Zizɛ lɛ e liesi Tokɛlɛipiemia wa nukielaa kaa. (Ifisɔ̃ 5:​23) Pɛnɛɛ, Zizɛ lɛ yaa la dɔtaŋanaa la lɛi sɛlɛ yi aa liesi la mia ni ka ‘yɛɓokɛmi gikããzɛ lɛ o bɛi o zo dɔɔ a mɔɔ’ kɔ yi kpoula zee. (Mafiu 24:​45 gee.) Zizɛ Kɛlɛi dietĩ lɛ e “yɛɓokɛmi” e kilia sia, ɛ̃ɛ̃ lɛ e yikɛgaa nɔ a lɛɛ kɛ e yɛɓo kɛ a kaa. E kɛ bɛ̃ɛ̃ kilia, laa mɔ yɛɓokɛmi e kilia e Kɛlɛi we kɛ ɛ̃ɛ̃ e yɛɓo kɛ Kɛlɛi leege vɔ lɛɛ. De e yɛɓokɛmi e kilia ka? Zi kpɛɛ lɛ yɛɓokɛmi e kilia e e zokɛa ko pie?

1. De e ‘yɛɓokɛmi gikããzɛ lɛ o bɛi o zo dɔɔ a mɔɔ’ ka?

Zihova aa gbɛ̃ mɔ mi ɛ̃ɛ̃ mia kpo ɓeĩ sii ka kɛɛ o pɛzɔ̃ɔ̃ la mia ni lɛɛ. (Malaka 2:7; Hiibulu 1:1) Lɛ Zizɛ e gaa, apɔsɔlɔ vɔɔ wa mia diedievɔ lɛ o kɛ mɔ Zulusalɛɛ, lɛ o kɛ liesipia Tokɛlɛipiemia kaa. (Apɔsɔlɔ 15:2) Zi nɔ dooa lɛ Mia Diedievɔ Kpo Ɓeĩa o liesia Zihova la Kelavɔ ka, waa leɓele nɔ o lɛɛ, ɛ̃ɛ̃ waa liesi wɔ̃laũ yie gee yɛɓoa kaa. Mia Kpo Ɓeĩa lɛ o ‘yɛɓokɛmi gikããzɛ lɛ o bɛi o zo dɔɔ a mɔɔ’ kaa, lɛ Zizɛ e la mia ni kpɔ a kɔlaa. (Mafiu 24:​45a) Mia Diedievɔ Kpo Ɓeĩa seĩ o Tokɛlɛipiemia lɛ Wala la gɛɛ pulua aa o sia ka, wa Zizɛ ni oo lo liesii la Tomialaa ka lɛi sɛlɛ yi ye waa gaa ka.

2. Leɓele kpɛɛ lɛ yɛɓokɛmi gikããzɛɛ a nɔ?

Zizɛ a gee kelɛ yɛɓokɛmi zodɔamɔzɛɛ lɛɛ lo e ɓɛɛ Tokɛlɛipiemia “wa leɓele nɔɔ o lɛɛ a nɔ o lɛɛ luo ka.” (Mafiu 24:​45b) Lɛ zi nɔ leɓele ko ɓelea e gbũa ko mɔ kɛɛ ko mɛ e kɛ gaga ɛ̃ɛ̃ ko kɛ keleŋkeleŋ ko gbĩkpala yia, lɛ leɓele lɛ e Wala Lewe kaa e gbũa ko mɔ kɛɛ ko mɛ e kɛ gaga, kɛ ko kunu Zihova mɔ ɛ̃ɛ̃ kɛ ko yɛɓo lɛ Zizɛ a nɔ ko lɛɛ ko kɛɛ kɛɛ. (1 Temɔte 4:6) Koo leɓele e kilia sɔlɔɓo pakiemɔ, ɛsamele, wa kɔ̃vɛ̃ĩsɔ̃ nia mɔ, ɛ̃ɛ̃ Baabo zɔ̃ɔ̃pɔɔ wa vilo ni lɛ o gbũ ko mɔ kɛɛ ko wɔ̃ lɛ Wala e naaa dɔ, ɛ̃ɛ̃ kɛ ko ye ni ko ɓɛɛlaa mɛ e kɛ gagaa.

 A PIE FOO

3. Laa mɔ Zihova la mia ni wa wɔ̃ yaa e kɛa e kie le

Zizɛ kɔ wia, Mia Diedievɔ Kpo Ɓeĩa oo yɛɓo lɛ Zihova la Kelavɔ o kɛɛ wɔ̃ ya e kie le. Zi nɔ Tokɛlɛipiemia o kɛ mɔɔ wa kɛ a kaa lɛ. Ko VILOA gɛ̃.

Ko 1 Kɔleĩtĩã 14:​33, 40 gee, ɛ̃ɛ̃ kɛ ko wɛĩlɔɔ e kea yiɓo:

• Zi kpɛɛ lɛ a lonipia nia a zɔ̃ɔ̃a kelɛ Zihova laa naa la Kelavɔ wa wɔ̃ yaa e kɛa e kie le?

4. Mia Diedievɔ Kpo Ɓeĩa oo wɔ̃laũ yie gee yɛɓoa wɔ̃ ya e kie le

Wɔ̃laũ yie gee yɛɓoa e kɛ yɛɓo kpanazɛ kpokpo ka Tokɛlɛipiemia lɛ o kɛ mɔɔ lɛɛ. Apɔsɔlɔ 8:​14, 25 gee, ɛ̃ɛ̃ kɛ ko wɛĩlɔɔ ni o kea yiɓo:

• Deĩ mia lɛ o kɛ Tokɛlɛipiemia lɛ o kɛ mɔɔ la, waa liesi wɔ̃laũ yie gee yɛɓoa ka

• Zi kpɛɛ lɛ Pilɛ wa Zɔ̃ɔ̃ o o kɔyaa ka wɔ̃ lɛ o ɓɛɛ Tokɛlɛipiemia wa gee o kɛɛ wi?

Wɔ̃laũ yie gee yɛɓoa lɛ yɛɓo kpanazɛ kpokpo lɛ Mia Diedievɔ Kpo Ɓeĩa wa ya e kie lea ka. Ko VILOA gɛ̃.

 Zizɛ ee we nɛɛ pɛ e wɔ̃laũ yie gee yɛɓoa kɛ kpanazɛɛ la. Ko Maa 13:​10 gee, ɛ̃ɛ̃ kɛ ko wɛĩlɔɔ ni o kea yiɓo:

• Mɛ e kɛ lɛ wɔ̃laũ yie gee yɛɓoa lɛ kpokpo ɓo kpanazɛ Mia Diedievɔ Kpo Ɓeĩa lɛɛ?

• Mɛ e kɛ lɛ laa mɔ Mia Diedievɔ Kpo Ɓeĩa o yɛɓo e kea wɔ̃ ya e kie le kpoula lɛ seĩ mɔ?

5. Mia Diedievɔ Kpo Ɓeĩa oo zi zɔ̃ɔ̃

Mia Diedievɔ Kpo Ɓeĩa oo zi zɔ̃ɔ̃ Tokɛlɛipiemia lɛɛ kpoula lɛ seĩ mɔ. Zi kpɛɛ lɛ o wɔ̃ lɛ laa mɔ mia o kɛɛ wɔ̃ yaa ka e kie le? Zi lɛ Mia Diedievɔ Kpo Ɓeĩ lɛ o kɛ mɔɔ wa kɛ a kaa gɛ̃. Ko Apɔsɔlɔ 15:​1, 2 gee, ɛ̃ɛ̃ kɛ ko wɛĩlɔɔ ni o kea yiɓo:

• Mɛɛ wɔ̃ lɛ e nu wesãkieka ka Tokɛlɛipiemia lɛ o kɛ mɔɔ do fĩã?

• Deĩ mia lɛ Pɔɔ wa Banaba, ɛ̃ɛ̃ mia ye o toa o lo o pie kɛ o wɔ̃ɔ yibɛi?

Ko Apɔsɔlɔ 15:​12-18, 23-29 gee, ɛ̃ɛ̃ kɛ ko wɛĩlɔɔ e kea yiɓo:

• Kɛ o tĩã wɔ̃ do ya o ge o kɛɛ, mɛɛ wɔ̃ lɛ Mia Diedievɔ Kpo Ɓeĩ lɛ o kɛ mɔɔ, o kɛa kɛpia kɛ Wala e zi zɔ̃ɔ̃ o lɛɛ e gbɛ̃a wɔ̃ e kilia mɔ​—A lonipia 12, 15, wa 28 gɛ̃.

Ko Apɔsɔlɔ 15:​30, 31 wa 16:4, 5 gee, ɛ̃ɛ̃ kɛ ko wɛĩlɔɔ ni o kea yiɓo:

• Zi kpɛɛ lɛ Tokɛlɛipiemia o kɛ mɔɔ o wɔ̃ kɛa lɛ Mia Diedievɔ Kpo Ɓeĩa o zi zɔ̃ɔ̃ o lɛɛ ka?

• Zi kpɛɛ lɛ Zihova e lua kpɔa o mɔ lɛ o o we kɛɛ ka?

Ko 2 Temɔte 3:​16 wa Zĩĩ 1:5 gee, ɛ̃ɛ̃ kɛ ko wɛĩlɔɔ e kea yiɓo:

• Pɛnɛɛ deĩ lɛ Mia Diedievɔ Kpo Ɓeĩa o lo a pie kɛɛ e zi zɔ̃ɔ̃ o lɛɛ ye waa naa o wɔ̃ do kɛɛ ka?

 WƆ̃Ɔ WŨ

Mia Diedievɔ Kpo Ɓeĩa lɛ e ‘yɛɓokɛmi gikããzɛ lɛ o bɛi o zo dɔɔ a mɔɔ’ ka lɛ Kɛlɛi aa sia. Lɛɛ zi zɔ̃ɔ̃ ɛ̃ɛ̃ aa leɓele nɔ Kɛlɛi la toapiemia lɛɛ kpoula lɛ seĩ mɔ.

Zovuo Wɔ̃

• Deĩ lɛ e yɛɓokɛmi gikããzɛ lɛ o bɛi o zo dɔɔ a mɔɔ si?

• Zi kpɛɛ lɛ Mia Diedievɔ Kpo Ɓeĩa o o zokɛa ko pie?

• Ɓaa gɛ̃ wana ka kelɛ Mia Diedievɔ Kpo Ɓeĩa lɛ e ‘yɛɓokɛmi gikããzɛ lɛ o bɛi o zo dɔɔ a mɔɔ’ kaa?