Jesũ nĩwe kĩongo gĩa kĩũthũrano kĩa Gĩkristũ. (Aefeso 5:23) Ĩgiita rĩrĩ, Jesũ arĩ Mũnene ĩgũrũ, natongagĩĩria athingati baawe nthĩgũrũne gũkũrũkĩĩra “nthumba iria yagirite na injume.” (Thooma Mathayo 24:45.) Jesũ Kristũ nĩwe wengwa wathuurĩre “nthumba” ĩu, aramĩnenkera waatho bwa gũtua matua manna, ĩndĩ ĩrĩngĩĩta na mbere gũtumĩka ĩrĩ nthũmba ya Kristũ na gũtumĩkĩra ataana-ĩthe ba Kristũ. Nthũmba ĩu nũũ? Nĩatĩa nthũmba ĩu ĩtũmenyagĩĩra?

1. Nũũ nthũmba mbĩtĩkua na ĩnjũme?

Rĩonthe Jehova nethĩrĩtwe agĩtumĩra muntũ mũrũme mũnna kana gĩkundi kĩnna kĩa antũ arũme gũtongeeria antũ baawe. (Malaki 2:7; Ahibirania 1:1) Nyuma ya Jesũ gũkua, atũmwa na akũrũ ba kĩũthũrano Jerusalemu nĩbo baajũkĩrie kaanya ka gũtongeeria. (Mathithio 15:2) Na njĩra o ta ĩu, naarua gakundi kaniini ka akũrũ—getagwa Kĩama Kĩrĩa Gĩtongagĩĩria kĩa Akũũjĩ ba Jehova—nĩkathuranagĩra biakũrĩa bia gĩkĩrundu na gũtongeeria ngũgĩ ya gũtũmĩĩria. Gakundi kau karĩa kathuuri nĩ Jesũ nĩko “nthumba iria yagirite na injume.” (Mathayo 24:45a) Amemba bonthe ba Kĩama Kĩrĩa Gĩtongagĩĩria nĩ Akristũ etũrĩrua maguta, barĩa berĩgagĩĩra kwathana amwe na Kristũ Ũnenene bwawe bwa ĩgũrũ rĩrĩa ũtũũro bwao bwa aja nthĩgũrũne bwathira.

2. Nĩ biakũrĩa birĩkũ bia gĩkĩrundu nthũmba mbĩtĩkua ĩthuranagĩra?

Jesũ augĩre nthũmba mbĩtĩkua ‘iringiejaga’ Akristũ bangĩ “biakuria igiita riabio riakinya.” (Mathayo 24:45b) O ta ũrĩa tũrĩjaga biakũrĩa bigatethia mĩĩri yeetũ kwĩthĩrwa na inya na ũgima bũbwega, biakũrĩa bia gĩkĩrundu—motaaro kuuma kĩrĩ Rũteto rwa Mũrungu—nĩbitwejaga inya ĩrĩa tũkũbatara nĩkenda tũkara tũrĩ etĩkĩkua kĩrĩ Jehova na tũthithia ngũgĩ ĩrĩa Jesũ aatwere. (1 Timotheo 4:6) Nĩtwonaga biakũrĩa biu bia gĩkĩrundu gũkũrũkĩĩra mĩcemanio, igomano bia gĩcigo na bia mũthiũrũko, ona kinya gũkũrũkĩĩra mauku jegie Bibiria na vidio irĩa itũtethagia kũmenya wendi bwa Mũrungu, na gwĩkĩra inya ũcoore bwetũ amwe nawe.

 ĨNJA NKŨRŨKI

3. Antũ ba Jehova no mwanka bethĩrwe babanganĩtue

Bagĩtongagĩĩrua nĩ Jesũ Kristũ, Kĩama Kĩrĩa Gĩtongagĩĩria nĩ kĩbanganagia ngũgĩ ya Akũũji ba Jehova. Akristũ ba mbere nĩbaarĩ na mũbango o ta jũu. Tega VIDIO.

Thooma 1 Akorintho 14:33, 40, rĩu bwarĩĩrie kĩũria gĩkĩ:

• Nĩatĩa mĩstaarĩ ĩjĩ ĩkwonania atĩ Jehova nendaga Akũũjĩ baawe bethĩrwe babanganĩtue?

4. Nthũmba mbĩtĩkua nĩbanganagia ngũgĩ yeetũ ya gũtũmĩĩria

Ngũgĩ ya gũtũmĩĩria nĩyo yaarĩ ya gĩtũmi nkũrũki ĩrĩa yaaritagwa nĩ Akristũ ba mbere. Thooma Mathithio 8:14, 25, rĩu bwarĩĩrie biũria bibi:

• Kĩrĩ Akristũ ba karine ya mbere, nũũ watongagĩĩria ngũgĩ ya gũtũmĩĩria?

• Natĩa Petero na Johana beetĩkĩrĩrie mwerekera jũrĩa baerwe nĩ atũmwa bangĩ?

Ngũgĩ ya gũtũmĩĩria nĩyo ya gĩtũmi nkũrũki ĩrĩa Kĩama Kĩrĩa Gĩtongagĩĩria kĩbanganagia. Tega VIDIO.

 Jesũ naainyĩrĩrie ũrĩa ngũgĩ ya gũtũmĩĩria ĩrĩ ya gĩtũmi. Thooma Mariko 13:10, rĩu bwarĩĩrie biũria bibi:

• Nĩkĩ Kĩama Kĩrĩa Gĩtongagĩĩria kĩonaga ngũgĩ ya gũtũmĩĩria ĩrĩ ya gĩtũmi nkũrũki?

• Nĩkĩ tũkũbatara “nthumba iria yagirite na injume” ĩbangania ngũgĩ ĩjĩ ya gũtũmĩĩria nthĩgũrũne yonthe?

5. Nthũmba ĩrĩa njũme nĩtũtongagĩĩria

Kĩama Kĩrĩa Gĩtongagĩĩria nĩkĩejaga Akristũ nthĩgũrũne yonthe mantũ ja kũthingata. Nĩatĩa bamenyaga nĩ mwerekera jũrĩkũ bakwejana? Ona nĩatĩa Kĩama Kĩrĩa Gĩtongagĩĩria kĩa Akristũ ba mbere kĩathithĩrie. Thooma Mathithio 15:1, 2, rĩu bwarĩĩrie biũria bibi:

• Nĩ ũntũ bũrĩkũ bwatũmĩte Akristũ bamwe ba karine ya mbere barega kũgwatanĩra?

• Nĩ kĩrĩ baau Paũlũ, Baranaba na bangĩ beetĩre nĩkenda batetheerua ũntũne bũu?

Thooma Mathithio 15:12-18, 23-29, rĩu bwarĩĩrie kĩũria gĩkĩ:

• Mbere ya gũtua ĩtua rĩu, nĩatĩa Kĩama Kĩrĩa Gĩatongagĩĩria gĩa karine ya mbere kĩathithĩrie nĩkenda kĩona ũtethio bwa Mũrungu bwegie ũntũ bũu?—Tega mĩstaarĩ ya 12, 15, na 28.

Thooma Mathithio 15:30, 31 na 16:4, 5, rĩu bwarĩĩrie biũria bibi:

• Nĩatĩa Akristũ ba karine ya mbere beetĩkĩrĩrie ũtethio bũrĩa baerwe nĩ Kĩama Kĩrĩa Gĩatongagĩĩria?

• Nĩatĩa Jehova aatharimĩre waathĩki bwao?

Thooma 2 Timotheo 3:16 na Jakubu 1:5, rĩu bwarĩĩrie kĩũria gĩkĩ:

• Nĩkũ Kĩama Kĩrĩa Gĩtongagĩĩria gĩcwaga mwerekera rĩrĩa gĩgũtua matua naarua?

 NA NJĨRA ĨNKUĨ

Kĩama Kĩrĩa Gĩtongagĩĩria nĩ “nthumba iria yagirite na injume” ĩrĩa ĩthuuri nĩ Kristũ. Nĩejaga Akristũ ũtongeeria na biakũrĩa bĩa gĩkĩrundu nthĩgũrũne yonthe.

Gũcookera

• Nũũ wathuurĩre “nthumba iria yagirite na injume”?

• Nĩatĩa Kĩama Kĩrĩa Gĩtongagĩĩria gĩtũmenyagĩĩra?

• Gwe-rĩ, nwĩtĩkagia atĩ Kĩama Kĩrĩa gĩtongagĩĩria nĩkĩo “nthumba iria yagirite na injume”?