Jisas ba kristian kangrigisanka lalka sa (Epesus 5:23). Naha piua ra, heven wina ai disaipilka nani tâ briaia dukiara, “alba kasak sinskira ba” yus munisa (Matiu 24:45 aisi kaikma). Naha “alba” ba Jisas mita mangkan, bara wahbi sakanka kum kum daukaia raitka yaban. Baku kabia kra sin, Kraist albika ban sa, bara Kraist muihka nani warkka daukisa. ¿Baha albika ba ya sa ki? ¿Dîa tnatka ra wan main kaikisa?

1. ¿“Alba kasak sinskira” ba ya sa ki?

Jehova ai uplika nani ra tâ briaia dukiara, waitna kum apia kaka waitna nani daknika kum ban yus muni kan (Malaquías 2:7; Hibru Nani 1:1). Tânka kum baku, Jisas pruan ba wina, apastil nani bara Jerusalem almukka nani ba kangrigisan tâ bri kan (Apastil Nani Sturka 15:2). Baha piua ra daukan baku, naiwa piua ra sin almuk daknika sirpi kum—Jehova witiniska nani Tâ Bri Daknika ba—spirit pata wankisa bara smalkaia warkka tâ brisa. Naha daknika ba sika “alba kasak sinskira [...] ai dawanka [Jisas] mita [...] mangkan ba” (Matiu 24:45a). Tâ Bri Daknika uplika nani sut ba spirit holikira ni wahbi sakan kristianka nani sa, bara naha Tasba ra ai rayaka danh takbia taim, heven Kingka lâka ra Kraist wal tâ bribia bîla kaikisa.

2. ¿Alba kasak ba dîa spirit pata wankisa?

Jisas win alba kasak ba naha warkka brisa: “witin nani [kristian wala nani] ra piua kat plun dakak[aia]” (Matiu 24:45b). Plun pisa taim, karnika wankisa bara wan wîna tara yamnika takisa. Sim baku, spirit pata ba—wibia sa kaka, smalkanka nani Baibil wina sakan ba—Jehova ra kasak kaia, bara Jisas dîa wan blikan warkka ba daukaia karnika wankisa (1 Timoti 4:6). Naha spirit pata ba, aidrubanka bara aidrubanka kau tara nani, Baibil wina sakan ulbi sakanka bara lilka nani bâk wankisa. Naha nani sut ba hilp wan munisa Jehova dîa want ba tânka briaia, bara witin wal pâna lâka ba kau karna daukaia.

 KAU LAN TAKS

3. Jehova uplika nani ba asla kaia sa

Tâ Bri Daknika ba Jehova witniska nani warkka asla munaia dukiara, Jisas nina blikisa. Pas kristianka nani sin, sim baku wark taki kan. LILKA ba kaikma.

1 Korint 14:33, 40 aisi kaikma bara naha dukiara aisi banhma:

• Naha tikska nani ra wi ba baku, ¿Jehova want sa ai witniska nani ba asla kabia? ¿Dîa muni man baku lukisma ki?

4. Alba kasak ba smalkaia warkka asla munisa

Pas kristianka nani mapara, smalkaia warkka ba kau tânka tara bri kan. Apastil Nani Sturka 8:14, 25 aisi kaikma bara naha dukiara aisi banhma:

• Patitara piua ra, ¿ya nani mita smalkaia warkka ba tâ bri kan?

• ¿Pita bara Jan ba apastil wala nani mita yaban smalkanka ba wal dîa daukan?

Tâ Bri Daknika mita asla muni warkka nani tila wina, kau tânka tara bri ba smalkaia warkka sa. LILKA ba kaikma.

 Jisas marikan, smalkaia warkka ba kau tânka tara brisa. Mark 13:10 aisi kaikma bara naha dukiara aisi banhma:

• ¿Dîa muni Tâ Bri Daknika ba smalkaia warkka ra tânka tara yabisa?

• Tasba aiska smalkaia warkka asla munaia dukiara, ¿dîa muni yawan “alba kasak sinskira ba” nit sa?

5. Alba kasak ba wan tapahkisa

Tâ Bri Daknika ba tasba aiska ra kristian nani tapahkisa. ¿Dîa smalkanka nani yabaia sa sapa, nahki wahbi sakisa? Pas kristianka nani tâ bri daknika ba, baha nahki dauki kan ba kaiks. Apastil Nani Sturka 15:1, 2 aisi kaikma bara naha dukiara aisi banhma:

• ¿Dîa muni pas kristianka nani tilara blahwanka kum takan?

• Baha trabilka wapnika mangkaia dukiara, ¿Pal, Bernabé bara kristian wala nani ba ya nani ra pliki banhwan?

Apastil Nani Sturka 15:12-18 bara 23-29 aisi kaikma, bara naha dukiara aisi banhma:

• Wahbi sakanka kum daukras kainara, Gâd hilpka plikaia dukiara, ¿patitara piua tâ bri daknika ba dîa daukan? (Borska 12, 15 bara 28 kaikma).

Apastil Nani Sturka 15:30, 31 bara 16:4, 5 aisi kaikma, bara naha dukiara aisi banhma:

• Tâ bri daknika wina smalkanka nani brin taim, ¿pas kristianka nani ba nahki ansa munan?

• ¿Yawan nahki nu sa, bîla walan ba mita Jehova witin nani ra blisin munan ba?

2 Timoti 3:16 bara Jems 1:5 aisi kaikma, bara naha dukiara aisi banhma:

• Naiwa piua ra sin, Tâ Bri Daknika ba wahbi sakanka nani daukisa taim, ¿smalkanka nit nani ba briaia dukiara dîa daukisa?

 DÎA LAN TAKRAM

Tâ Bri Daknika ba, Jisas mita wahbi sakan “alba kasak sinskira” sa. Naha albika ba tasba aiska kristianka nani ra smalkanka nani bara spirit pata yabisa.

Wan kupia krawaia

• ¿“Alba kasak sinskira ba” ya bui wahbi sakan?

• ¿Dîa tnatka ra Tâ Bri Daknika ba main wan kaikisa?

• ¿Tâ Bri Daknika ba “alba kasak sinskira” sa man kasak lukisma ki?