Jesus yëˈë “myëdäjtypy ja kutujkën mä yëˈë mëbëjkpëtëjk” (Éfesʉ 5:23). Ets tyam, yëˈë yajtuumpy ‘ja tuumbë mëdiˈibë kuwijy’ parë tnëˈëmoˈoy ttuˈumoˈoy ja Diosmëduumbëty yä Naxwiiny (käjpxë Matewʉ 24:45). Jesus yëˈë mëdiˈibë wyinˈijxë yäˈädë ‘tuumbë’ ets pääty tmëdattë kutujkën. Per duˈunyëm tmëmëdowdë ets nanduˈun tmëdundë ja Jesusë myëgaˈaxëty. ¿Pënënë yäˈädë tuumbë? ¿Wiˈixtsoow xykyuentëˈäjtëm?

1. ¿Pënën ‘ja tuumbë mëdiˈibë kuwijy ets tyuumpy ti wyintsën tsyojkypy’?

Jyobaa xëmë të dyajtunyë naxwinyëdë jäˈäy parë tnëˈëmoˈoy ttuˈumoˈoyë kyäjpn (Malaquías 2:7; Ebreeʉsʉty 1:1). Extëm nˈokpëjktakëm, ko Jesus ojts yˈoˈknë, yëˈë ja apostëlëtëjk ets ja mëjjäˈäytyëjk mëdiˈibë Jerusalén, wyoowˈyeˈeytyë ja Diosë kyäjpn (Apostʉlʉty o Hechos 15:2). Tyam, taaˈäjtp nanduˈun tuk grupë mëjjäˈäytyëjk mëdiˈibë Wyoowˈyoˈoytyëbë Jyobaa tyestiigëty, yëˈë xymyoˈoyëm ja käˈäy ukënë mëdiˈibë Jyobaa yajkypy ets yˈijxypy wiˈix nyëˈëyeˈey tyuˈuyeˈey ja Diosë tyuunk. Yäˈädë mëjjäˈäytyëjk, yëˈë yajtijp ‘ja tuumbë mëdiˈibë kuwijy ets tyuumpy ti ja wyintsën [Jesus] tsyojkypy’ mëdiˈibë tukmënikakëtyaayë ja tuunk (Matewʉ 24:45a). Yëˈë Dios të wyinˈixëdë mëdë yˈespiritë santë parë yˈanaˈamdët mëdë Jesus ko yˈoˈknëdë yä Naxwiiny.

2. ¿Ti käˈäy ukënë xymyoˈoyëm ja tuumbë mëdiˈibë kuwijy?

Jesus ojts jyënany ko yäˈädë ‘tuumbë mëdiˈibë kuwijy’, yëˈë yajtukmënikakë ets “bom bom dyajkayët ja poˈoduumbëty o ja myëguˈuktëjk” (Matewʉ 24:45b). Duˈun extëm ko ngäˈäy nˈukën, yajtëjkëp ja jot mëjääw, nanduˈunën xymyëjääwmoˈoyëm ja käˈäy ukënë mëdiˈibë yajkypy ja tuumbë mëdiˈibë kuwijy, ko xynyëˈëmoˈoy xytyuˈumoˈoyëm mëdë Biiblyë parë kyaj nmastutëmë Jyobaa ets duˈunyëm nduˈunˈadëtsëm ja tuunk mëdiˈibë Jesus ojts xytyuknipëjkëm (1 Timotee 4:6). Yäˈädë käˈäy ukënë nˈaxäjëm ko nëjkxëm reunyonk, asamblee, ko ngäjpxëmë liibrë, rebistë ets ko nˈijxëmë bideo. Yëˈë xypyudëjkëm parë nnijäˈäwëm ti Jyobaa tsyojkypy ets niˈigyë nmëwingoˈonëm.

 AK NIJAWË NIˈIGYË

3. Mä Diosë kyäjpn yajxon tijaty yajtukniwitsë

Jesus yëˈë tyam tyuˈumoopy pënaty Wyoowˈyoˈoytyëbë Jyobaa tyestiigëty parë ttukniwitsëdët wiˈix ja tuunk yajtunäˈäny, duˈun extëm yajtuuny mä primer siiglë. Ixtë BIDEO.

Käjpxtë 1 Korintʉ 14:33, 40 ets nimaytyäˈäktë mëdiˈibë yä yajtëëpy:

• ¿Wiˈixë yäˈädë tekstë xytyukˈijxëm ko Jyobaa tsyojkypy ets mä nyax kyäjpn yajxon tijaty yajtukniwitsët? ¿Ets tiko duˈun mwinmay?

4. Ja tuumbë mëdiˈibë kuwijy yëˈë tyukniwijtsëp wiˈix nˈëwäˈkx ngäjpxwäˈkxëm

Pënaty tim jawyiin ojts tpanëjkxtë Jesus, nitii tuunk duˈun tkamëjpëjktaktë extëm ko nyëjkxtët ëwäˈkx käjpxwäˈkxpë. Käjpxtë Apostʉlʉty 8:14, 25 ets nimaytyäˈäktë mëdiˈibë yä yajtëëpy:

• Mä primer siiglë, ¿pënatyë nety yˈijxypy wiˈix tyuˈuyeˈey ja Diosë tyuunk?

• ¿Ti tyuundë Pedro mëdë Juan ko kyajxtsoˈonëdë ja apostëlëtëjk?

Tuk pëky ja tuunk mëdiˈibë jëjpˈam yˈijxtëp pënaty Wyoowˈyoˈoytyëbë Jyobaa tyestiigëty, yëˈë ko ttukniwitsëdë wiˈix nˈëwäˈkx ngäjpxwäˈkxëm. Ixtë BIDEO.

Jesus ojts jyënaˈany ko jëjpˈam nëjkxëm ëwäˈkx käjpxwäˈkxpë. Käjpxtë Markʉs 13:10 ets nimaytyäˈäktë mëdiˈibë yä yajtëëpy:

• Pënaty Wyoowˈyoˈoytyëbë Jyobaa tyestiigëty, ¿tiko jëjpˈam tˈixtë ets yajkäjpxwäˈkxët ja Diosë yˈayuk?

• ¿Tiko tsyokyëty ets ‘ja tuumbë mëdiˈibë kuwijy’ ttukniwitsët wiˈix nˈëwäˈkx ngäjpxwäˈkxëm abëtsëmy nyaxwinyëdë?

5. Yëˈë tuumbë mëdiˈibë kuwijy xynyëˈëmoˈoy xytyuˈumoˈoyëm

Pënaty Wyoowˈyoˈoytyëbë Jyobaa tyestiigëty, abëtsëmy nyaxwinyëdë ttuˈumoˈoytyë ja Diosë kyäjpn. ¿Wiˈix ttundë? Min nˈokˈijxëm wiˈix mä primer siiglë duˈun ttuundë pënaty ojts ttuˈumoˈoytyë ja Diosë kyäjpn. Käjpxtë Apostʉlʉty 15:1, 2 ets nimaytyäˈäktë mëdiˈibë yä yajtëëpy:

• Extëm jyënaˈanyë yäˈädë tekstë, ¿ti yajtsiptaktë nääk ja Dios mëduumbëty?

• Parë ojts yˈoyë yäˈädë jotmay, ¿pën nyinëjkxtë Pablo, Bernabé ets ja myëguˈuktëjk mëdiˈibë jamyëdäjtëdë?

Käjpxtë Apostʉlʉty 15:12-18 etsë 23-29, ets nimaytyäˈäktë mëdiˈibë yä yajtëëpy:

• Pënaty wyoowˈyeˈeytyë Diosë kyäjpn, ¿ti jawyiin tyuundë mä tkayajwingëdäˈäktënëmë yäˈädë jotmay parë Dios tyuˈumoˈoyëdët? (Ixtë bersikulo 12, 15 etsë 28).

Käjpxtë Apostʉlʉty 15:30, 31 etsë 16:4, 5, ets nimaytyäˈäktë mëdiˈibë yä yajtëëpy:

• ¿Wiˈix ja Diosmëduumbëty nyayjyäˈäwëdë ko tmëdoowdë extëmë nety tyuˈumoˈoyëdë pënaty wyoowˈyeˈeytyëp ja Diosë kyäjpn?

• ¿Wiˈix nnijäˈäwëm ko Jyobaa ojts kyunuˈkxëdë ko ttuundë extëm yaˈˈanmääytyë?

Käjpxtë 2 Timotee 3:16 etsë Santya̱ˈa̱gʉ 1:5, ets nimaytyäˈäktë mëdiˈibë yä yajtëëpy:

• Pënaty tyam Wyoowˈyoˈoytyëbë Jyobaa tyestiigëty, ¿ti naytyuktuˈumooyëdëp parë tnijawëdët wiˈix tijaty ttundët?

TI TË NJÄJTËM

Pënaty Wyoowˈyoˈoytyëbë Jyobaa tyestiigëty, yëˈë duˈun ‘ja tuumbë mëdiˈibë kuwijy’ mëdiˈibë Jesus të tyukmënikaagëdë ja tuunk. Yëˈë tyuˈumooytyëbë Diosë kyäjpn abëtsëmy nyaxwinyëdë ets xymyoˈoyëm ja käˈäy ukënë mëdiˈibë Jyobaa yajkypy.

Ajamyatsë

• ¿Pën tuunkmooyë ‘ja tuumbë mëdiˈibë kuwijy’?

• ¿Wiˈix xyˈijxˈijt xykyuentëˈäjtëm pënaty Wyoowˈyoˈoytyëbë Jyobaa tyestiigëty?

• ¿Mmëbëjkypy mijts ko pënaty Wyoowˈyoˈoytyëbë Jyobaa tyestiigëty yëˈë duˈun ‘ja tuumbë mëdiˈibë kuwijy ets tyuumpy ti ja wyintsën tsyojkypy’?