UJesu uyiNhloko yebandla lobuKhristu. (Kwabase-Efesu 5:23) Ukhokhela abalandeli bakhe abasemhlabeni esebenzisa ‘inceku ethembekileyo lehlakaniphileyo.’ (Bala uMathewu 24:45.) UJesu nguye owabeka ‘inceku’ le njalo wayinika imvumo yokuthi yenze izinqumo ezithile. Lanxa kunjalo, inceku le kumele izehlise kuye futhi incedise abafowabo bakaKhristu okutsho abagcotshiweyo. Kodwa ngubani inceku leyo? Isinakekela njani lamuhla?

1. Ngubani ‘inceku ethembekileyo lehlakaniphileyo’?

Kusukela kudala uJehova ubekhokhela abantu bakhe esebenzisa umuntu oyedwa kumbe iqembu lamadoda amalutshwane. (UMalaki 2:7; KumaHebheru 1:1) Ngemva kokufa kukaJesu, abaphostoli labadala ababeseJerusalema yibo ababekhokhela. (ImiSebenzi 15:2) Lalamuhla kuleqembu lamadoda abekwe ukuthi akhokhele. Iqembu leli libizwa ngokuthi liQula Elikhokhelayo LaboFakazi BakaJehova futhi umsebenzi walo ngowokuhlela ukutshunyayelwa kwezindaba ezinhle lokulungisa ukudla okuqinisa ukholo. Yilo ‘eliyinceku ethembekileyo lehlakaniphileyo ebekwe [nguJesu].’ (UMathewu 24:45a) Wonke amalunga eQula Elikhokhelayo agcotshiwe njalo akhangelele ukuyabusa loKhristu ezulwini nxa angafa.

2. Inceku ethembekileyo isinakekela njani?

UJesu wathi inceku ethembekileyo ‘izanika [amaKhristu] ukudla kwawo ngesikhathi esifaneleyo.’ (UMathewu 24:45b) Ukudla esikudlayo kusinika amandla njalo kuyasinceda ukuthi sibe lempilakahle. Kunjalo langokudla okuqinisa ukholo esikuphiwa yinceku ethembekileyo okuvela eLizwini likaNkulunkulu. Kuyasinceda ukuthi sihlale sithembekile kuJehova njalo kusinika lamandla okwenza umsebenzi esawuphiwa nguJesu. (1 KuThimothi 4:6) Ukudla lokho sikuthola emihlanganweni yebandla, eyesiqinti leyesabelo. Siphinda sikuthole lasemabhukwini ethu, lakumavidiyo asinceda sizwisise okufunwa nguNkulunkulu ukuze siqinise ubungane bethu laye.

 GEBHA UJULE

3. Abantu bakaJehova kumele bahleleke

IQula Elikhokhelayo liqondiswa nguJesu ukuze lihlele umsebenzi owenziwa ngoFakazi bakaJehova. Langesikhathi samaKhristu akuqala kwakulequla elikhokhelayo elalisetshenziswa nguJesu ukuze akhokhele abantu bakhe. Bukelani IVIDIYO.

Bala u-1 Khorinte 14:33, 40 beselixoxa ngombuzo lo:

• Amavesi la atshengisa njani ukuthi uJehova ufuna oFakazi bakhe bahleleke?

4. Inceku ethembekileyo yiyo ehlela umsebenzi wethu wokutshumayela

AmaKhristu akuqala ayewuqakathekisa kakhulu umsebenzi wokutshumayela. Bala imiSebenzi 8:14, 25 beselixoxa ngemibuzo elandelayo:

• Ngobani ababeqondisa umsebenzi wokutshumayela ngesikhathi samaKhristu akuqala?

• UPhetro loJohane bakwenza yini lokho ababekutshelwe ngabanye abaphostoli?

IQula Elikhokhelayo liyawuqakathekisa kakhulu umsebenzi wokutshumayela. Bukelani IVIDIYO.

 UJesu wakhuluma ngokuqakatheka komsebenzi wokutshumayela. Bala uMakho 13:10 beselixoxa ngemibuzo le:

• Kuyini okwenza iQula Elikhokhelayo liwuqakathekise kakhulu umsebenzi wokutshumayela?

• Kungani kumele umsebenzi wokutshumayela owenziwa emhlabeni wonke uhlelwe ‘yinceku ethembekileyo lehlakaniphileyo’?

5. Inceku ethembekileyo ilomsebenzi wokwenza izinqumo

IQula Elikhokhelayo yilo elenza izinqumo ezinceda amaKhristu eqiniso emhlabeni wonke. Lizenza njani izinqumo lezo? Ake sihlole ukuthi iqula elikhokhelayo elalikhona ngesikhathi samaKhristu akuqala lalizenza njani izinqumo. Bala imiSebenzi 15:1, 2 beselixoxa ngemibuzo elandelayo:

• Yiphi indaba eyabangela ukuthi kube lokuphikisana phakathi kwamaKhristu akuqala?

• UPhawuli loBhanabha kanye labanye bayihambisa kubani indaba leyo?

Bala imiSebenzi 15:12-18, 23-29 beselixoxa ngombuzo lo:

• Iqula elikhokhelayo lenzani ukuze lilungise impikiswano leyo?—Khangela amavesi 12, 15, lo-28.

Bala imiSebenzi 15:30, 31 lo-16:4, 5 beselixoxa ngemibuzo le:

• AmaKhristu akuqala asamukela njani isinqumo esasenziwe liqula elikhokhelayo?

• Kuyini okutshengisa ukuthi uJehova wawabusisa amaKhristu lawo ngenxa yokulalela kwawo?

Bala u-2 Thimothi 3:16 loJakhobe 1:5 beselixoxa ngombuzo olandelayo:

• IQula Elikhokhelayo lenzani nxa lisenza izinqumo lamuhla?

 ISIFINQO

IQula Elikhokhelayo ‘yinceku ethembekileyo lehlakaniphileyo’ ebekwe nguKhristu. Yilo elenza izinqumo ezinceda amaKhristu eqiniso emhlabeni wonke, liphinde liwanike lokudla okuwaqinisa ukholo.

Ufundeni?

• Ngubani owabeka ‘inceku ethembekileyo lehlakaniphileyo’?

• IQula Elikhokhelayo lisinakekela njani?

• Kuyini okukwenza ukholwe ukuthi iQula Elikhokhelayo yilo ‘eliyinceku ethembekileyo lehlakaniphileyo’?