Ta̱ Jesús kúú ta̱ níʼi yichi̱ nu̱ú na̱ congregación (Efesios 5:​23). Tiempo vitin ni íyora chí ndiví xíniñúʼura ta̱ “esclavo ta̱ nda̱kúní-ini ta̱ ndíchiní” ña̱ va̱ʼa kuniʼira yichi̱ nu̱ú na̱ ndíku̱n miíra (kaʼvi Mateo 24:​45). Mií ta̱ Jesús nda̱kaxin ta̱ “esclavo” yóʼo ña̱ va̱ʼa ndaka̱xinna ña̱ keʼé na̱ ñuu Ndióxi̱. Soo ni saá káchíñura nu̱ú ta̱ Cristo ta saátu nu̱ú na̱ ñani ta̱ Cristo. ¿Ndáa ta̱ kúú ta̱ esclavo yóʼo? Ta, ¿ndáa ki̱ʼva ndáara miíyó?

1. ¿Ndáa ta̱ kúú ta̱ “esclavo ta̱ nda̱kúní-ini ta̱ ndíchiní”?

Jehová ndiʼi tiempo xíniñúʼura ta̱a á iin tiʼvi loʼona ña̱ va̱ʼa kuniʼira yichi̱ nu̱ú na̱ ñuura (Malaquías 2:7; Hebreos 1:1). Tá kúú, tá ni̱xi̱ʼi̱ ta̱ Jesús, na̱ anciano na̱ ñuu Jerusalén kúú na̱ xi̱niʼi yichi̱ nu̱ú na̱ congregación (Hechos 15:2). Ta saátu tiempo vitin iin tiʼvi loʼo na̱ anciano na̱ kúú Cuerpo Gobernante na̱ kúú testigo Jehová táxina ña̱ xíniñúʼuna ña̱ va̱ʼa sakúaʼana xa̱ʼa̱ Ndióxi̱, ta saátu níʼina yichi̱ nu̱úna ña̱ va̱ʼa natúʼunna xíʼin na̱ yiví xa̱ʼa̱ Ndióxi̱. Na̱yóʼo kúú ta̱ “esclavo ta̱ nda̱kúní-ini ta̱ ndíchiní ta̱ ta̱xi ta̱ káchíñura nu̱ú [ta̱ Jesús]” chiñu ndaʼa̱ ña̱ kiʼinra kuenta xíʼin ña̱yóʼo (Mateo 24:45a). Ndiʼi na̱ kúú Cuerpo Gobernante, Ndióxi̱ nda̱kaxinrana xíʼin espíritu santo ña̱ va̱ʼa ku̱ʼu̱nna chí ndiví, ta ndátuna ña̱ kaʼndachíñuna xíʼin ta̱ Cristo ti̱xin Reinora ña̱ íyo chí ndiví, tá ná va̱ása kookana nu̱ú ñuʼú yóʼo.

2. ¿Ndáaña kúú ña̱ táxi ta̱ esclavo ta̱ nda̱kúní-ini?

Ta̱ Jesús ni̱ka̱ʼa̱nra xa̱ʼa̱ ta̱ esclavo ta̱ nda̱kúní-ini ña̱ taxira ña̱ kuxu na̱ ndásakáʼnu Ndióxi̱ “mií tiempo ña̱ xíniñúʼunaña” (Mateo 24:45b). Ña̱ va̱ʼa ndakú kooyó ta va̱ása kiʼin kue̱ʼe̱ miíyó xíniñúʼu kuxuyó, ta saátu ña̱ nda̱kú koo-iniyó xíʼin Jehová ta sáxi̱nuyó chiñu ña̱ ta̱xi ta̱ Jesús ndaʼa̱yó xíniñúʼuyó tu̱ʼun Ndióxi̱ ña̱ va̱ʼa chindeétáʼanña xíʼinyó (1 Timoteo 4:6). Ta ña̱yóʼo ndákiʼinyóña ti̱xin reunión, asamblea, nu̱ú tutu ña̱ tává na̱ ñuu Ndióxi̱ ta saátu video ña̱ kána nu̱ú Biblia. Ndiʼi ña̱yóʼo chíndeétáʼanña xíʼinyó ña̱ kunda̱a̱-iniyó ndáaña kúni̱ Jehová ná keʼéyó ta saátu ña̱ viíníka xa̱a̱yó kitáʼanyó xíʼinra.

 NÁ SAKUAʼAKAYÓ XA̱ʼA̱ÑA

3. Na̱ ñuu Jehová xíniñúʼu viíní keʼéna chiñu

Ta̱ Jesús xíniñúʼura na̱ Cuerpo Gobernante ña̱ va̱ʼa ka̱ʼa̱nra xíʼin na̱ testigo Jehová ndáa ki̱ʼva keʼéna chiñu. Ta saátu xi̱ke̱ʼé na̱ xi̱ndasakáʼnu Ndióxi̱ tá siglo nu̱ú. Kotondó VIDEO.

Kaʼvindó 1 Corintios 14:​33, 40 ta ka̱ʼa̱nndó xa̱ʼa̱ ña̱yóʼo:

• Nda̱a̱ táki̱ʼva káchi versículo yóʼo, ¿á kúni̱ Jehová ña̱ vií ná keʼé na̱ testigora chiñu? ¿Nda̱chun ndákanixi̱níún saá?

4. Ta̱ esclavo ta̱ nda̱kúní-ini káʼa̱nra ndáa ki̱ʼva natúʼunyó xíʼin na̱ yiví xa̱ʼa̱ Ndióxi̱

Na̱ cristiano na̱ nu̱ú, chiñu ña̱ xi̱ndayáʼvika nu̱úna kúú ña̱ natúʼunna xíʼin na̱ yiví xa̱ʼa̱ Ndióxi̱. Kaʼvindó Hechos 8:​14, 25 ta ka̱ʼa̱nndó xa̱ʼa̱ ña̱yóʼo:

• Tá siglo nu̱ú, ¿ndáana xi̱ka̱ʼa̱n xíʼinna ndáa ki̱ʼva natúʼunna xíʼin na̱ yiví xa̱ʼa̱ Ndióxi̱?

• ¿Ndáa ki̱ʼva xi̱ndiku̱n ta̱ Pedro xíʼin ta̱ Juan ña̱ xi̱ka̱ʼa̱n inka na̱ apóstol xíʼinna?

Na̱ Cuerpo Gobernante kúú na̱ káʼa̱n xíʼinyó ndáa ki̱ʼva natúʼunyó xíʼin na̱ yiví xa̱ʼa̱ Ndióxi̱ ta ndáyáʼviní. Kotondó VIDEO.

 Ta̱ Jesús ni̱ka̱ʼa̱nra nda̱chun ndáyáʼviní natúʼunyó xíʼin na̱ yiví xa̱ʼa̱ Ndióxi̱. Kaʼvindó Marcos 13:​10 ta ka̱ʼa̱nndó xa̱ʼa̱ ña̱yóʼo:

• ¿Nda̱chun ndíʼi̱ní-ini na̱ Cuerpo Gobernante ña̱ ná natúʼunyó xíʼin na̱ yiví xa̱ʼa̱ Ndióxi̱?

• Ña̱ va̱ʼa natúʼunyó xíʼin na̱ yiví nu̱ú iníísaá ñuyǐví, ¿nda̱chun xíniñúʼuyó ña̱ chindeétáʼan ta̱ “esclavo ta̱ nda̱kúní-ini ta̱ ndíchiní” xíʼinyó?

5. Ta̱ “esclavo ta̱ nda̱kúní-ini” níʼira yichi̱ nu̱úyó

Na̱ Cuerpo Gobernante níʼina yichi̱ nu̱ú na̱ ndásakáʼnu Ndióxi̱ iníísaá ñuyǐví. ¿Ndáa ki̱ʼva kúnda̱a̱-inina ndáaña xíniñúʼu keʼéyó? Koto ndáa ki̱ʼva xi̱keʼé na̱ Cuerpo Gobernante na̱ ni̱xi̱yo tá siglo nu̱ú chiñu yóʼo. Kaʼvindó Hechos 15:​1, 2 ta ka̱ʼa̱nndó xa̱ʼa̱ ña̱yóʼo:

• ¿Ndáa xa̱ʼa̱ kúú ña̱ va̱ása níxikitáʼanka tu̱ʼun na̱ cristiano na̱ ni̱xi̱yo siglo nu̱ú?

• Ña̱ va̱ʼa ndasavií ta̱ Pablo xíʼin ta̱ Bernabé ta saátu xíʼin inkaka na̱ xi̱ndasakáʼnu Ndióxi̱ ku̱a̱chi yóʼo, ¿ndáana ni̱xa̱ʼa̱nna nu̱ú?

Kaʼvindó Hechos 15:​12-​18 xíʼin 23-​29, ta ka̱ʼa̱nndó xa̱ʼa̱ ña̱yóʼo:

• Tá kúma̱níka ndaka̱xinna ndáaña keʼéna, ¿ndáaña ke̱ʼé na̱ Cuerpo Gobernante na̱ ni̱xi̱yo tá siglo nu̱ú ña̱ va̱ʼa chindeétáʼan Ndióxi̱ xíʼinna? (Kotondó versículo 12, 15 xíʼin 28).

Kaʼvindó Hechos 15:​30, 31 xíʼin 16:​4, 5, ta ka̱ʼa̱nndó xa̱ʼa̱ ña̱yóʼo:

• ¿Ndáaña ke̱ʼé na̱ xi̱ndasakáʼnu Ndióxi̱ tá siglo nu̱ú tá ni̱ka̱ʼa̱n na̱ Cuerpo Gobernante xíʼinna xa̱ʼa̱ ña̱ xíniñúʼu keʼéna?

• ¿Ndáa ki̱ʼva kúnda̱a̱-iniyó ña̱ ta̱xi Jehová bendición ndaʼa̱na xa̱ʼa̱ ña̱ xi̱niso̱ʼona?

Kaʼvindó 2 Timoteo 3:​16 xíʼin Santiago 1:5, ta ka̱ʼa̱nndó xa̱ʼa̱ ña̱yóʼo:

• Tá xíniñúʼu ndaka̱xin na̱ Cuerpo Gobernante na̱ íyo tiempo vitin ña̱ keʼéna iin ña̱ʼa, ¿ndáaña kéʼéna ña̱ va̱ʼa chindeétáʼan Ndióxi̱ xíʼinna?

 ÑA̱ XA̱A̱ SA̱KUAʼAYÓ

Na̱ Cuerpo Gobernante kúú ta̱ “esclavo ta̱ nda̱kúní-ini ta̱ ndíchiní” ta mií ta̱ Cristo kúú ta̱ nda̱ka̱xin na̱yóʼo. Ta̱ esclavo yóʼo káʼa̱nra xíʼin na̱ ndásakáʼnu Ndióxi̱ na̱ íyo iníísaá ñuyǐví ndáaña keʼéna, ta saátu káʼa̱nra ndáaña keʼéna ña̱ va̱ʼa sakúaʼana xa̱ʼa̱ Ndióxi̱.

Ná ndakaʼányó xa̱ʼa̱ ña̱yóʼo

• ¿Ndáana nda̱kaxin ta̱ “esclavo ta̱ nda̱kúní-ini ta̱ ndíchiní”?

• ¿Ndáa ki̱ʼva ndáa na̱ Cuerpo Gobernante miíyó?

• ¿Á kándíxaún ña̱ kúú na̱ Cuerpo Gobernante ta̱ “esclavo ta̱ nda̱kúní-ini ta̱ ndíchiní”?