Jesus ej Bõran eklejia eo an Kũrjin ro. (Epesõs 5:23) Rainin, ãinwõt juon Kiiñ ilañ, Jesus ej lale im tõl ri-kal̦oor ro an ijin ioon lal̦ ikijjeen “ri-karejar eo etiljek im mãlõtlõt.” (Riit Matu 24:45.) Jesus Christ ear make jitõñ “ri-karejar” in im ear lel̦o̦k ñane maroñ eo ñan kajejjete eddo ko an. Meñe ãindein, ak ri-karejar in ej aikuj pokake wõt Christ im jerbal ñan ro jatin Christ. Wõn ri-karejar in? Ewi wãween an ri-karejar in kõjparok im lale kõj?

1. Wõn “ri-karejar eo etiljek im mãlõtlõt”?

Jãn tõre ko etto tok ñan raan kein, aolep iien Jeova ej kõjerbal juon em̦m̦aan ak juon kumi edik in em̦m̦aan ro ñan lel̦o̦k naanin tõl ñan armej ro an. (Malakai 2:7; Hibru 1:1) Ãlikin kar mej eo an Jesus, rijjilõk ro im em̦m̦aan ro rej lale eklejia ilo Jerusalem rar bõk eddo eo ñan tõl. (Jerbal 15:2) Ilo ejja laajrak in wõt, rainin juon kumi edik in em̦m̦aan ro rej lale eklejia rej tõl. Rej n̦aetan kumi in edik, Kumi eo Ej Lale Aolep Eklejia ko an Ri-Kõnnaan ro an Jeova (Governing Body of Jehovah’s Witnesses), im rej letok ekkan ko ilo jetõb im tõl jerbalin kwal̦o̦k naan. Kumi in ej “ri-karejar eo etiljek im mãlõtlõt me [Jesus] ear jitõñe.” (Matu 24:45a) Aolep ro uwaan Kumi eo Ej Lale Aolep Eklejia ko (Governing Body) rej Kũrjin ro em̦õj kapit er, im rej reim̦aanl̦o̦k ñan aer irooj ippãn Christ ilo aelõñ eo an ilañ ñe ejem̦l̦o̦k mour ko aer ijin ioon lal̦.

2. Ekkan rot ko ilo jetõb ri-karejar eo etiljek ej litok?

Jesus ear ba bwe ri-karejar eo etiljek enaaj ‘lel̦o̦k kijen [Kũrjin ro m̦õttaer] ilo iien eo ejejjet.’ (Matu 24:45b) Ãinwõt an m̦õñã ko jej kañi jipañ kõj bwe jen kajoor im ãjmour, ãindeinl̦o̦k wõt ekkan ko ilo jetõb​—katak ko jãn Naanin Anij​—rej letok ñan kõj kajoor eo jej aikuji ñan dãpij wõt ad tiljek ñan Jeova im kõm̦m̦ane jerbal eo Jesus ear kappeiki kõj ñan kõm̦m̦ane. (1 Timote 4:6) Jej bõk ekkan kein ikijjeen kweilo̦k ko kajjojo wiik, kweilo̦k ko rel̦l̦ap, im bareinwõt ikijjeen bok ko rej pedped ioon Baibõl̦ im pijain alwõj ko me rej jipañ kõj ñan mel̦el̦e kõn ankilaan Anij im kõkajoor jem̦jerã eo ad ippãn.

 KAM̦WILAL̦L̦O̦K AM̦ MEL̦EL̦E

3. Armej ro an Jeova rej aikuj kon̦ im laajrak

Ium̦win tõl eo an Jesus, Kumi eo Ej Lale Aolep Eklejia ko ej loloodjake im laajrake jerbal ko an Ri-Kõnnaan ro an Jeova. Ejja wãween dein wõt an Jesus kar tõl im loloodjake Kũrjin ro etto. Kõjo̦e PIJAIN ALWÕJ eo.

Riit 1 Korint 14:33, 40, innem bwebwenato kake kajjitõk in:

• Ewi wãween an eoon kein kwal̦o̦k bwe Jeova ekõn̦aan bwe Ri-Kõnnaan ro an ren kon̦ im laajrak?

4. Ri-karejar eo etiljek ej loloodjake im laajrake jerbalin kwal̦o̦k naan eo ad

Jerbal eo eaorõktata me Kũrjin ro etto rar kõm̦m̦ane ej kwal̦o̦k naan. Riit Jerbal 8:14, 25, innem bwebwenato kake kajjitõk kein:

• Ilo tõre ko an Kũrjin ro etto, wõn ro rar tõl jerbalin kwal̦o̦k naan?

• Ewi wãween an kar Piter im Jon em̦m̦akũt ñan naanin tõl ko jãn rijjilõk ro m̦õttaer?

Jerbalin kwal̦o̦k naan ej jerbal eo eaorõktata me Kumi eo Ej Lale Aolep Eklejia ko ej loloodjake. Kõjo̦e PIJAIN ALWÕJ eo.

 Jesus ekar kaalikkar joñan an aorõk jerbalin kwal̦o̦k naan. Riit Mark 13:10, innem bwebwenato kake kajjitõk kein:

• Etke jerbalin kwal̦o̦k naan elukkuun aorõk ippãn Kumi eo Ej Lale Aolep Eklejia ko?

• Etke jej aikuji “ri-karejar eo etiljek im mãlõtlõt” ñan tõl im loloodjake jerbalin kwal̦o̦k naan ipel̦aakin lal̦ in?

5. Ri-karejar eo etiljek ej letok naanin tõl ko

Kumi eo Ej Lale Aolep Eklejia ko ej lel̦o̦k naanin tõl ko ñan aolep Kũrjin ro ipel̦aakin lal̦ in. Ewi wãween aer kõm̦m̦an pepe kõn ta naanin tõl ko rej litok? Lale ewi wãween an kar kumi eo ej lale aolep eklejia ko ilo tõre ko an Kũrjin ro etto kõm̦m̦ane men in. Riit Jerbal 15:1, 2, innem bwebwenato kake kajjitõk kein:

• Ta eo ear kõm̦m̦an apañ ibwiljin jet iaan Kũrjin ro etto?

• Ñan kõm̦adm̦õd apañ eo, Paul, Barnebas, im Kũrjin ro jet rar kajjitõk jipañ im naanin tõl ko jãn wõn?

Riit Jerbal 15:12-18, 23-29, innem bwebwenato kake kajjitõk in:

• M̦okta jãn aer kar kõm̦m̦ane juon pepe, ta ko kumi eo ej lale aolep eklejia ko ilo tõre ko etto rar l̦õmn̦ak kake ke rar kappukot naanin tõl ko jãn Anij kõn apañ in?​—Lale eoon 12, 15, im 28.

Riit Jerbal 15:30, 31 im 16:4, 5, innem bwebwenato kake kajjitõk kein:

• Ewi wãween an kar Kũrjin ro ilo tõre ko etto em̦m̦akũt ñan naanin tõl ko kumi eo ej lale aolep eklejia ko rar lel̦o̦k ñan er?

• Ewi wãween an Jeova kar kõjeraam̦m̦an aer pokake?

Riit 2 Timote 3:16 im Jemes 1:5, innem bwebwenato kake kajjitõk in:

• Ia eo Kumi eo Ej Lale Aolep Eklejia ko rej kappok jipañ im naanin tõl ko ie ñe rej kõm̦m̦ani pepe ko rainin?

 TARLEP IN KATAK EO ILO TUKADU

Kumi eo Ej Lale Aolep Eklejia ko an Ri-Kõnnaan ro an Jeova (Governing Body) ej “ri-karejar eo etiljek im mãlõtlõt” me Christ ear jitõñ er. Kumi in ej lel̦o̦k naanin tõl ko im ej naajdik Kũrjin ro ipel̦aakin lal̦ in kõn ekkan ko ilo jetõb.

Ãlij

• Wõn eo ear jitõñ “ri-karejar eo etiljek im mãlõtlõt”?

• Ewi wãween an Kumi eo Ej Lale Aolep Eklejia ko lale im loloodjake kõj?

• Kwõj ke tõmak bwe Kumi eo Ej Lale Aolep Eklejia ko ej “ri-karejar eo etiljek im mãlõtlõt”?