Иисус Христос — христиан погынымашлан вуй (Ефесян-влаклан 5:23). Таче тудо каваште улеш. Тудо мландыште илыше тунемшыж-влакым «ӱшанле да ушан тарзе» гоч вуйлата. (Матфейын 24:45 лудын лекса.) Иисус тиде «тарзым» шке шогалтен да южо решенийым лукташ тудлан правам пуэн. Тиде тарзе Христосым колыштеш да Христосын иза-шольыж-влаклан служитла. Кӧ тиде тарзе, да кузе тудо мемнан верч тырша?

1. Кӧ тыгай «ӱшанле да ушан тарзе»?

Иегова шке калыкшылан кӱштымаш-влакым эре посна еҥ-влак гоч але изи группо гоч пуэден (Малахия 2:7; Еврей-влаклан 1:1). Иисусын колымыж деч вара Иерусалимыште апостол ден кугурак иза-влак христиан погынымашым вуйлаташ тӱҥалыныт (Апост. пашашт 15:2). Тидын семынак таче кугурак иза-влак гыч шогышо изи группо — Иегован Таныкше-влакын Вуйлатыше советышт — Юмын калыкшылан духовный кочкышым пуэн шога да таныклымаш пашам виктара. Тиде группо — «ӱшанле да ушан тарзе», кудыжым Иисус шогалтен (Матфейын 24:45б). Вуйлатыше советыште чыла иза-влак святой шӱлыш дене шӱрымӧ христиан улыт. Мландыште илышышт пытымеке, нуно Христос дене пырля кавасе Кугыжаныште вуйлаташ тӱҥалыт.

2. Ӱшанле тарзе могай кочкышым пуа?

Иисусын каласымыже почеш ӱшанле тарзе христиан-влаклан «шке жапыштыже кочкышым пуаш» тӱҥалеш (Матфейын 24:45а). Кузе тыглай кочкыш мыланна вийым пуа да тазалыкнам пеҥгыдемда, тыгак духовный кочкыш — библийысе туныктымаш — мыланна Иеговалан ӱшанле кодаш да Иисусын пуымо заданийжым шукташ полша (1 Тимофейлан 4:6). Тиде духовный кочкышым ме вашлиймаште, конгрессыште да Библиеш негызлыме публикаций ден видео гоч налына. Чыла тиде мыланна Юмын эрыкшым сайрак умылаш да тудын дене умбакыжат йолташ лияш полша.

 КЕЛГЫНРАК ШЫМЛЕН НАЛЗА

3. Иегован калыкше организованный лийшаш

Иисусын вуйлатымыже почеш Иегован Таныкше-влакын пашаштым Вуйлатыше совет виктарен шога. Тидын семынак икымше курымысо христиан-влакын пашашт виктарыме лийын. ВИДЕОРОЛИКЫМ ончалза.

1 Коринфян-влаклан 14:33, 40 лудын лекса да вашмутым пуыза:

• Иегован кумылжо почеш тудын калыкше организованный лийшаш. Нине почеламут-влак тидым кузе пеҥгыдемдат?

4. Ӱшанле тарзе таныклымаш пашам виктара

Икымше христиан-влакын эн тӱҥ пашашт таныклымаш паша лийын. Апост. пашашт 8:14, 25 лудын лекса да вашмутым пуыза:

• Икымше курымышто таныклымаш пашам кӧ виктарен?

• Петр ден Иоанн, вес апостол-влакын кӱштымашыштым пален налмеке, мом ыштеныт?

Таныклымаш пашам виктарымаш — Вуйлатыше советын эн тӱҥ пашаже. ВИДЕОРОЛИКЫМ ончалза.

 Иисусын мутшо гыч раш коеш: таныклымаш паша чот кӱлешан. Маркын 13:10 лудын лекса да вашмутым пуыза:

• Молан Вуйлатыше совет таныклымаш пашам чот кӱлешанлан шотла?

• Молан уло тӱня мучко таныклымаш пашам виктарашлан «ӱшанле да ушан тарзе» кӱлеш?

5. Ӱшанле тарзе кӱштымашым пуа

Вуйлатыше совет уло тӱня мучко илыше христиан-влаклан кӱштымашым пуэн шога. Кузе нине иза-влак решенийым луктыт? Ончалза, кузе икымше курымысо вуйлатыше совет решенийым луктын. Апост. пашашт 15:1, 2 лудын лекса да вашмутым пуыза:

• Икымше христиан-влак коклаште могай йодыш шотышто ӱчашымаш лектын?

• Тиде йодышым рашемдашлан Павел, Варнава да вес иза-влак кӧ деч полышым йодыныт?

Апост. пашашт 15:12—18, 23—29 лудын лекса да вашмутым пуыза:

• Тиде йодыш шотышто Юмын шонымыжым умылен налашлан икымше курымысо вуйлатыше совет мом ыштен? (12, 15 да 28 почеламут-влакым ончыза.)

Апост. пашашт 15:30, 31 да 16:4, 5 лудын лекса да вашмутым пуыза:

• Икымше христиан-влак, вуйлатыше советын кӱштымыжым пален налмеке, мом ыштеныт?

• Иегова нине христиан-влакым колыштмыштлан кузе суапландарен?

2 Тимофейлан 3:16 да Иаковын 1:5 лудын лекса да вашмутым пуыза:

• Таче Вуйлатыше совет решенийым лукмо годым мом шотыш налеш?

 ТӰҤ ШОНЫМАШ

Вуйлатыше совет — тиде «ӱшанле да ушан тарзе», кудыжым Христос шогалтен. Тиде тарзе уло тӱня мучко илыше христиан-влаклан кӱштымашым да духовный кочкышым пуа.

Ушештарымаш

• «Ӱшанле да ушан тарзым» кӧ шогалтен?

• Кузе Вуйлатыше совет мемнан верч тырша?

• Вуйлатыше совет — тиде «ӱшанле да ушан тарзе» манын, те ӱшанеда мо?