Jesu ndiyena Musoro wo ungano. (Vaefeso 5:23) Nyamasi uno, iyena ari kudenga, naari kondhoyo anopekeja ndhungamiriro vateveri vake vo pasi pano ecishandisa “muranda wakagondeka no wakangwara.” (Verenganyi Mateu 24:45.) Jesu wakagaja “muranda wakagondeka,” no kumupekeja simba rokutungamirira. Pikija no kutungamirira uku, muranda wakagondeka anoenderera mberi ecishandira Kristu no hama jake. Ndiyani muranda wakagondeka? Iyena anotingwaririsa kudini?

1. Ndiyani “muranda wakagondeka no wakangwara”?

Jehovha kuvhira kare, iyena wakashandisa mwanarume kana cikwata co vanarume kuti apekeje ndhungamiriro ku vandhu vake. (Malakia 2:7; Vahebheru 1:1) Pasure po kufa kwa Jesu, vapostori no vakuru vo ku Jerusarema ndivona vaipa ndhungamiriro. (Mabasa o Vapostori 15:2) Ndizvona zviri kuitikavo nyamasi. Jehovha ari kushandisa cikwata cidoko co vakuru kuti vapekeje zvokuha zvo kumujimu no kuvonerera basa rokucumaera. Cikwata ici i Mukhumbi Unotonga wo Zvapupu zva Jehovha. Ivona vanoumba “muranda wakagondeka no wakangwara, wakadihwa” [ndi Jesu]. (Mateu 24:45a) Vese vanobatanija Mukhumbi Unotonga, Makristu akazojwa ngo mujimu mucena. Ivona vanozoenda kotonga na Kristu pasure po kwenda kwavo kudenga.

2. Muranda wakagondeka ari kupekejesa kudini zvokuha zvo kumujimu?

Jesu wakananga kuti muranda wakagondeka waizopa “zvokuha [vateveri vake] ngo nguva kwayo.” (Mateu 24:45b) Inga zvokuha zvinotibesera kuti tirambe takavanga no uhomi hwa ushoni, zvokuha zvo kumujimu kana ndhungamiriro jo Soko ra Mwari, zvinotipa simba kuti tienderere mberi takagondeka kuna Jehovha no kuita basa ratakapuwa ndi Jesu. (1 Timoti 4:6) Tinoashira zvokuha izvi pa musongano jo ungano, magungano o ndharaundha no wo mutundhu, mabhuku edu akacijikira mu Bhaibheri no mavhidhiyo. Zvokuha izvi zvese zvinotibesera kuzwisisa kuda ka Mwari no kuvangisa ushamwari hwedu naye.

 NASANYI KUPSAKISISA

3. Vandhu va Jehovha vanodikana kuva vakarongeka

Wecitungamirihwa ndi Jesu, Mukhumbi Unotonga unoronga basa ro Zvapupu zva Jehovha. Izvi zvakafanana no zvaiithwa ngo Makristu o munguva jo kare. Rijanyi VHIDHIYO.

Verenganyi 1 Vakorinte 14:33, 40, perapo bhuisananyi ngo muvhunjo unotevera:

• Vhesi iji jinokhombijisa kudini kuti Jehovha anoda kuti vandhu vake vave vakarongeka?

4. Muranda wakagondeka anoronga basa rokucumaera

Basa rokucumaera ndirona raisisira maningi ku Makristu o munguva jokare. Verenganyi Mabasa o Vapostori 8:14, 25, perapo bhuisananyi ngo muvhunjo jinotevera:

• Ndiyani waipa ndhungamiriro jo basa rokucumaera ku Makristu o munguva jokare?

• Kureva kuti Pedhru na Johani vaitendera ndhungamiriro javaipuwa ngo vapostori vamweni?

Basa rinosisira maningi ro Mukhumbi Unotonga ngo rokupa ndhungamiriro kuitira basa rokucumaera. Rijanyi VHIDHIYO.

 Jesu wakagogomejera kuti basa rokucumaera ndirona rinosisira maningi. Verenganyi Marko 13:10, perapo bhuisananyi ngo muvhunjo jinotevera:

• Ngenyi basa rokucumaera rinosisira maningi kuno vo Mukhumbi Unotonga?

• Ngenyi tinoda kuti “muranda wakagondeka no wakangwara” aronge basa iri?

5. Muranda wakagondeka ndiyena anotitungamirira

Mukhumbi Unotonga ndiwona unopa ndhungamiriro ku Makristu o munyika yese. Iwona unokhetesa kudini ndhungamiriro jinonga jecidiwa? Vonanyi kuti mukhumbi unotonga wo munguva jo kare waizviitisa kudini. Verenganyi Mabasa o Vapostori 15:1, 2, perapo bhuisananyi ngo muvhunjo jinotevera:

• Ngozvapi zvakaviisa cineso ku Makristu amweni okare?

• Pauro, Bharnabha no vamweni vakapsakira kwapi ndhungamiriro kuti vatonge cinesoco?

Verenganyi Mabasa o Vapostori 15:12-18, 23-29, perapo bhuisananyi ngo muvhunjo unotevera:

• Ucito waita cisungo, mukhumbi unotonga wo munguva jo vapostori waipsaka ndhungamiriro ja Mwari ngo pamusoro po shwiroyo. Ivona vaizviitisa kudini?—Vonanyi mavhesi 12, 15, na 28.

Verenganyi Mabasa o Vapostori 15:30, 31 na 16:4, 5, perapo bhuisananyi ngo muvhunjo jinotevera:

• Kureva kuti Makristu okare aiashira ndhungamiriro jaaipuwa ngo mukhumbi unotonga pa mukuvowo?

• Jehovha wakakomboreresa kudini kuzwira kwavo?

Verenganyi 2 Timoti 3:16 na Jakobo 1:5, perapo bhuisananyi ngo muvhunjo unotevera:

• Mukhumbi Unotonga unotemesa kudini zvivaringo nyamasi uno?

 ZVOTAJIJA

Mukhumbi Unotonga ndiwona “muranda wakagondeka no wakangwara” wakagajwa ndi Jesu Kristu. Hama iji jinopa ndhungamiriro no zvokuha zvo kumujimu ku Makristu o munyika yese.

Kuhwirijira

• Ndiyani wakagaja “muranda wakagondeka no wakangwara”?

• Mukhumbi Unotonga unotibeseresa kudini nyamasi uno?

• Munotenda kuti Mukhumbi Unotonga ndiwona “muranda wakagondeka no wakangwara”?