Zezi, limem Sef lasanble Kretien. (Efezien 5:23) Azordi, depi lesiel, Zezi pe servi “lesklav fidel ek saz” pou diriz so bann disip ki lor later. (Lir Matie 24:45, NW.) Se Zezi Kris limem, ki’nn etabli ‘sa lesklav-la’ ek ki’nn donn li drwa pou pran sertin desizion. Kanmem sa, sa lesklav-la bizin obeir Lekris ek servi bann frer Lekris. Kisannla sa lesklav-la? Kouma sa lesklav-la pran nou swin?

1. Kisannla “lesklav fidel ek saz”?

Zeova finn touletan servi enn zom ouswa enn ti group zom pou gid so pep. (Malaki 2:7; Ebre 1:1) Apre lamor Zezi, se bann zapot ek bann ansien dan Zerizalem ki ti fer sa. (Zistwar Bann Apot 15:2) Dan mem fason, azordi se enn ti group ansien ki gid pep Zeova; apel zot Komite Santral bann Temwin Zeova. Zot donn nou manze spiritiel ek zot diriz travay predikasion. Sa group-la se “lesklav fidel ek saz, ki [Zezi] finn etabli.” (Matie 24:45a, NW) Tou bann manb Komite Santral zot bann Kretien ki Zeova inn swazir par so lespri. Zot pe atann moman kot zot pou al regne ansam avek Kris dan so Rwayom dan lesiel apre zot lamor.

2. Ki manze spiritiel lesklav fidel ek saz donn nou?

Zezi ti dir ki lesklav fidel ek saz ti pou “servi manze tou [bann Kretien] dan ler ki bizin.” (Matie 24:45b) Seki nou manze ed nou pou res for fizikman ek ena enn bon lasante. Dan mem fason, manze spiritiel, setadir bann lansegnman ki sorti dan Labib, donn nou lafors ki nou bizin pou res fidel ar Zeova ek pou fer travay ki Zezi inn donn nou. (1 Timote 4:6) Nou gagn sa manze-la dan bann renion, bann lasanble sirkonskripsion, bann lasanble rezional, ek osi dan bann video ek bann piblikasion ki baze lor Labib. Tousala ed nou pou konpran volonte Bondie ek pou ranforsi nou lamitie avek Li.

 ANOU GET INPE PLIS

3. Pep Zeova bien organize

Zezi gid Komite Santral pou ki zot organiz travay ki bann Temwin Zeova pe fer. Li ti pe osi gid bann premie Kretien dan mem fason. Zwe VIDEO-la.

Lir 1 Korintien 14:33, 40, ek apre sa, get sa kestion-la ansam:

• Kouma sa bann verse-la montre ki Zeova anvi ki so bann Temwin organize?

4. Lesklav fidel ek saz organiz travay predikasion

Predikasion, se travay pli inportan ki bann premie Kretien ti fer. Lir Zistwar Bann Apot 8:14, 25, ek apre sa, get sa bann kestion-la ansam:

• Parmi bann premie Kretien, kisannla ti pe diriz travay predikasion?

• Kouma Pier ek Zan ti reazir kan zot ti gagn bann instriksion avek bann lezot zapot?

Predikasion, se travay pli inportan ki Komite Santral pe organize. Zwe VIDEO-la.

 Zezi ti dir ki travay predikasion bien inportan. Lir Mark 13:10, ek apre sa, get sa bann kestion-la ansam:

• Kifer travay predikasion li bien inportan pou Komite Santral?

• Kifer nou bizin “lesklav fidel ek saz” pou organiz predikasion dan lemond antie?

5. Lesklav fidel ek saz donn bann instriksion

Komite Santral donn tou bann Kretien dan lemond antie bann instriksion. Kouma zot kone ki instriksion zot bizin donn nou? Gete kouma komite santral dan lepok bann premie Kretien ti fer sa. Lir Zistwar Bann Apot 15:1, 2, ek apre sa, get sa bann kestion-la ansam:

• Lor ki kitsoz bann premie Kretien pa ti dakor?

• Ar kisannla Pol, Barnabas, ek bann lezot Kretien ti al rod led pou regle sa problem-la?

Lir Zistwar Bann Apot 15:12-18, 23-29, ek apre sa, get sa kestion-la ansam:

• Avan ki zot pran enn desizion, ki komite santral sa lepok-la ti fer pou gagn direksion Bondie lor sa problem-la?​—Get verse 12, 15, ek 28.

Lir Zistwar Bann Apot 15:30, 31 ek 16:4, 5, ek apre sa, get sa bann kestion-la ansam:

• Kouma bann premie Kretien ti reazir kan zot ti gagn bann instriksion ar komite santral?

• Kouma Zeova ti beni zot lobeisans?

Lir 2 Timote 3:16 ek Zak 1:5, ek apre sa, get sa kestion-la ansam:

• Kotsa Komite Santral rod led pou pran bann desizion azordi?

 SEKI NOU’NN APRANN

Komite Santral se “lesklav fidel ek saz” ki Zezi inn etabli. Li donn bann Kretien ki dan lemond antie bann linstriksion ek manze spiritiel.

Eski Ou Rapel?

• Kisannla ki’nn etabli “lesklav fidel ek saz”?

• Kouma Komite Santral pran nou swin?

• Eski ou krwar ki Komite Santral se limem ki “lesklav fidel ek saz”?