E Yesu awili umutwe wi wungwe lya wina Klistu. (Waefeso 5:23) Pe yo-o impindi pano ali kwi yulu, akatungulula awasambi wakwe ukuwomvya “umuzya wa cisinka swinya uwa mano.” (Wazyani Mateyu 24:45.) E Yesu wapa umuzya amaka yakupingula pe vimwi amuno awino wamusonta. Swinya we-e umuzya akatontela e Klistu nu kuwombela wa munyina wa kwe KIistu. Nomba uzye wenye umuzya weweni? Akatusakamala wuli?

1. Uzye “umuzya wacisinka swinya uwa mano weweni”?

Ukufuma na kaali kwawanga awonsi wamwi wano e Yehova wawomvyanga pa kunena awantu wakwe ivya kucita. (Malakayi 2:7; Waheberi 1:1) Pansizi ya mfwa ya kwe Yesu, awatumwa nawasongo wa mu Yerusalemu awano wasyazile wakutungulula. (Imilimo 15:2) Mwe ya-a amanda, kwawa iwumba litici ilya eluda wano wakatungulula. Lyo-o iwumba, ali Wumba Lino Likatungulula ilya Nte zya kwe Yehova. Likapekanya vino vikatupalamika kwe Yehova nukuwomya isuwilo litu swinya likatungulula nu mulimo wakuwizya. Lyo-o iwumba, awili ‘umuzya wacisinka swinya uwamano wino e [Yesu] wasozile.’ (Mateyu 24:45a) Wonsinye wano wawa mwi Wumba Lino Likatungulula wapakwa nu muzimu uwutele, wawa ni suwilo lya kuya mukuteka ne Klistu nga cakuti wamala umulimo wawo munsi.

2. Avyakulya ci vino umuzya wacisinka akatupekanizizya?

E Yesu walanzile ukuti umuzya wacisinka ‘awino aliwapa [awina Klistu awawuye] ichakulya pampindi nzipile.’ (Mateyu 24:45b) Wulyanye vino ivyakulya vino tukalya vikatupa amaka nu wumi uwuzima, avino na vyo tukasambilila mwi Zwi lya kwe Leza vikatupa amaka yakutwalilila ni cisinka kwe Yehova pano tukuwomba umulimo wuno Yesu watupa. (1 Timoti 4:6) Tukapocelela vyo-o ivyakulya vino vikatuwomya pa kulongana kwa pi wungwe, ukwa muputule, ukwa citungu, mu mabuku yano tukapocelela na mu mavidyo yano yakatwavwa ukumanya cino Leza akulonda tucite nu kuwa ciwuza wakwe.

 SAMBILILA IVICILE PA-A

3. Awantu wa kwe Yehova wazipizile ukulonganikwa icete

Ukupitila muwutunguluzi wa kwe Yesu, Iwumba Lino Likatungulula likatungulula umulimo wa Nte zya kwe Yehova. Wonye avino Yesu watungululanga awina Klistu wa kutalicila. Tambani e VIDYO.

Wazyani 1 Wakorinte 14:33, 40, nu kulanzyanya lyo-o iwuzyo:

• Uzye lyo-o iwaliko likalanjizya wuli ukuti e Yehova akalonda awantu wakwe ukulonganikwa icete?

4. Umuzya wacisinka akasinincizya ukuti umulimo wa kuwizya wukuwombwa

Ukuwizya awuli umulimo uwucindame wuno nawina Klistu awakunsizi wawombanga. Wazyani Imilimo 8:14, 25, nu kulanzyanya ya-a amawuzyo:

• Weweni wino wanenanga awina Klistu wakutalicilapo ivya kuwomba umulimo wa kuwizya?

• Uzye e Peter ne Yohani wacisile wuli pano wapocelezile uwutunguluzi ukufuma ku watumwa awawuye?

Umulimo wa kuwizya awuli umulimo uwucindamisye wuno Iwumba Lino Likatungulula lyawikako amano. Tambani e VIDYO.

 E Yesu walanzile vino umulimo wa kuwizya wacindama. Wazyani Marko 13:10, nu kulanzyanya ya-a amawuzyo:

• Amulandu ci wuno Iwumba Lino Likatungulula lyawicila sana amano ku mulimo wa kuwizya?

• Amulandu ci wuno pakalondecelwa “umuzya wacisinka swinya uwa mano” pakuti umulimo wa kuwizya insi yonsinye watungululwa icete?

5. Umuzya wacisinka akatunena ivya kucita

Iwumba Lino Likatungulula alino likanena awina Klistu insi yonsinye ivya kukonka. Uzye wakacita wuli pa kuti wamanye ivya kutunena? Mulole vino Iwumba Lino Likatungulula ilya wina Klistu wakutalicila lyacisile. Wazyani Imilimo 15:1, 2, nu kulanzyanya ya-a amawuzyo:

• Acani cino awina Klistu wamwi awakutalicilapo wapanzinkanangapo?

• Akwinye kuno e Paulo, e Banaba na wanji wayile pakuti wawanene ivya kucita?

Wazyani Imilimo 15:12-18, 23-29, nu kulanzyanya lyo-o iwuzyo:

• Pano watani wapingulepo ivili vyonsinye, avyani vino iwumba lino likatungulula lya cisile pakuti e Leza awatungulule ukumala yo-o intazi?—Lola amavesi 12, 15, ne 28.

Wazyani Imilimo 15:30, 31; ne 16:4, 5, nu kulanzyanya ya-a amawuzyo:

• Avyani vino awina Klistu wakutalicilapo wacisile pano iwumba lino likatungulula lyawanenile ivya kucita?

• Uzye e Yehova wawalambuzile wuli pa civwila cawo?

Wazyani 2 Timoti 3:16; ne Jemusi 1:5, nu kulanzyanya lyo-o iwuzyo:

• Akwinye kuno Iwumba Lino Likatungulula likafumya uwutunguluzi pano likupingula pa vili vyonsinye?

 IVISINKA VIKULU

Iwumba Lino Likatungulula ‘amuzya wa cisinka swinya uwa mano’ wino e Klistu wasonta. Wakanena awina Klistu wawuye insi yonsinye ivya kukonka swinya wakawapa ni vya kuwomya isuwilo lyawo.

Avyani Vino Wasambilila?

• Weweni wino wasonta “umuzya wa cisinka swinya uwamano”?

• Uzye Iwumba Lino Likatungulula likatusakamala wuli?

• Uzye wazumila ukuti Iwumba Lino Likatungulula awili “umuzya wacisinka swinya uwa mano”?