Yezu wakamba ne: mupika wa lulamatu uvua ne bua ‘kupesha bena Kristo nende biakudia biabu mu tshikondo tshiakanyine.’ (Matayi 24:45b) Anu mutu biakudia bitutu tudia bitupetesha bukole ne makanda a mubidi, biakudia bia mu nyuma pabi (malongesha a mu Dîyi dia Nzambi) bidi bitupetesha bukole budi bukengela bua tushale ne lulamatu kudi Yehowa ne tukumbaje mudimu udi Yezu mutupeshe. (1 Timote 4:6) Tudi tupeta biakudia abi mu bisangilu, mu mpuilu ne mu mpungilu, nansha mu mikanda ne filme idi ituambuluisha bua tumanye tshidi Nzambi musue ne tukoleshe bulunda buetu nende.
BUELA MU BUONDOKE
Mona bua tshinyi tudi dijinga ne “mupika wa lulamatu udi mudimuke,” anyi Kasumbu kaludiki.
Bena mu Kasumbu kaludiki badi bafila biakudia bia mu nyuma, bulombodi, ne diambuluisha disunguluke kudi Bantemu ba Yehowa pa buloba bujima
3. Bantu ba Yehowa badi ne bua kuikala balongolola bimpe
Ku bulombodi bua Yezu, Kasumbu kaludiki kadi kalongolola mudimu wa Bantemu ba Yehowa. Bidi bipetangana ne tshivua bena Kristo ba mu bidimu lukama bia kumpala benza. Tangilayi FILME.
Balayi 1 Kolinto 14:33, 40, pashishe nuandamune lukonko elu:
-
Ntshinyi tshidi tshileja mu mvese eyi ne: Yehowa mmusue bua Bantemu bende bikale balongolola?
4. Mupika wa lulamatu udi ulongolola mudimu wetu wa buambi
Mudimu wa buambi ke mudimu wa mushinga wa bungi uvua bena Kristo ba mu bidimu lukama bia kumpala benze. Balayi Bienzedi 8:14, 25, pashishe nuandamune nkonko eyi:
-
Nnganyi uvua mulombole mudimu wa buambi uvua bena Kristo ba mu bidimu lukama bia kumpala benze?
-
Mmunyi muvua Petelo ne Yone batumikile buludiki bua bapostolo nabu?
Mudimu wa buambi udi Kasumbu kaludiki kalombola udi ne mushinga kupita midimu yonso. Tangilayi FILME.
Yezu wakaleje ne: mudimu wa buambi udi ne mushinga wa bungi. Balayi Mâko 13:10, pashishe nuandamune nkonko eyi:
-
Bua tshinyi bena mu Kasumbu kaludiki badi bangata mudimu wa buambi ne mushinga wa bungi?
-
Bua tshinyi tudi dijinga ne “mupika wa lulamatu udi mudimuke” bua kulombola mudimu eu pa buloba bujima?
5. Mupika wa lulamatu udi ufila bulombodi
Kasumbu kaludiki ke katu kalombola bena Kristo pa buloba bujima. Mmunyi mutuku kangata mapangadika a bulombodi bua kufila? Mona muvua kasumbu kaludiki ka mu bidimu lukama bia kumpala kafila bulombodi. Balayi Bienzedi 15:1, 2, pashishe nuandamune nkonko eyi:
-
Ntshilumbu kayi tshivua tshijule dikokangana munkatshi mua bena Kristo ba mu bidimu lukama bia kumpala?
-
Mbanganyi bavua Paulo ne Bânaba ne bantu bakuabu balombe buludiki bua kujikija tshilumbu atshi?
Balayi Bienzedi 15:12-18, 23-29, pashishe nuandamune lukonko elu:
-
Kumpala kua bena mu kasumbu kaludiki aku kuangata dipangadika, bavua benze tshinyi bua kupeta buludiki bua Nzambi mu tshilumbu atshi?—Tangilayi mvese wa 12, 15, ne 28.
Balayi Bienzedi 15:30, 31 ne 16:4, 5, pashishe nuandamune nkonko eyi:
-
Ntshinyi tshiakenza bena Kristo abu pakapetabu bulombodi bua kudi kasumbu kaludiki?
-
Yehowa wakabenesha ditumikila diabu mushindu kayi?
Balayi 2 Timote 3:16 ne Yakobo 1:5, pashishe nuandamune lukonko elu:
-
Lelu Kasumbu kaludiki katu kakeba bulombodi penyi kumpala kua kuangata mapangadika?
BAMUE BATU BAMBA NE: “Wewe utumikila Kasumbu kaludiki, udi ulonda bantu.”
-
Tshidi tshikujadikila ne: Yezu udi ulombola Kasumbu kaludiki ntshinyi?
TSHIA KUKUATA
Kasumbu kaludiki ke kadi kenza “mupika wa lulamatu udi mudimuke” udi Kristo muteke. Kadi kalombola bena Kristo pa buloba bujima ne kabapesha biakudia bia mu nyuma.
Diambulula
-
Nganyi udi muteke “mupika wa lulamatu udi mudimuke”?
-
Mmunyi mudi Kasumbu kaludiki katutabalela?
-
Udi witaba ne: Kasumbu kaludiki ke kadi kenza “mupika wa lulamatu udi mudimuke” anyi?
BIA KUTANGILA KABIDI
Mona mudi Kasumbu kaludiki kalongolola bua kuenza mudimu waku.
“Kasumbu kaludiki ka Bantemu ba Yehowa ntshinyi?” (Tshiena-bualu tshia mu jw.org)
Mona mudi bena mu Kasumbu kaludiki benza muabu muonso bua biakudia bia mu nyuma bitudi tupeta bikale bijalame.
Mmunyi mudi bena mu Kasumbu kaludiki bumvua bua mudimu udi Yezu mubapeshe bua kuenza?
Mmunyi mudi bisangilu ne mpungilu itudi tuenza ileja ne: Yehowa udi ulombola bena mu Kasumbu kaludiki?
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
