Yesu e Wi kanyakla mar Jokristo. (Jo-Efeso 5:​23) Ka en e polo, Yesu tayo jolupne manie piny kotiyo gi “jatich mogen kendo mariek.” (Som Mathayo 24:45.) Yesu e ma oyiero ‘jatijno’ kendo omiye teko moko, kata kamano, jatijno pod biro dhi nyime bedo misumba Yesu kendo tiyo ne owete Kristo. Jatich mogen kendo mariek en ng’a? To ere kaka oritowa?

1. “Jatich mogen kendo mariek” en ng’a?

Jehova osebedo ka tiyo gi chwo moko kata grup moro matin mar joma chwo e tayo jotichne. (Malaki 2:7; Jo-Hibrania 1:1) Bang’ tho Yesu, joote kod jodongo ma ne ni Jerusalem nokawo migawo mar tayo jolupne. (Tich Joote 15:2) E kindegi, grup matin mar jodongo luwo ranyisigino kuom chiwo chiemb chuny kendo tayo tij lendo. Grubno e Bura Matayo Joneno mag Jehova kata “jatich mogen kendo mariek ma [Yesu] noketo.” (Mathayo 24:45a) Owete duto manie Bura Matayo gin Jokristo mowal ma nigi geno mar locho gi Kristo e polo bang’ tieko wuodhgi e piny ka.

2. Gin chiemb chuny mage ma jatich mogen kendo mariek chiwo?

Yesu nowacho ni jatich mogen ne dhi ‘miyo Jokristo wetene chiemb chuny e kinde mowinjore.’ (Mathayo 24:45b) Mana kaka chiemo ma wachamo konyoga dendwa mondo obed motegno kendo wabed gi ngima maber, e kaka chiemb chuny ma en puonj mowuok kuom Wach Nyasaye, konyowa mondo wasik ka wamakore gi Jehova kendo timo tich ma Yesu nomiyowa. (1 Timotheo 4:6) Wayudo chiemb chuny e chokruoge madongo kod mag kanyakla, buge ma lero Muma, kod vidio. Chiemb chunygo konyowa ng’eyo dwach Nyasaye kendo tego osiep manie kindwa kode.

 TIM NONRO

3. Jotich Jehova nyaka bed joma ochanore

Kitayogi gi Yesu, Bura Matayo chano tije mitimo gi Joneno mag Jehova. Chenro ma kamano bende ne nitie e kinde Jokristo mokwongo. Tug VIDIO.

Som 1 Jo-Korintho 14:33, 40, kae to uwuo e wi penjo ma luwoni:

• Ere kaka ndikono nyiso ni Jehova dwaro ni Jonenone obed joma ochanore?

4. Jatich mogen kendo mariek chano tijwa mar lendo

Lando wach maber e tich maduong’ ahinya ma Jokristo mokwongo ne timo. Som Tich Joote 8:14, 25, kae to uwuo e wi penjo ma luwogi:

• En ng’ano ma ne tayo tij lendo e kinde Jokristo mokwongo?

• Petro gi Johana ne neno nade yo ma joote mamoko ne tayogigo?

Lendo e tich maduong’ ahinya ma Bura Matayo chano. Tug VIDIO.

 Yesu nojiwo kaka tij lendo en tich maduong’ ahinya. Som Mariko 13:10, kae to uwuo e wi penjo ma luwogi:

• Ang’o momiyo Bura Matayo neno tij lendo kaka tich maduong’ ahinya?

• Ang’o momiyo dwarore ni wabed gi “jatich mogen kendo mariek” ma chano tij lendo mitimo e piny ngima?

5. Jatich mogen tayowa

Bura Matayo e ma tayo jotich Nyasaye e piny ngima. Ere kaka ging’ado paro ma gichiwo ne jotich Nyasaye? Ne ane kaka bura matayo notimo e kinde Jokristo mokwongo. Som Tich Joote 15:1, 2, kae to uwuo e wi penjo ma luwogi:

• En wach mane ma nokelo ywaruok e kind Jokristo moko mokwongo?

• Paulo, Barnaba, gi jomamoko ne odhi ir jomage mondo okonygi tieko ywaruok ma ne nitiereno?

Som Tich Joote 15:12-18, 23-29, kae to uwuo e wi penjo ma luwoni:

• Ka ne pok bura matayo ong’ado paro e wi ywaruok ma ne nitie, ang’o ma ne gitimo mondo ging’e paro ma Nyasaye ne nigo e wi wachno?​—Ne kwan matindo 12, 15, kod 28.

Som Tich Joote 15:30, 31 kod 16:4, 5, kae to uwuo e wi penjo ma luwogi:

• Jokristo mokwongo ne orwako nade paro ma bura matayo ne ong’ado?

• Jehova noguedhogi e yo mane ka ne giluwo kaka nochikgi?

Som 2 Timotheo 3:16 kod Jakobo 1:5, kae to uwuo e wi penjo ma luwoni:

• E kindewagi, en ang’o ma konyoga Bura Matayo mondo ging’ad paro mowinjore?

 PUONJ MADUONG’

Bura Matayo e “jatich mogen kendo mariek” ma Kristo oyiero. Otayo kendo ochiwo chiemb chuny ne Jokristo e piny ngima.

Ang’o ma ipuonjori?

• En ng’a ma ne oyiero “jatich mogen kendo mariek”?

• Bura Matayo ritowa e yore mage?

• Be iyie ni Bura Matayo e “jatich mogen kendo mariek”?